मृगेन्द्रागम · अध्याय 1.8

अथेन्द्रियशरीरार्थैश् चिद्योगस्यानुमीयते
निमित्तमागामिभावाद् यतो नागाम्यहेतुमत् ॥

तस्य प्रदेशवर्तित्वाद् वैचित्र्यात्क्षणिकत्वतः
प्रतिपुंनियतत्वाच्च सन्ततत्वाच्च तद्गुणम् ॥

ईशाविद्याद्यपेक्षित्वात् सहकारि तदुच्यते
कर्म व्यापारजन्यत्वाद् अदृष्टं सूक्ष्मभावतः ॥

जनकं धारकं भोग्यम् अध्यात्मादित्रिसाधनम्
तत्सत्यानृतयोनित्वाद् धर्माधर्मस्वरूपकम् ॥

स्वापे विपाकमभ्येति तत्सृष्टावुपयुज्यते
मायायां वर्तते चान्ते नाभुक्तं लयमेति च ॥

इति मायादिकालान्त प्रवर्तकमनादिमत्
कर्म व्यञ्जकमप्येतद् रोधि सद्यन्न मुक्तये ॥