મૃગેન્દ્રાગમ · અધ્યાય 1.8

અથેન્દ્રિયશરીરાર્થૈશ્ ચિદ્યોગસ્યાનુમીયતે
નિમિત્તમાગામિભાવાદ્ યતો નાગામ્યહેતુમત્ ॥

તસ્ય પ્રદેશવર્તિત્વાદ્ વૈચિત્ર્યાત્ક્ષણિકત્વતઃ
પ્રતિપુંનિયતત્વાચ્ચ સન્તતત્વાચ્ચ તદ્ગુણમ્ ॥

ઈશાવિદ્યાદ્યપેક્ષિત્વાત્ સહકારિ તદુચ્યતે
કર્મ વ્યાપારજન્યત્વાદ્ અદૃષ્ટં સૂક્ષ્મભાવતઃ ॥

જનકં ધારકં ભોગ્યમ્ અધ્યાત્માદિત્રિસાધનમ્
તત્સત્યાનૃતયોનિત્વાદ્ ધર્માધર્મસ્વરૂપકમ્ ॥

સ્વાપે વિપાકમભ્યેતિ તત્સૃષ્ટાવુપયુજ્યતે
માયાયાં વર્તતે ચાન્તે નાભુક્તં લયમેતિ ચ ॥

ઇતિ માયાદિકાલાન્ત પ્રવર્તકમનાદિમત્
કર્મ વ્યઞ્જકમપ્યેતદ્ રોધિ સદ્યન્ન મુક્તયે ॥