मत्स्य पुराण · अध्याय 94

पद्मासनः पद्मकरः पद्मगर्भसमद्युतिः
सप्ताश्वः सप्तरज्जुश्च द्विभुजः स्यात्सदा रविः ॥

श्वेतः श्वेताम्बरधरः श्वेताश्वः श्वेतवाहनः
गदापाणिर्द्विबाहुश्च कर्तव्यो वरदः शशी ॥

रक्तमाल्याम्बरधरः शक्तिशूलगदाधरः
चतुर्भुजः श्वेतरोमा वरदः स्याद् धरासुतः ॥

पीतमाल्याम्बरधरः कर्णिकारसमद्युतिः
खड्गचर्मगदापाणिः सिंहस्थो वरदो बुधः ॥

देवदैत्यगुरू तद्वत् पीतश्वेतौ चतुर्भुजौ
दण्डिनौ वरदौ कार्यौ साक्षसूत्रकमण्डलू ॥

इन्द्रनीलद्युतिः शूली वरदो गृध्रवाहनः
बाणबाणासनधरः कर्तव्यो ऽर्कसुतस् तथा ॥

करालवदनः खड्ग चर्मशूली वरप्रदः
नीलसिंहासनस्थश्च राहुरत्र प्रशस्यते ॥

धूम्रा द्विबाहवः सर्वे गदिनो विकृताननाः
गृध्रासनगता नित्यं केतवः स्युर्वरप्रदाः ॥

सर्वे किरीटिनः कार्या ग्रहा लोकहितावहाः
स्वाङ्गुलेनोच्छ्रिताः सर्वे शतमष्टोत्तरं सदा ॥