મત્સ્ય પુરાણ · અધ્યાય 94

પદ્માસનઃ પદ્મકરઃ પદ્મગર્ભસમદ્યુતિઃ
સપ્તાશ્વઃ સપ્તરજ્જુશ્ચ દ્વિભુજઃ સ્યાત્સદા રવિઃ ॥

શ્વેતઃ શ્વેતામ્બરધરઃ શ્વેતાશ્વઃ શ્વેતવાહનઃ
ગદાપાણિર્દ્વિબાહુશ્ચ કર્તવ્યો વરદઃ શશી ॥

રક્તમાલ્યામ્બરધરઃ શક્તિશૂલગદાધરઃ
ચતુર્ભુજઃ શ્વેતરોમા વરદઃ સ્યાદ્ ધરાસુતઃ ॥

પીતમાલ્યામ્બરધરઃ કર્ણિકારસમદ્યુતિઃ
ખડ્ગચર્મગદાપાણિઃ સિંહસ્થો વરદો બુધઃ ॥

દેવદૈત્યગુરૂ તદ્વત્ પીતશ્વેતૌ ચતુર્ભુજૌ
દણ્ડિનૌ વરદૌ કાર્યૌ સાક્ષસૂત્રકમણ્ડલૂ ॥

ઇન્દ્રનીલદ્યુતિઃ શૂલી વરદો ગૃધ્રવાહનઃ
બાણબાણાસનધરઃ કર્તવ્યો ઽર્કસુતસ્ તથા ॥

કરાલવદનઃ ખડ્ગ ચર્મશૂલી વરપ્રદઃ
નીલસિંહાસનસ્થશ્ચ રાહુરત્ર પ્રશસ્યતે ॥

ધૂમ્રા દ્વિબાહવઃ સર્વે ગદિનો વિકૃતાનનાઃ
ગૃધ્રાસનગતા નિત્યં કેતવઃ સ્યુર્વરપ્રદાઃ ॥

સર્વે કિરીટિનઃ કાર્યા ગ્રહા લોકહિતાવહાઃ
સ્વાઙ્ગુલેનોચ્છ્રિતાઃ સર્વે શતમષ્ટોત્તરં સદા ॥