मञ्जुश्रीनामसंगीति (अन्य संस्करण) · श्लोक 61-80

घनैकसारो वज्रात्मा सद्योजातो जगत्पतिः
गगनोद्भवः स्वयंभूः प्रज्ञाज्ञानानलो महान् ॥

वैरोचनो महादीप्तिर् ज्ञानज्योतिर् विरोचनः
जगत्प्रदीपो ज्ञानोल्को महातेजाः प्रभास्वरः ॥

विद्याराजो ऽग्रमन्त्रेशो मन्त्रराजा महार्थकृत्
महोष्णीषो ऽद्भुतोष्णीषो विश्वदर्शी वियत्पतिः ॥

सर्वबुद्धात्मभावाग्र्यो जगदानन्दलोचनः
विश्वरूपी विधाता च पूज्यो मान्यो महाऋषिः ॥

कुलत्रयधरो मन्त्री महासमयमन्त्रधृक्
रत्नत्रयधरः श्रेष्ठस् त्रियानोत्तमदेशकः ॥

अमोघपाशो विजयी वज्रपाशो महाग्रहः
वज्राङ्कुशो महापाशो वज्रभैरवभीकरः ॥

क्रोधराट् षण्मुखो भीमः षड्नेत्रः षड्भुजो बली
दंष्ट्राकरालकङ्कालो हलाहलशताननः ॥

यमान्तको विघ्नराड् वज्रवेगो भयंकरः
विघुष्टवज्रो हृद्वज्रो मायावज्रो महोदरः ॥

कुलिशेशो वज्रयोनिर् वज्रमण्डो नभोपमः
अचलैकजटाटोपो गजचर्मपटार्द्रधृक् ॥

हाहाकारो महाघोरो हीहीकारो भयानकः
अट्टहासो महाहासो वज्रहासो महारवः ॥

वज्रसत्वो महासत्वो वज्रराजो महासुखः
वज्रचण्डो महामोदो वज्रहूंकारहूंकृतिः ॥

वज्रबाणायुधधरो वज्रखड्गो निकृन्तनः
विश्ववज्रधरो वज्री एकवज्री रणंजहः ॥

वज्रज्वालाकरालाक्षो वज्रज्वालाशिरोरुहः
वज्रावेशो महावेशः शताक्षो वज्रलोचनः ॥

वज्ररोमाङ्कुरतनुर् वज्ररोमैकविग्रहः
वज्रकोटिनखारम्भो वज्रसारघनच्छविः ॥

वज्रमालाधरः श्रीमां वज्राभरणभूषितः
हाहाट्टहास निर्घोषो वज्रघोषः षडक्षरः ॥

मञ्जुघोषो महानादस् त्रैलोक्यैकवरो महान्
आकाशधातुपर्यन्तो घोषो घोषवतां वरः ॥

तथाताभूतनैरात्म्यं भूतकोटिर् अनक्षरः
शून्यतावादिवृषभो गम्भीरोदारगर्जनः ॥

धर्मशङ्खो महाशब्दो धर्मगण्डी महारणः
अप्रतिष्ठितनिर्वाणो दशदिग्धर्मदुन्दुभिः ॥

अरूपो रूपवान् अग्र्यो नानारूपो मनोमयः
सर्वरूपावभासश्रीर् अशेषप्रतिबिम्बधृक् ॥

अप्रधृष्यो महेशाख्यस् त्रैधातुकमहेश्वरः
समुच्छ्रितार्यमार्गस्थो धर्मकेतुर् महोदयः ॥