मञ्जुश्रीनामसंगीति (अन्य संस्करण) · श्लोक 141-160

पञ्चस्कन्धार्थस् त्रिष्कालः सर्वक्षणविभावकः
एकक्षणाभिसंबुद्धः सर्वबुद्धस्वभावधृक् ॥

अनङ्गकायः कायाग्र्यः कायकोटिविभावकः
अशेषरूपसंदर्शी रत्नकेतुर् महामणिः ॥

सर्वसंबुद्धबोद्धव्यो बुद्धबोधिर् अनुत्तरः
अनक्षरो मन्त्रयोनिर् महामन्त्रकुलत्रयः ॥

सर्वमन्त्रार्थजनको महाबिन्दुर् अनक्षरः
पञ्चाक्षरो महाशून्यो बिन्दुशून्यः शताक्षरः ॥

सर्वाकारो निराकारः षोडशार्धार्धबिन्दुधृक्
अकलः कलनातीतश् चतुर्थध्यानकोटिधृक् ॥

सर्वध्यानकलाभिज्ञः समाधिकुलगोत्रवित्
समाधिकायो कायाग्र्यः सर्वसंभोगकायराट् ॥

निर्माणकायो कायाग्र्यो बुद्धनिर्माणवंशधृक्
दशदिग्विश्वनिर्माणो यथावज्जगदर्थकृत् ॥

देवातिदेवो देवेन्द्रः सुरेन्द्रो दानवाधिपः
अमरेन्द्रः सुरगुरुः प्रमथः प्रमथेश्वरः ॥

उत्तीर्णभवकान्तार एकः शास्ता जगद्गुरुः
प्रख्यातो दशदिग्लोक धर्मदानपतिर् महान् ॥

मैत्रीसंनाहसंनद्धः करुणावर्मवर्मितः
प्रज्ञाखड्गधनुर्बाणः क्लेशाज्ञानरणंजहः ॥

मारारिर् मारजिद् वीरश् चतुर्मारभयान्तकृत्
सर्वमारचमूजेता संबुद्धो लोकनायकः ॥

वन्द्यः पूज्यो ऽभिवाद्यश् च माननीयश् च नित्यशः
अर्चनीयतमो मान्यो नमस्यः परमो गुरुः ॥

त्रैलोक्यैकक्रमगतिर् व्योमपर्यन्तविक्रमः
त्रैविद्यः श्रोत्रियः पूतः षडभिज्ञः षडनुस्म्र्तिः ॥

बोधिसत्वो महासत्वो लोकातीतो महर्द्धिकः
प्रज्ञापारमितानिष्ठः प्रज्ञातत्त्वत्वम् आगतः ॥

आत्मवित् परवित् सर्वः सर्वीयो ह्य् अग्रपुद्गलः
सर्वोपमाम् अतिक्रान्तो ज्ञेयो ज्ञानाधिपः परः ॥

धर्मदानपतिः श्रेष्ठश् चतुर्मुद्रार्थदेशकः
पर्युपास्यतमो जगतां निर्याणत्रययायिनाम् ॥

परमार्थविशुद्धश्रीश् त्रैलोक्यसुभगो महान्
सर्वसंपत्करः श्रीमान् मञ्जुश्रीः श्रीमतां वरः ॥

नमस् ते वरद वज्राग्र्य भूतकोटि नमो ऽस्तु ते
नमस् ते शून्यतागर्भ बुद्धबोधि नमो ऽस्तु ते ॥

बुद्धराग नमस् ते ऽस्तु बुद्धकाम नमो नमः
बुद्धप्रीति नमस् तुभ्यं बुद्धमोद नमो नमः ॥

बुद्धस्मित नमस् तुभ्यं बुद्धहास नमो नमः
बुद्धवाच नमस् ते ऽस्तु बुद्धभाव नमो नमः ॥