महाभारत · अध्याय 13.13

अत्राप्युदाहरन्तीममितिहासं पुरातनम् ।
चतुर्णामपि वेदानां संवादं शृणु पुत्रक ॥
ऋग्वेद उवाच ।

गृहानाश्रयमाणस्य अग्निहोत्रं च जुह्वतः ।
सर्वं सुकृतमादत्ते यः साये नुद्यतेऽतिथिः ॥

न स्कन्दते न व्यथते नास्योर्ध्वं सर्पते रजः ।
वरिष्ठमग्निहोत्राच्च ब्राह्मणस्य मुखे हुतम् ॥
सामवेद उवाच ।

न चेद्धन्ति पितरं मातरं वा न ब्राह्मणं नापवादं करोति ।
यत्किञ्चिदन्यद्वृजिनं करोति । प्रीतोऽतिथिस्तदुपहन्ति पापम् ॥
अथर्ववेद उवाच ।

यत्क्रोधनो यजते यद्ददाति यद्वा तपस्तप्यति यज्जुहोति ।
वैवस्वतो हरते सर्वमस्य मोघं चेष्टं भवति क्रोधनस्य ॥