काव्यालंकारसूत्र (अन्य संस्करण) · अध्याय 1.3

सापि वैदर्भी, तात्स्थ्यात् ॥ व्कल्_1,2.22* ॥
तृतीयो ऽध्यायः ।
लोको विद्या प्रकीर्ण च काव्याङ्गानि

लोकवृत्तं लोकः

शब्दस्मृत्यभिधानकोशच्छन्दोविचितिकलाकामशास्त्रदण्डनीतिपूर्वा विद्याः

शब्दस्मृतेः शब्दशुद्धिः

अभिधानकोशात् पदार्थनिश्चयः

छन्दोविचितेर्वृत्तसंशयच्छेदः

कलाशास्त्रेभ्यः कलातत्त्वस्य संवित्

कामशास्त्रतः कामोपचारस्य

दण्डनीतेर्नयापनययोः

इतिवृत्तकुटिलत्वं च ततः

लक्ष्यज्ञत्वमभियोगो वृद्धसेवावेक्षणं प्रतिभानमवधानं च प्रकीर्णम्

तत्र काव्यपरिचयो लक्ष्यज्ञत्वम्

काव्यबन्धोद्यमो ऽभियोगः

काव्योपदेशगुरुशुश्रूषणं वृद्धसेवा

पदाधानोद्धरणमवेक्षणम्

कवित्वबीजं प्रतिभानम्

चित्तैकाग्र्यमवधानम्

तद्देशकालाभ्याम्

विविक्तो देशः

रात्रियामस्तुरीयः कालः

काव्यं गद्यं पद्यं च

गद्यं वृत्तगन्धि चूर्णमुत्कलिकाप्रायं च

पद्यभागवद्वृत्तगन्धि

अनाविद्धललितपदं चूर्णम्

विपरीतमुत्कलिकाप्रायम्

पद्यमनेकभेदम्

तदनिबद्धं निबद्धं च

क्रमसिद्धिस्तयोः स्रगुत्तंसवत्

नानिबद्धं चकास्त्येकतेजःपरमाणुवत्

संदर्भेषु दशरूपकं श्रेयः

तद्धि चित्रं चित्रपटवद्विशेषसाकल्यात्

ततो ऽन्यभेदकॢप्तिः