धर्मसूत्र · अध्याय 3
तस्याश्रमविकल्पम् एके ब्रुवते ।
ब्रह्मचारी गृहस्थो भिक्षुर् वैखानसः ।
तेषां गृहस्थो योनिर् अप्रजनत्वाद् इतेरेषाम् ।
तत्रोक्तं ब्रह्मचारिणः ।
आचार्याधीनत्वम् आन्तम् ।
गुरोः कर्मशेषेण जपेत् ।
गुर्वभावे तदपत्यवृत्तिस् ।
तदभावे वृद्धे सब्रह्मचारिण्य् अग्नौ वा ।
एवंवृत्तो ब्रह्मलोकम् आप्नोति जितेन्द्रियः ।
उत्तरेषां चैतदविरोधि ।
अनिचयो भिक्षुः ।
ऊर्ध्वरेताः ।
ध्रुवशीलो वर्षासु ।
भिक्षार्थी ग्रामम् इयात् ।
जघन्यम् अनिवृत्तं चरेत् ।
निवृत्ताशीः ।
वाक्चक्षुःकर्मसंयतः ।
कौपीनाच्छादनार्थे वासो बिभृयात् ।
प्रहीणम् एके निर्णिज्य ।
नाविप्रयुक्तम् ओषधिवनस्पतीनाम् अङ्गम् उपाददीत ।
न द्वितीयाम् अपर्तु रात्रिं ग्रामे वसेत् ।
मुण्डः शिखी वा ।
वर्जेयेद् बीजवधम् ।
समो भूतेषु हिंसानुग्रहयोः ।
अनारम्भी ।
वैखानसो वने मूलफलाशी तपःशीलः ।
श्रावणकेनाग्निम् आधाय ।
अग्राम्यभोजी ।
देवपितृमनुष्यभूतर्षिपूजकः ।
सर्वातिथिः प्रतिषिद्धवर्जम् ।
वैष्कम् अप्य् उपयुञ्जीत ।
न फालकृष्टम् अधितिष्ठेत् ।
ग्रामं च न प्रविशेत् ।
जटिलश् चीराजिनवासाः ।
नातिसंवत्सरं भुञ्जीत ।
एकाश्रम्यं त्व् आचार्याः प्रत्यक्षविधानाद्गार्हस्थस्य गार्हस्थस्य ।
मूल पाठ: Dharmasūtra · Edition: Ganesa Sastrin Gokhale, Pune 1910, (Anandasrama Sanskrit Series, 61); with variants from: The Institutes of Gautama, ed.by A.F. Stenzler, London 1876. · Data entry Nobuyuki Watase · GRETIL (Göttingen) · CC BY-NC-SA 4.0