धर्मसूत्र · अध्याय 22
प्रायश्चित्तम् ।
अग्नौ सक्तिर् ब्रह्मघ्नस् त्रिर् अवच्छातस्य ।
लक्ष्यं वा स्यात् जन्ये शस्त्रभृताम् ।
खट्वाङ्गकपालपाणिर् वा द्वादश संवत्सरान्ब्रह्मचारी भैक्षाय ग्रामं प्रविशेत् कर्माचक्षाणः ।
पथो ऽपक्रामेत् संदर्शनाद् आर्यस्य ।
स्थानासनाभ्यां विहरन् सवनेषूदकोपस्पर्शीशुध्येत् ।
प्राणलाभे वा तन्निमित्ते ब्राह्मणस्य ।
द्रव्यापचये त्र्यवरं प्रतिराद्धः ।
अश्वमेधावभृथे वा ।
अन्ययज्ञे ऽप्य् अग्निष्टुदन्तश् चेत् ।
सृष्टश् चेद् ब्राह्मणवधे ऽहत्वापि ।
आत्रेय्याश् चैवम् ।
गर्भे चाविज्ञाते ।
राजन्यवधे षड्वार्षिकं प्राकृतं ब्रह्मचर्यमृषभैकसहस्राश् च गा दद्यात् ।
वैश्ये तु त्रैवार्षिकम् ऋषभैकशताश् च गादद्याद् ।
शूद्रे संवत्सरम् ऋषभैकादशाश् च गा दद्यात् ।
अनात्रेय्यां चैवम् ।
गां च वैश्यवत् ।
मण्डूकनकुलकाकबिम्बदहरमूषकश्वहिंसासुच ।
अस्थन्वताम् सहस्रं हत्वा ।
अनस्थिमताम् अनडुद्भारे(अनडुह्) च ।
अपि वास्थन्वताम् एकैकस्मिन् किंचिद् दद्यात् ।
षण्ढे पलालभारः सीसमाषश् च ।
वराहे घृतधटः ।
सर्पे लोहदण्डः ।
ब्रह्मबन्ध्वां चलनायां नीलः ।
वैशिकेन किंचित् ।
तल्पान्नधनलाभवधेषु पृथग्वर्षाणि ।
द्वे परदारे ।
त्रीणि श्रोत्रियस्य ।
द्रव्यलाभे चोत्सर्गः ।
यथास्थानं वा गमयेत् ।
प्रतिषिद्धमन्त्रयोगे सहस्रवाकश् चेत् ।
अग्न्युत्सादिनिराकृत्युपपातकेषु चैवम् ।
स्त्री यातिचारिणी गुप्ता पिण्डं तु लभेत ।
अमानुषीषु गोवर्जं स्त्रीकृते कूष्माण्डैर् घृतहोमोघृतहोमः ।
मूल पाठ: Dharmasūtra · Edition: Ganesa Sastrin Gokhale, Pune 1910, (Anandasrama Sanskrit Series, 61); with variants from: The Institutes of Gautama, ed.by A.F. Stenzler, London 1876. · Data entry Nobuyuki Watase · GRETIL (Göttingen) · CC BY-NC-SA 4.0