बोधसार · अध्याय 24

[प्. 540-]
बोधदीपपञ्चकम्
नाधारपात्रमादत्ते न च तैलमपेक्षते ।
न वर्तिकामाश्रयते न धत्ते कज्जलं मनाक्

न तापकर्त्ता कस्यापि वायुना न च कम्पते ।
न विनाशमवाप्नोति तमः सर्वं निहन्ति च

एकरूपाः प्रकाशन्ते सर्वे भावा यदर्चिषा ।
यदग्रे न प्रकाशेत च्छाया मायास्वरूपिणी

यश्चक्षुषामविषयो रूपाकारविवर्जितः ।
मनसोऽप्यप्रकाश्यश्च रूपाकारप्रकाशकः

कदाचित्क्वचिदेवासौ तात केनापि हेतुना ।
प्रवर्तते बोधदीपः सतां हृदयमन्दिरे