बोधसार · अध्याय 23

[प्. 534-]
निर्वाणदशकम्
न शक्यं वक्तुमेवेदं तथापि कृपया तव ।
कया चित्कलया वत्स निर्वाणदशकं ब्रुवे

मोहनिद्रा न तत्रास्ति तेनायं जागरो महान् ।
भावादयो न भासन्ते तेनायं नैव जागरः

अपूर्वं भासते वस्तु तेन स्वप्नोऽयमुत्तमः ।
दृश्यं न भासते तत्र तेन स्वप्नो न चैव सः

अभावात्सा पदार्थानां सुषुतिः सुखरूपिणी ।
न जाड्यं न तमस्तत्र सुषुप्तिरपि नैव सा

अवस्थात्रयनिर्मुक्तं तुरीयमिति कीर्तितम् ।
नैवैकद्वित्रिविज्ञानं तुरीयं किमपेक्षया

जीवस्यैतन्निजं रूपं तेन जीवोऽयमुच्यते ।
जीवचेष्टा न तत्रास्ति तेन निर्जीवता स्फुटा

सच्चिदानन्दरूपत्वाद्ब्रह्म चेन्नापि तद्भवेत् ।
यो वेद स तु न ब्रूते यो न वेद गिराऽस्य किम्

तस्माच्छ्रुतिः प्राह सत्यमवाङ्मनसगोचरम् ।
यथाऽनुभूतं मुनिभिस्तथैवेदं न संशयः

एतदन्तः समाम्नाय एतदन्ता तपस्विता ।
उपदेशोऽप्येतदन्त एतदन्ता विवेकिता

श्रोतव्यं श्रुतिवाक्येन सर्वं ब्रह्म त्वया श्रुतम् ।
भवितव्यं यदि ब्रह्म तर्हि ब्रह्मैव भूयताम्