बोधसार · अध्याय 20

[प्. 513-]
निद्रापञ्चकम्
न सन्ति यस्यां निद्रायां जाग्रत्स्वप्नसुषुप्तयः ।
अवस्थात्रयरूपिण्यः सर्वद्वन्द्वविवर्जनात्

गुणातीततया तत्र तमोलेशो न विद्यते ।
स्वयंप्रकाशरूपत्वादप्रकाशोऽपि नास्ति हि

यत्प्राप्तये महापुण्यास्तपस्यन्ति तपस्विनः ।
विचारयन्ति विद्वांसो वेदान्तवचनानि च

सुखभोगः फलं नात्र सैवानन्दस्वरूपिणी ।
पुरुषार्थस्वरूपत्वान्न कालक्षेपरूपिणी

सुलभा शुद्धबोधानां दुर्लभा विषयात्मनाम् ।
सहजा माधवादीनां सा निद्रा तु महाफलम्