बोधसार · अध्याय 16.28.4.5

[प्. 435-]
अथ पातञ्जलनिर्णयः ।
योगसिद्धिप्रसक्तोऽयं पातञ्जलपरिश्रमः ।
कलाकौशलमेवेदं न स्वरूपस्थितिर्हि सा

रे योगसिद्ध जीवानां कायव्यूहो न दुर्लभः ।
विदेहमुक्तता सिद्धिः कायव्यूहो न सिद्धये

हे योगसिद्ध जानासि परकायप्रवेशनम् ।
परं तु नैव जानासि परकायप्रवेशनम्

भूतादयोऽपि जानन्ति परकायप्रवेशनम् ।
सा सिद्धिर्नैव बन्धः सा यद्धि कायप्रवेशनम्

अवश्यं मरणं तर्हि कीदृशी चिरजीविता ।
जन्ममृत्युजराध्वंसि त्वं विज्ञानामृतं पिब

परचित्तस्थितं वस्तु त्वया ज्ञातं ततश्च किम् ।
स्वचित्तसंस्थितं वस्तु परं ब्रह्म विलोकय

निकटस्थस्यात्मनश्चेन्न स्याच्छ्रवणदर्शनम् ।
का सिद्धिः सा तु या सिद्धिर्दूरश्रवणदर्शनम्

भवन्ति वायसादीनामपि खेचरताऽऽदयः ।
सिद्धिभिर्नैव सिध्येत सिद्धिभिः किं प्रयोजनम्

न सिद्धिर्योगसिद्धिर्हि बलवीर्यादिसिद्धिकृत् ।
एतेन योगः प्रत्युक्त इति वेदान्तभाषितम्

सिद्धिरात्मपरिज्ञानमन्तरायास्तु सिद्धयः ।
इति चेद्योगवित्प्राह मतमस्माकमेव तत्