બોધસાર · અધ્યાય 16.28.4.5

[પ્. 435-]
અથ પાતઞ્જલનિર્ણયઃ ।
યોગસિદ્ધિપ્રસક્તોઽયં પાતઞ્જલપરિશ્રમઃ ।
કલાકૌશલમેવેદં ન સ્વરૂપસ્થિતિર્હિ સા

રે યોગસિદ્ધ જીવાનાં કાયવ્યૂહો ન દુર્લભઃ ।
વિદેહમુક્તતા સિદ્ધિઃ કાયવ્યૂહો ન સિદ્ધયે

હે યોગસિદ્ધ જાનાસિ પરકાયપ્રવેશનમ્ ।
પરં તુ નૈવ જાનાસિ પરકાયપ્રવેશનમ્

ભૂતાદયોઽપિ જાનન્તિ પરકાયપ્રવેશનમ્ ।
સા સિદ્ધિર્નૈવ બન્ધઃ સા યદ્ધિ કાયપ્રવેશનમ્

અવશ્યં મરણં તર્હિ કીદૃશી ચિરજીવિતા ।
જન્મમૃત્યુજરાધ્વંસિ ત્વં વિજ્ઞાનામૃતં પિબ

પરચિત્તસ્થિતં વસ્તુ ત્વયા જ્ઞાતં તતશ્ચ કિમ્ ।
સ્વચિત્તસંસ્થિતં વસ્તુ પરં બ્રહ્મ વિલોકય

નિકટસ્થસ્યાત્મનશ્ચેન્ન સ્યાચ્છ્રવણદર્શનમ્ ।
કા સિદ્ધિઃ સા તુ યા સિદ્ધિર્દૂરશ્રવણદર્શનમ્

ભવન્તિ વાયસાદીનામપિ ખેચરતાઽઽદયઃ ।
સિદ્ધિભિર્નૈવ સિધ્યેત સિદ્ધિભિઃ કિં પ્રયોજનમ્

ન સિદ્ધિર્યોગસિદ્ધિર્હિ બલવીર્યાદિસિદ્ધિકૃત્ ।
એતેન યોગઃ પ્રત્યુક્ત ઇતિ વેદાન્તભાષિતમ્

સિદ્ધિરાત્મપરિજ્ઞાનમન્તરાયાસ્તુ સિદ્ધયઃ ।
ઇતિ ચેદ્યોગવિત્પ્રાહ મતમસ્માકમેવ તત્