बोधसार · अध्याय 14.7

[प्. 281-]
षष्ठी भूमिका ।
भूमिकापञ्चकाभ्यासात्पदार्थाभाविनी भवेत् ।
षष्ठी घनसुषुप्तिः स्यान्महादीक्षेति सा भवेत्

महानिद्रेति सा प्रोक्ता यस्यामानन्दघूर्णिता ।
पदार्थविस्मृतिः सैव प्रोक्ता परिणतिश्च सा

तल्लक्षणानि ।
नरवाहनसंरूढाः सुप्ता एव यथा नृपाः ।
चलन्ति तद्वत्स्वानन्दे सुप्त एव चलत्यसौ

ध्यानाध्वरविधौ यस्य पशवश्चक्षुरादयः ।
स्वयमेवोपतिष्ठन्ति रन्तिदेवमखे यथा

पूर्णे बोधे समुत्पन्ने मनोबुद्धीन्द्रियादयः ।
अपूर्णाः पूर्णतां यान्ति का वाच्या तस्य पूर्णता

तत्सर्वममृतं तस्य यत्खादति पिबत्यपि ।
यत्र तिष्ठति सा काशी स जपो यत्प्रजल्पति

संचारस्तीर्थसंचारः समाधिः शयनं मुनेः ।
यं पश्यति स विश्वेशः शृणोत्युपनिषच्च सा

पीयते प्रेमपीयूषं श्लिष्यते परमा कला ।
भुज्यते परमानन्दो योगिना न स भोगिना

संप्राप्ते परमानन्दे न शोचति गतं वयः ।
भूतं भवद्भविष्यच्च सर्वमानन्दतां गतम्