બોધસાર · અધ્યાય 14.7

[પ્. 281-]
ષષ્ઠી ભૂમિકા ।
ભૂમિકાપઞ્ચકાભ્યાસાત્પદાર્થાભાવિની ભવેત્ ।
ષષ્ઠી ઘનસુષુપ્તિઃ સ્યાન્મહાદીક્ષેતિ સા ભવેત્

મહાનિદ્રેતિ સા પ્રોક્તા યસ્યામાનન્દઘૂર્ણિતા ।
પદાર્થવિસ્મૃતિઃ સૈવ પ્રોક્તા પરિણતિશ્ચ સા

તલ્લક્ષણાનિ ।
નરવાહનસંરૂઢાઃ સુપ્તા એવ યથા નૃપાઃ ।
ચલન્તિ તદ્વત્સ્વાનન્દે સુપ્ત એવ ચલત્યસૌ

ધ્યાનાધ્વરવિધૌ યસ્ય પશવશ્ચક્ષુરાદયઃ ।
સ્વયમેવોપતિષ્ઠન્તિ રન્તિદેવમખે યથા

પૂર્ણે બોધે સમુત્પન્ને મનોબુદ્ધીન્દ્રિયાદયઃ ।
અપૂર્ણાઃ પૂર્ણતાં યાન્તિ કા વાચ્યા તસ્ય પૂર્ણતા

તત્સર્વમમૃતં તસ્ય યત્ખાદતિ પિબત્યપિ ।
યત્ર તિષ્ઠતિ સા કાશી સ જપો યત્પ્રજલ્પતિ

સંચારસ્તીર્થસંચારઃ સમાધિઃ શયનં મુનેઃ ।
યં પશ્યતિ સ વિશ્વેશઃ શૃણોત્યુપનિષચ્ચ સા

પીયતે પ્રેમપીયૂષં શ્લિષ્યતે પરમા કલા ।
ભુજ્યતે પરમાનન્દો યોગિના ન સ ભોગિના

સંપ્રાપ્તે પરમાનન્દે ન શોચતિ ગતં વયઃ ।
ભૂતં ભવદ્ભવિષ્યચ્ચ સર્વમાનન્દતાં ગતમ્