अष्टावक्र गीता · अध्याय 13

अकिंचनभवं स्वास्थ्यं कौपीनत्वे ऽपि दुर्लभम्
त्यागादाने विहायास्माद् अहम् आसे यथासुखम् ॥

कुत्रापि खेदः कायस्य, जिह्वा कुत्रापि खिद्यते
मनः कुत्रापि तत् त्यक्त्वा पुरुषार्थे स्थितः सुखम् ॥

कृतं किम् अपि नैव स्याद् इति सञ्चिन्त्य तत्त्वतः
यदा यत् कर्तुम् आयाति तत् कृत्वासे यथासुखम् ॥

कर्मनैष्कर्म्यनिर्बन्ध भावा देहस्थयोगिनः
संयोगायोगविरहाद् अहम् आसे यथासुखम् ॥

अर्थानर्थौ न मे स्थित्या गत्या न शयनेन वा
तिष्ठन् गच्छन् स्वपन् तस्माद् अहम् आसे यथासुखम् ॥

स्वपतो नास्ति मे हानिः सिद्धिर् यत्नवतो न वा
नाशोल्लासौ विहायास्माद् अहम् आसे यथासुखम् ॥

सुखादिरूपा नियमं भावेष्व् आलोक्य भूरिशः
शुभाशुभे विहायास्माद् अहम् आसे यथासुखम् ॥