अष्टावक्र गीता · अध्याय 14

प्रकृत्या शून्यचित्तो यः प्रमादाद् भावभावनः
निद्रितो बोधित इव क्षीणसंस्मरणो हि सः ॥

क्व धनानि क्व मित्राणि क्व मे विषयदस्यवः
क्व शास्त्रं क्व च विज्ञानं यदा मे गलिता स्पृहा ॥

विज्ञाते साक्षिपुरुषे परमात्मनि चेश्वरे
नैराश्ये बन्धमोक्षे च न चिन्ता मुक्तये मम ॥

अन्तर्विकल्पशून्यस्य बहिः स्वच्छन्दचारिणः
भ्रान्तस्येव दशास् तास् तास् तादृशा एव जानते ॥