आङ्गिरसस्मृति · अध्याय 2.11

उपपातकर्मसक्तो गोघ्नो मुञ्जीत यावकम् ।
अक्षारलवणं रूक्षं षष्ठे काले ऽस्य भोजनम् ॥

कृतावापो वने गोष्ठे चर्मणा तेन संवृतः ।
द्वौ मासौ स्नानमभ्यङ्गं गोमूत्रेण विधीयते ॥

पादशौचक्रिया कार्या अद्भिः कुर्वीत केवलम् ।
व्रतिवद्धारयेदण्डं समन्त्रां मेखलां तथा ॥

गाश्चैवानुव्रजेन्नित्यं रजस्तासां सदा पिबेत् ।
तिष्ठन्तीष्वनुतिष्ठेच्च व्रजन्तीष्वप्यनुव्रजेत् ॥

शुश्रूषित्वा नमस्कृत्वा रात्रौ वीरासनं वसेत् ।
गोमतीं च जपेद्विद्वान् ओकारं वेदमेव च ॥

आतुरामभिशस्तां वा चोरव्याघ्रादिभिर्भयैः ।
पतितां पङ्कलग्नां वा सर्वप्राणैर्विमोक्षयेत् ॥

उष्णे वर्षति शीते वा मारुते वाति वा भृशम् ।
न कुर्वीतात्मनस्त्राणं गोरकृत्वा स्वशक्तितः ॥

आत्मनो यदि वान्येषां गृहेक्षेत्रे ऽथवा खले ।
भक्षयन्तीं न कथयेत् पिबन्तं चैव वत्सकम् ॥

अनेन विधिना गोघ्नो यस्तु गा अनुगच्छति ।
स गोहत्यात्मकात् पापान् मुच्यते नात्र संशयः ॥

ऋषभैकादशा गाश्च दद्यात्सुचरितव्रतः ।
अविद्यमाने सर्वस्वं वेदविद्भ्यो निवेदयेत् ॥

एतेषां विहितं पुण्यं कृच्छ्रमङ्गिरसा स्वयम् ।
धर्मविद्भिरनूचानैर् उपपातकनाशनम् ॥