આઙ્ગિરસસ્મૃતિ · અધ્યાય 2.11

ઉપપાતકર્મસક્તો ગોઘ્નો મુઞ્જીત યાવકમ્ ।
અક્ષારલવણં રૂક્ષં ષષ્ઠે કાલે ઽસ્ય ભોજનમ્ ॥

કૃતાવાપો વને ગોષ્ઠે ચર્મણા તેન સંવૃતઃ ।
દ્વૌ માસૌ સ્નાનમભ્યઙ્ગં ગોમૂત્રેણ વિધીયતે ॥

પાદશૌચક્રિયા કાર્યા અદ્ભિઃ કુર્વીત કેવલમ્ ।
વ્રતિવદ્ધારયેદણ્ડં સમન્ત્રાં મેખલાં તથા ॥

ગાશ્ચૈવાનુવ્રજેન્નિત્યં રજસ્તાસાં સદા પિબેત્ ।
તિષ્ઠન્તીષ્વનુતિષ્ઠેચ્ચ વ્રજન્તીષ્વપ્યનુવ્રજેત્ ॥

શુશ્રૂષિત્વા નમસ્કૃત્વા રાત્રૌ વીરાસનં વસેત્ ।
ગોમતીં ચ જપેદ્વિદ્વાન્ ઓકારં વેદમેવ ચ ॥

આતુરામભિશસ્તાં વા ચોરવ્યાઘ્રાદિભિર્ભયૈઃ ।
પતિતાં પઙ્કલગ્નાં વા સર્વપ્રાણૈર્વિમોક્ષયેત્ ॥

ઉષ્ણે વર્ષતિ શીતે વા મારુતે વાતિ વા ભૃશમ્ ।
ન કુર્વીતાત્મનસ્ત્રાણં ગોરકૃત્વા સ્વશક્તિતઃ ॥

આત્મનો યદિ વાન્યેષાં ગૃહેક્ષેત્રે ઽથવા ખલે ।
ભક્ષયન્તીં ન કથયેત્ પિબન્તં ચૈવ વત્સકમ્ ॥

અનેન વિધિના ગોઘ્નો યસ્તુ ગા અનુગચ્છતિ ।
સ ગોહત્યાત્મકાત્ પાપાન્ મુચ્યતે નાત્ર સંશયઃ ॥

ઋષભૈકાદશા ગાશ્ચ દદ્યાત્સુચરિતવ્રતઃ ।
અવિદ્યમાને સર્વસ્વં વેદવિદ્ભ્યો નિવેદયેત્ ॥

એતેષાં વિહિતં પુણ્યં કૃચ્છ્રમઙ્ગિરસા સ્વયમ્ ।
ધર્મવિદ્ભિરનૂચાનૈર્ ઉપપાતકનાશનમ્ ॥