યોગયાત્રા · અધ્યાય 32

પરિવેષો ઽર્કશશિનોઃ શત્રુપક્ષગ્રહૈઃ સહ।
સ્નિગ્ધો ઽખણ્ડશ્ ચ જયદઃ પાપદો બહુમણ્ડલઃ॥

પ્રતિલોમો ઽતિબહુલો નેષ્ટ ઇષ્ટઃ પ્રદક્ષિણઃ।
નીહારઃ પાંશુપાતશ્ ચ હિતઃ સ્નિગ્ધઃ પ્રદક્ષિણઃ॥

ગન્ધર્વનગરં હન્તિ પ્રાક્પ્રભૃત્ય્ અવનીશ્વરમ્।
બલેશં યુવરાજં ચ પુરોહિતમ્ ઇતિ ક્રમાત્॥

સિતાદ્યં બ્રાહ્મણાદીંશ્ ચ વિદિક્ષુ વર્ણસઙ્કરાન્।
પ્રદક્ષિણં તુ યાત્રાયાં જયદં નેષ્ટમ્ અન્યથા॥

દિશાં દાહો ઽથ જયદઃ પ્રદક્ષિણ ઉપાગતઃ।
શ્વભ્રોન્નતે વધો રાજ્ઞો જયાય વ્યત્યયેન ચ॥

ઘૃતામ્બુપયસાં સ્રાવે ચ્યુતે વૃક્ષાચ્ ચ તત્ક્ષયઃ।
તૈલે ચ નાશો મુખ્યાનાં રક્તે શસ્ત્રકૃતં ભયમ્॥

મદ્યેન તુ મિથો ભેદો રુગ્ભયં દધિનિસ્રવે।
કુસુમાત્ કુસુમોત્પત્તૌ પરચક્રાગમં વદેત્॥

બહુતોયે ઽતિસંશોષઃ કૂપે ઽસૃક્પૂર્તિવિસ્રવઃ।
રાજ્ઞો ઽબ્દાર્ધાદ્ વધં કુર્યુઃ સ્રોતો ઽલ્પત્વે પરાગમઃ॥

વૃષ્ટિવિદ્યુત્સ્વનૈર્ વ્યભ્રે ચરસ્થિરવિપર્યયે।
દિનોલ્કાયાં ચ પીડ્યન્તે જના ભૂપતિભિઃ સહ॥

સપ્તાહં સન્તતાન્ય્ અતો વૃષ્ટિર્ હન્યાન્ નરાધિપમ્।
અનગ્નિજ્વલને પુંસાં વ્યાધિર્ આશ્વ્ એવ જાયતે॥

પીડા રાષ્ટ્રસ્ય ષણ્માસાદ્ ઉષ્ણશીતવિપર્યયે।
માસે ઽષ્ટમે નૃપસ્યાન્તો નિનાદે પશુપક્ષિણામ્॥

નગરારણ્યસત્ત્વાનામ્ અરણ્યપુરસેવને।
રાષ્ટ્રપીડાધિકે વર્ષે મુખ્યલોકસ્ય ચ ક્ષયઃ॥

સ્તમ્ભોપલકુસૂલાર્ચાપીઠશય્યાપસર્પણે।
ગદને ચાપિ દેશસ્ય નાશં માસત્રયાદ્ વદેત્॥

ગોનાગાશ્વવધો ઽબ્દાર્ધે વ્યત્યયો વા નૃપાન્તકૃત્।
દેશનાશસ્ તથા સ્ત્રીણાં ખગાહિપશુસમ્ભવે॥

ધાન્યરસમદ્યભોજનફલપુષ્પસ્નેહમાંસવસ્ત્રાણામ્।
સિકતારજોરસાત્મકસશર્કરાઙ્ગારવર્ષેષુ॥

સુતપત્ની ક્ષુદ્રાજ્ઞા નૃપદેશચમૂપમરણસંક્લેશાઃ।
ભેદો ઽપદો ઽથ મન્ત્રિવ્યાધિવિનાશભૂપક્રોધાઃ॥

નિશિ સુરચાપં સિતવર્ણાદ્યં જનયતિ પીડાં દ્વિજપૂર્વાણામ્।
ભવતિ ચ યસ્યાં દિશિ તદ્દિશ્યં નરપતિમુખ્યં ન ચિરાદ્ ધન્યાત્॥

મૃગપશુરાસભવાજિગજાનાં વિયતરવો ન ચિરાદ્ ભયદાતા।
વિબુધપતિધ્વજતોરણપાતઃ ફલમ્ ઇદમ્ એવ કરોતિ નૃપાણામ્॥એ18