યોગવાસિષ્ઠ · અધ્યાય 6.81

શ્રીવસિષ્ઠ ઉવાચ ।
અથ રાઘવ રુદ્રં તં તદા તસ્મિન્મહામ્બરે ।
પ્રવૃત્તં નર્તિતું મત્તમપશ્યં વિતતાકૃતિમ્

વ્યોમેવાકૃતિમાપન્નમજહદ્વ્યાપિતાં નિજામ્ ।
મહાકારં ઘનશ્યામં દશાશાપરિપૂરકમ્

અર્કેન્દુવહ્નિનયનં ચલદ્દશદિગમ્બરમ્ ।
ઘનદીર્ઘપ્રભાજાલમાલાનં શ્યામલાર્ચિષામ્

વડવાગ્નિદૃશં લોલભુજોર્મિભરભાસુરમ્ ।
એકાર્ણવાર્ણો દ્રાગ્દેહબન્ધેનેવ સમુત્થિતમ્

પશ્યામ્યનન્તરમહં યાવત્તસ્ય શરીરતઃ ।
છાયેવ પરિનિર્યાતિ નર્તનાનુવિધાયિની

સૂર્યેષ્વવિદ્યમાનેષુ મહાતમસિ ચામ્બરે ।
સ્થિતા કથમિયં છાયા ભવેદિતિ મતિર્મમ

યાવદ્વિચારયામ્યાશુ તાવત્તસ્ય તદા પુરઃ ।
સા સ્થિતા પરિનૃત્યન્તી વિસ્તીર્ણા શ્રીત્રિલોચના

કૃષ્ણા કૃશા શિરાલાઙ્ગી જર્જરા વિતતાકૃતિઃ ।
જ્વાલાકુલાનલાલોલવનસંભારશેખરા

મિન્નાઞ્જનતમઃશ્યામા યામિનોવાકૃતિં ગતા ।
તમઃશ્રીર્દેહયુક્તેવ સાકારેવામ્બરદ્યુતિઃ

અતિદીર્ઘા કરાલાસ્યા નભો માતુમિવોદ્યતા ।
દીર્ઘજાનુભુજભ્રાન્ત્યા માતુકામેવ દિઙ્મુખમ્

કૃશા બહૂપવાસેવ પરિનિમ્નમહાતનુઃ ।
કજ્જલશ્યામલા મેઘમાલેવ પવનાકુલા

કૃશાશક્તા યદા સ્થાતું સુદીર્ઘા વિધિના તદા ।
ગ્રથિતેવ શિરારૂપૈર્દામભિર્દૈર્ઘ્યશાલિભિઃ

તથા નામ સુદીર્ઘા સા યથા તસ્યાઃ શિરઃખુરમ્ ।
મયા દૃષ્ટં પ્રયત્નેન ચિરોર્ધ્વાધોગમાગમૈઃ

અન્ત્રાન્ત્રતન્ત્રીગ્રશિતશિરઃકરખુરોત્કરા ।
આમૂલાત્સૂત્રવલિતા કણ્ટકાનામિવ સ્થલી

વિશ્વરૂપમયાર્કાદિશિરઃકમલજાલકૈઃ ।
કૃતમાલામલાલોકવાતવહ્નિમયાઞ્ચલા

પ્રલમ્બકર્ણાલુલિતનાગા નૃશવકુણ્ડલા ।
શુષ્કતુમ્બીલતાષ્ઠીલાદીર્ઘાલોલાસિતસ્તની

કુમારબર્હિપિચ્છૌઘૈર્બ્રાહ્મમૂર્ધજમણ્ડલૈઃ ।
લાઞ્છિતોચ્ચસુરાધીશશિરઃખટ્વાઙ્ગમણ્ડલા

દન્તેન્દુમાલાવિમલા વિમલોદ્દયોતપાતતઃ ।
તમોર્ણવોર્દ્ધ્વલેખેવ વૃત્તાવર્તવિવર્તિની

શુષ્કતુમ્બીલતેવોચ્ચૈરાકાશતરુસંસ્થિતા ।
વિલોલાવયવાષ્ઠીલા વાતૈઃ પટપટારવા

બૃહત્તરઙ્ગોર્ધ્વભુજા શ્યામલોલ્લાસશાલિની ।
એકાર્ણવોર્મિમાલેવ નૃત્તાવૃત્તિવિવર્તિની

ક્ષણમેકભુજાકારા ક્ષણં બહુભુજાકુલા ।
અનન્તોગ્રભુજાક્ષિપ્તજગન્નર્તનમણ્ડપા

ક્ષિપ્રમેકમુખાકારા ક્ષિપ્રં બહુમુખાકૃતિઃ ।
અનન્તોગ્રમુખી ક્ષિપ્રં નિર્મુખી ચાપિ ચ ક્ષણમ્

એકપાદાન્વિતા ક્ષિપ્રં ક્ષિપ્રં પાદશતાન્વિતા ।
ક્ષણં ચાનન્તપાદાઢ્યા નિષ્પાદાકારિણી ક્ષણમ્

કાલરાત્રિરિયં સેતિ મયાનુમિતદેહિકા ।
કાલી ભગવતી સેયમિતિનિર્ણીતસજ્જના

જ્વાલાપૂર્ણારઘટ્ટોગ્રખાતાભનયનત્રયા ।
જ્વલદ્ધરેન્દ્રનીલાદ્રિસાનૂપમલલાટભૂઃ

લોકાલોકેન્દ્રનીલોગ્રશ્વભ્રભીમહનુદ્વયા ।
વાતસ્કન્ધગુણપ્રોતતારામુક્તાકલાપિની

ઇન્દ્રનીલાદ્રિતુલ્યોચ્ચતોરણોચ્ચૈઃપ્રભામ્બરે ।
વિશ્રાન્તકાચશૈલાભભગભીષણવાયસી

નૃત્યદ્ભુજલતાપુષ્પૈર્નખશુભ્રાભ્રમણ્ડલૈઃ ।
પૂર્ણચન્દ્રશતાનીવ ભ્રમન્તી નભસ્તલે

ભ્રમદ્ભિર્વ્યાપ્તદિક્ચક્રા ભુજૈઃ કલ્પામ્બુદૈરિવ ।
વર્ષદ્ભિઃ પ્રાણિજપ્રાન્તતારાલેખાબૃહત્પ્રભાઃ

નખપુષ્પાઙ્ગુલીવલ્લીજાલૈર્ભ્રાન્તભુજદ્રુમૈઃ ।
કૃષ્ણૈઃ કાનનિતાશેષગગનાગ્રોગ્રમૂર્તિભિઃ

તમાલતાલતઃ સ્થૂલાં ભુવં દગ્ધમહાવનૈઃ ।
વિડમ્બયન્તી વલિતાં જઙ્ઘાસઙ્ઘેન લોલતા

અપ્યનન્તે મહાવ્યોમ્નિ પારં પ્રાપ્તૈઃ શિરોરુહૈઃ ।
કુર્વાણેવાતતં વાસં ચરત્તિમિરદન્તિનઃ

ઉહ્યન્તે મેરવો યેન તેન નિશ્વાસવાયુના ।
ઘનઘુંઘુમદિક્ચક્રગગનગ્રામઘોષિણા

ઘનમારુતફૂત્કારક્ષ્વેડગેયં પ્રગાયતા ।
નિયતાનુનયેનેવ ચલિતા સાનુવૃત્તિના

તતો નૃત્તવશાવેશાદ્વર્ધમાનશરીરિણી ।
મયા દૃષ્ટાવધાનેન ગગનાભોગભૂરિણા

યાવત્તયાઽઽવૃઽતા દેહે હેલાવલનસારયા ।
માલા મલયકેલાસસહ્યમન્દરમેરુભિઃ

આસીત્તસ્યા યુગાન્તાભ્રમાલિકા પટ્ટપટ્ટિકા ।
આદર્શમણ્ડલાન્યઙ્ગે ત્રીણિ લોકાન્તરાણિ ચ

કર્ણયોર્હિમવન્મેરૂ રૂપ્યકાઞ્ચનમુદ્રિકે ।
બ્રહ્માણ્ડઘુંઘુમૈર્માલા મહતી કટિમેખલા

સ્રજઃ કુલાચલાઃ શૃઙ્ગવનપત્તનગુચ્છકાઃ ।
જરત્પુરવનદ્વીપગ્રામપેલવપલ્લવાઃ

તસ્યા અઙ્ગેષુ દૃષ્ટાનિ પુરાણિ નગરાણિ ચ ।
ઋતવશ્ચ ત્રયો લોકા માસાહોરાત્રમાલિકાઃ

મુક્તાલતાદિકં નદ્યઃ કાલિન્દીત્ત્રિપથાદિકાઃ ।
ધર્માધર્માવુભૌ કર્ણભૂષણે ચાન્યકર્ણયોઃ

સ્તનાસ્તસ્યાસ્તુ ચત્વારઃ સ્રવદ્ઘર્મપયોલવાઃ ।
વેદાઃ સકલશાસ્ત્રાર્થચતુઃસંસ્થાનચૂચુકાઃ

ત્રિશૂલૈઃ પટ્ટિશૈઃ પ્રાસૈઃ શરશક્ત્યૃષ્ટિમુદ્ગરૈઃ ।
નિર્યદાયુધજાલાનિ સ્રગ્દામાનિ બિભર્તિ સા

ચતુર્દશવિધા ભૂતજાતયો યાઃ સુરાદિકાઃ ।
તસ્યાઃ શરીરશાલિન્યાસ્તા લોમાવલયઃ સ્થિતાઃ

તસ્યાશ્ચ નગરગ્રામગિરયો દેહશાયિનઃ ।
નૃત્યન્ત્યા સહ નૃત્યન્તિ પુનર્જન્મ મુદેવ તે

જઙ્ગમાત્મૈકમેવૈતજ્જગદસ્થાવરં તદા ।
નૃત્યતીતિ મયા જ્ઞાતં પરલોકે સુખં સ્થિતમ્

નિગીર્ણં જગદઙ્ગસ્થં કૃત્વા તૃપ્તિમુપાગતા ।
પરિનૃત્યતિ સા મત્તા જગજ્જીર્ણાહિ ચાતકી

આદર્શપ્રતિબિમ્બસ્થમિવાભાત્યખિલં જગત્ ।
તસ્યા વપુષિ વિસ્તીર્ણે સ્વરૂપિણિ સરૂપધૃક્

સા ન નૃત્યતિ તત્સર્વં સશૈલવનકાનનમ્ ।
જગન્નૃત્યતિ નાનાત્મ મૃત્વા પુનરુપાગતમ્

તજ્જગન્નર્તન ચારુ તદ્દેહાદર્શસંસ્થિતમ્ ।
ચિરં મયા તદા દૃષ્ટમવિનષ્ટં પુનઃ સ્થિતમ્

વિચલત્તારકાજાલં ભ્રમત્પર્વતમણ્ડલમ્ ।
મશકવ્યૂહવદ્વાતવ્યાધૂતામરદાનવમ્

સંગ્રામોન્મુક્તચક્રાભદ્વીપાર્ણવવૃતામ્બરમ્ ।
હેલાવિવલનાવર્ત પ્રૌઢશૈલધરાતૃણમ્

નીલગેઘાંશુકાવૃત્તિવાતઘુંઘુમિતામ્બરમ્ ।
કાષ્ઠાસ્થ્યાદિસ્ફુટાસ્ફોટપટત્પટપટારવમ્

જગત્પદાર્થૈર્વ્યામિશ્રૈરમિશ્રૈર્મુકુરૈર્યથા ।
વ્યાપ્તમાભોગિભાકારૈરઙ્ગૈરઙ્ગભ્રમૈસ્તથા

મેરુર્નૃત્યતિ લોલોચ્ચકુલાચલબૃહદ્ભુજઃ ।
ભ્રમદભ્રપટોપેતનમત્તનુતૂનૂરુહઃ

અત્યજન્તઃ સમુદ્રાશ્ચ મર્યાદામુદ્રણં દ્રુમાઃ ।
ભૂમેર્નભસ્તલં યાન્તિ નભસો યાન્તિ ભૂતલમ્

પુરાણિ ઘર્ઘરારાવૈર્દૃશ્યન્તે લુતિતાન્યધઃ ।
સગૃહાટ્ટાલવાસ્તવ્યં ન ચ કિંચિલ્લુઠત્યધઃ

તસ્યાં ભ્રમન્ત્યાં ચતુરં ચન્દ્રાર્કદિનરાત્રયઃ ।
નખાગ્રલેખાલોકાન્તર્ભ્રાન્તિકાઞ્ચનસૂત્રવત્

વિભાન્તિ સૃષ્ટયસ્તસ્યા ઘર્માણિ જલજાલિકાઃ ।
ઇવ નીહારહારિણ્યા નીલવારિદવાસસઃ

ખમેવ તસ્યાઃ સંપન્નં કબરીમણ્ડલં બૃહત્ ।
પાતાલં ચરણૌ ભૂમિરુદરં બાહવો દિશઃ

દ્વીપાબ્ધયોઽન્ત્રવલયઃ પાર્શ્વકાઃ સર્વપર્વતાઃ ।
પ્રાણાપાનાવલીદોલાઃ પવનસ્કન્ધશાલિકાઃ

તદાનુભૂત્ં નૃત્યન્ત્યાસ્તસ્યા વપુષિ વિસ્તૃતે ।
હિમવન્મેરુસ્રહ્યાદ્યૈર્દોલનભ્રમમદ્રિભિઃ

તરદદ્રિગુલુચ્છાસ્તા વલયન્ત્યા તયા સ્રજઃ ।
પુનઃ કલ્પાન્ત આરબ્ધ ઇવ તાણ્ડવહેલયા

સુરાસુરોરગાનીકરોમશાઙ્ગઃ શરીરકઃ ।
નિસ્પન્દં સ્થાતુમશકન્નસૌ ભ્રમતિ ચક્રવત્

નાનાવિભવવિજ્ઞાનયજ્ઞયજ્ઞોપવીતિની ।
સા સરન્તી નભસ્યાસીદ્ધનઘૂત્કારઘોષિણી

તત્ર ભૂતલમાકાશમાકાશમપિ ભૂતલમ્ ।
પ્રતિકૃતિં ભવત્યન્તર્ન ચ કિંચિદ્વિવર્તતે

બૃહન્નાસાગુહાગેહનિર્ગતા ઘનઘુંઘુમાઃ ।
તત્રોગ્રા વાયવો વાન્તિ ઘોરઘૂત્કારકારિણઃ

નભઃકરશતૈસ્તસ્યાશ્ચતુરાવૃત્તિવર્તિભિઃ ।
ભાતિ ચણ્ડાનિલોદ્ધૂતૈરાકીર્ણમિવ પલ્લવૈઃ

તદઙ્ગજજગદ્વસ્તુજાતભ્રમણસંભવાત્ ।
દૃષ્ટિર્ધીરાપિ મે મોહે સન્ના સેનેવ સંગરે

પ્રોહ્યન્તે યન્ત્રવચ્છૈલા નિપતન્તિ નભશ્ચરાઃ ।
લુઠન્ત્યમરગેહાનિ વલિતે દેહદર્પણે

મેરવઃ પર્ણવદ્વ્યૂઢા મલયાઃ પલ્લવા ઇવ ।
હિમાદ્રયો હિમકણા ઇવૌર્વ્યોઽબ્જલતા ઇવ

સહ્યા મહ્યામિવ ખગા વિન્ધ્યા વિદ્યાધરા ઇવ ।
વૃક્ષાવર્તે ભ્રમન્તોઽન્તા રાજહંસા ઇવામ્બરે

દ્વીપાન્યપિ તૃણાનીવ સમુદા વલયા ઇવ ।
સુરલોકાલયઃ પદ્મા આસંસ્તદ્દેહવારિણિ

વિશદાકાશસંકાશે સ્વપ્નાઞ્જનપુરોપમે ।
અઙ્ગે તસ્યા બૃહજ્જઙ્ઘે પિણ્ડાદિત્યસમત્વિષિ

વિન્ધ્યો નૃત્યતિ કાઞ્ચનાચલવને સહ્યશ્ચ સહ્યો ગિરિઃ
કૈલાસો મલયો મહેન્દ્રશિખરી ક્રૌઞ્ચાચલો મન્દરઃ ।
ગોકર્ણો ગગનાઙ્ગણે વસુમતી વિદ્યાધરાણાં પુરં
સર્વે જંગમતાં ગતા વનભુવસ્તસ્યાઃ શરીરે સદા

અબ્ધિર્નૃત્યતિ પર્વતે ગિરિરપિ પ્રોચ્ચૈર્નભઃકોટરે
વ્યોમાપીન્દુદિવાકરૈઃ ક્વ ચલિતં ભૂમેરધસ્તાદ્ગતમ્ ।
સદ્વીપાચલપત્તનો વનગણઃ પ્રોત્કીર્ણપુષ્પો દિવિ
વ્યાલોલં જગદમ્બુધાવિવ તૃણં દિક્ચક્રકે ભ્રામ્યતિ

વ્યોમ્નિ ભ્રમન્તિ ગિરયોઽમ્બુધયો દિગન્તે લોકાન્તરાણિ પુરપત્તનમણ્ડલાનિ ।
નદ્યઃ સરાંસિ મુકુરાન્તરિવ પ્રવૃદ્ધવાતાવકીર્ણતૃણવિક્રમણક્રમેણ

મત્સ્યાશ્ચરન્તિ ચ મરૌ વરવારિણીવ વ્યોમ્નિ સ્થિરાણિ નગરાણિ ભુવીવ ભાન્તિ ।
ખે ભૂધરા ગગનસંક્ષયવારિવાહમુત્પાતવાતપરિવૃત્તગિરિસ્થિતં તત્

ઋક્ષોત્કરો ભ્રમતિ દીપસહસ્રયન્ત્રચક્રક્રમેણ મણિવર્ષણવેગચારુઃ ।
અન્તર્બહિશ્ચ પરિતઃ પ્રણયેન મુક્ત વિદ્યાધરામરગણૈરિવ પુષ્પવર્ષમ્

સંહારસર્ગનિચયા દિનરાત્રિભાગે બિન્દૂપમા રજતયોર્દિવસોત્કરાશ્ચ ।
કૃષ્ણાઃ સિતાશ્ચ પરિતોઽમલશુક્લકૃષ્ણસ્વાદર્શમણ્ડલવદાકુલમુલ્લસન્તિ

રત્નાનિ ભાસ્કરનિશાકરમણ્ડલાનિ તારોત્કરાસ્તરલમણ્ડલકાન્તિહારાઃ ।
સ્વચ્છામ્બરાણિ વલિતાનિ મહામ્બરાણિ કુર્વન્ત્યનારતમનલ્પમલાતલેખાઃ

કલ્પાન્તકાલવિલુઠત્ત્રિજગન્મણીનિ વ્યાવર્તનૈર્ઝગિતિ જાતઝણજ્ઝણાનિ ।
તેજાંસિ ઝંકૃતતયોર્ધ્વમધશ્ચ યાન્તિ નાનાવિધાનિ ગુણવન્તિ વિભૂષણાનિ

સંગ્રામમત્તભટખઙ્ગમરીચિવીચિ શ્યામાયમાનસકલાતપવાસરાણામ્ ।
વ્યાવૃત્તિભિર્વિલુઠતામપિ સુસ્થિરાણામાકર્ણ્યતે કલકલો જનમણ્ડલાનામ્

બ્રહ્મેન્દ્રવિષ્ણુહરવહ્નિરવીન્દુપૂર્વા દેવાસુરાઃ પરિવિવૃત્તિભિરાપતન્તઃ ।
અન્યેઽન્ય એવ વિવિધા ઉપયાન્તિ યાન્તિ વાતાવધૂતમશકાશનિવિભ્રમેણ

સંહારસર્ગસુખદુઃખભવાભવેહા-નીહાનિષેધવિધિજન્મમૃતિભ્રમાદ્યાઃ ।
સાર્ધં પૃથક્ચ વિલસન્તિ સદૈવ સર્ગે વ્યામિશ્રતામુપગતા અપિ તત્ર ભાવાઃ

ભાવોદ્ભવસ્થિતિવિપત્કરણભ્રમાણાં સંહારસર્ગભુવનાવનિવિભ્રમાણામ્ ।
મિથ્યૈવ ખે પ્રકચતાં ખશરીરકાણાં સંલક્ષ્યતેઽત્ર ન મનાગપિ નામ સંખ્યા

ઉત્પાતશાન્તિમરણોત્સવયુદ્ધસામ્ય-વિદ્વેષરાગભયવિશ્વસનાદિ તત્ર ।
એકત્ર કોશ ઇવ રત્નચયો વિભાતિ નાનારસાપ્રતિઘસર્ગપરમ્પરં તત્

તસ્યાશ્ચિદમ્બરમયે વપુષિ સ્વભાવ-ભૂતાસ્ફુટાનુભવભાવજગદ્વ્યવસ્થાઃ ।
સર્વક્ષયા મલિનદૃક્કલિતામ્બરસ્થ- કેશોણ્ડ્રકસ્ફુરણવત્પરિતઃ સ્ફુરન્તિ

જગત્સંક્ષુબ્ધમક્ષુબ્ધં દૃશ્યતે સ્થિતિસંસ્થિતિ ।
સંચાલ્યમાનમુકુરપ્રતિબિમ્બ ઇવાસ્થિતમ્

નૃત્યસ્ફુરત્પ્રતાપાન્તર્જગદર્થાઃ પ્રતિક્ષણમ્ ।
સ્થિતિં ત્યજન્તિ ગૃહ્ણન્તિ બાલસંકલ્પસર્ગવત્

ક્રિયાશક્તિઃ શરીરેઽન્તઃ પૂર્યમાણા અનારતમ્ ।
રાશીભૂય વિશીર્યન્તે જગન્મુદ્ગકણોત્કરાઃ

ક્ષણમાલક્ષ્યતે કિંચિન્ન કિંચિદપિ સા ક્ષણમ્ ।
ક્ષણમઙ્ગુષ્ઠમાત્રૈવ ક્ષણમાકાશપૂરિણી

યસ્માત્સા સકલા દેવી સંવિચ્છક્તિર્જગન્મયી ।
અનન્તા પરમાકાશકોશશુદ્ધશરીરિણી

કાલત્રયસ્થિતજગત્ત્રિતયાન્તરી હિ ચિત્સા તથા કચતિ તેન યથાસ્થિતેન। ।
રૂપેણ ચિત્રકૃદુદારમનઃસ્થચિત્ર-સંસારજાલસદૃશેન કચજ્જવેન

સર્વાત્મકૈકવપુરેકચિદાત્મકત્વા-ત્સંશાન્તખૈકવપુરેકચિદાત્મતત્વાત્ ।
એવં નિમેષણસમુન્મિષિતૈકરૂપં સા બિભ્રતી વપુરનન્તમનાદિ ભાતિ

તસ્યાં વિભાતિ તદનન્તશિલાત્મકોશે લેખાબ્જચક્રરચનાદિવદેવ દૃશ્યમ્ ।
વ્યોમાત્મકં ગગનમાત્રશરીરવત્યાં ચિત્ત્વાદ્દ્રવજ્જલધિકોશ ઇવોર્મિલેખા

મહતી ભૈરવી દેવી નૃત્યન્ત્યાપૂરિતામ્બરા ।
તસ્ય કલ્પાન્તરુદ્રસ્ય સા પુરો ભૈરવાકૃતેઃ

શિરોમન્દાશ્રિતોગ્રાગ્નિદગ્ધસ્થાણુવનાવનિઃ ।
કલ્પાન્તવાતવ્યાધૂતા વનમાલેવ નૃત્યતિ

કુદ્દાલોલૂખલબૃસીફલકુમ્ભકરણ્ડકૈઃ ।
મુસલોદઞ્ચનસ્થાલીસ્તમ્ભૈઃ સ્રગ્દામધારિણી

એવંવિધાનાં સ્રગ્દામજાલાનાં કુસુમોત્કરમ્ ।
કિરન્તી સંસૃજન્તીવ નૃત્તક્ષુબ્ધં ક્ષયક્ષતમ્

વન્દ્યમાનસ્તયા સોઽપિ તથૈવાકાશભૈરવઃ ।
તથૈવ વિતતાકારસ્તદોચ્ચૈઃ પરિનૃત્યતિ

ડિંબં ડિબં સુડિંબઁ પચ પચ સહસાઝમ્ય ઝમ્યં પ્રઝમ્યં નૃત્યન્તી શબ્દવાદ્યૈઃ સ્રજમુરસિ શિરઃશેખરં તાર્ક્ષ્યપક્ષૈઃ ।
પૂર્ણં રક્તાસવાનાં યમમહિષમહાશૃઙ્ગમાદાય પાણૌ પાયાદ્વો વન્દ્યમાનઃ પ્રલયમુદિતયા ભૈરવઃ કાલરાત્ર્યા

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મો૦ નિર્વાણપ્રકરણે ઉ૦ પાષા૦ કાલરાત્રિવર્ણનં નામૈકાશીતિતમઃ સર્ગઃ