યોગવાસિષ્ઠ · શ્લોક 6.58-2

અષ્ટપઞ્ચાશઃ સર્ગઃ

અર્જુન ઉવાચ ।
નષ્ટો મોહઃ સ્મૃતિર્લબ્ધા ત્વત્પ્રસાદાન્મયાચ્યુત ।
સ્થિતોઽસ્મિ ગતસંદેહઃ કરિષ્યે વચનં તવ

શ્રીભગવાનુવાચ ।
વૃત્તયો યદિ બોધેન સંશાન્તા હૃદયે સ્ફુટમ્ ।
તચ્ચિત્તં શાન્તમેવાન્તર્વિદ્ધિ સત્ત્વમુપાગતમ્

અત્ર તચ્ચેત્યરહિતં પ્રત્યક્ચેતનનામકમ્ ।
યત્ત્વશેષવિનિર્મુક્તં યત્સર્વં સર્વતશ્ચ યત્

ન કેચન વિદન્ત્યેતે તત્પદં જાગતાદયઃ ।
ભૂતલાદ્ગગનોડ્ડીનં વિહંગમમિવોન્નતમ્

પ્રત્યક્ચેતનમાભાસં શુદ્ધં સંકલ્પવર્જિતમ્ ।
અગમ્યમેનમાત્માનં વિદ્ધિ દૂરં દૃશામિવ

સર્વાતીતં યદત્યચ્છં વિના શુદ્ધં સ્વવાસના ।
ન શક્નોતિ પદં દ્રષ્ટું જનદૃષ્ટિરણૂનિવ

યત્પ્રાપ્તૌ સર્વ એવેમે ક્ષીણા ઘટપટાદયઃ ।
વરાકી વાસના તત્ર કિં કરોતુ પરે પદે

યથાઽનલગિરિં પ્રાપ્ય હિમલેશો વિલીયતે ।
શુદ્ધમાસાદ્ય ચિત્તત્ત્વમવિદ્યા લીયતે તથા

ક્વ વરાકી રજસ્તુચ્છા વાસના ભોગબન્ધનમ્ ।
ક્વ પૂરિતજગજ્જાલશ્ચિત્તત્ત્વવિપુલાનિલઃ

તાવત્સ્ફુરત્યવિદ્યેયં નાનાકારવિકારિણી ।
યાવન્ન સંપરિજ્ઞાતઃ શુદ્ધઃ સ્વાત્માઽયમાત્મના

સર્વા દૃશ્યદૃશઃ ક્ષીણાઃ સ્વચ્છતૈવોદિતા તથા ।
નભસીવ પદે તસ્મિન્સ્વાત્મન્યખિલપૂરણે

સમગ્રાકારરૂપં તત્સમગ્રાકારવર્જિતમ્ ।
વાગતીતં પરં વસ્તુ કેન નામોપમીયતે

વિષયવિષવિષૂચિકામતસ્ત્વં
નિપુણમહંસ્થિતિવાસનામપાસ્ય ।
અભિમતપરિહારમન્ત્રયુક્ત્યા
ભવ વિભવો ભગવાન્ભિયામભૂમિઃ

શ્રીવસિષ્ઠ ઉવાચ ।
ઇતિ ગદિતવતિ ત્રિલોકનાથે
ક્ષણમિવ મૌનમુપસ્થિતે પુરસ્તાત્ ।
અથ મધુપ ઇવાઽસિતાબ્જખણ્ડે
વચનમુપૈષ્યતિ તત્ર પાણ્ડુપુત્રઃ

અર્જુન ઉવાચ ।
પરિગલિતસમસ્તશોકભારા
પરમુદયં ભગવન્મતિર્ગતેયમ્ ।
મમ તવ વચનેન લોકભર્તુ-
ર્દિનપતિના પરિબોધિતાબ્જિનીવ

ઇત્યુક્ત્વોત્થાય ગાણ્ડીવધન્વા સ હરિસારથિઃ ।
અર્જુનો ગતસંદેહો રણલીલાં કરિષ્યતિ

કરિષ્યતિ ક્ષતગજવાજિસારથિ-
દ્રુતક્ષરદ્રુધિરમહાનદીં ભુવમ્ ।
શરોત્કરપ્રસરમહારજઃસ્થલી-
તિરોહિતદ્યુમણિવિલોચનાં દિવમ્

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મો૦ નિર્વાણપ્રકરણે પૂ૦ અર્જુનોપાખ્યાને અર્જુનકૃતાર્થતા નામાષ્ટપઞ્ચાશઃ સર્ગઃ