યોગવાસિષ્ઠ · અધ્યાય 6.17

સપ્તદશઃ સર્ગઃ

શ્રીવસિષ્ઠ ઉવાચ ।
અનહંવેદનાદેવં શુભાશુભફલપ્રદા ।
સંસારફલિની નૂનમિચ્છાન્તરુપશામ્યતિ

અનહંવેદનાભ્યાસાત્સમલોષ્ટાશ્મકાઞ્ચનઃ ।
ભૂત્વા શાન્તભવાપીડો ન નરઃ પરિતામ્યતિ

અહંતાપુટકોડ્ડીનપરબોધબલેરિતઃ ।
અહમિત્યર્થપાષાણો ન જાને ક્વાશુ ગચ્છતિ

અહંતાપુટકોડ્ડીનો બ્રહ્મવીરબલેરિતઃ ।
અહમિત્યર્થપાષાણો ન જાને ક્વાશુ ગચ્છતિ

અહંતાપુટકોડ્ડીનો બ્રહ્મવીરબલેરિતઃ ।
શરીરયન્ત્રપાષાણો ન જાને ક્વાશુ ગચ્છતિ

અહમર્થહિમં ત્વન્તરનહંતા ચિદર્ચિષા ।
ઉડ્ડીયેવ વિલીનં સન્ન જાને ક્વાશુ ગચ્છતિ

અહંરસો વિલીનોન્તરનહંતાચિદર્ચિષા ।
શરીરપર્ણાદુદ્વર્ણાન્ન જાને ક્વાશુ ગચ્છતિ

શરીરપર્ણાન્નિષ્પીતસ્ત્વહંભાવરસાસવઃ ।
અનહંતાર્કમાર્ગેણ પરતામધિગચ્છતિ

શયને કર્દમે શૈલે ગૃહે વ્યોમ્નિ સ્થલે જલે ।
સ્થૂલા સૂક્ષ્મા નિરાકારા રૂપાન્તરગતાપિ ચ

યત્ર તત્ર સ્થિતા સુપ્તા પ્રબુદ્ધા ભસ્મતાં ગતા ॥
ધૃતા નીતા નિમગ્ના ચ દૂરસ્થા નિકટા સતી

શરીરવટધાનાન્તઃસ્થિતાહંત્વનવાંકુરા ।
શાસ્ત્રાજાલં તનોત્યાશુ સંસારાખ્યમિદં ક્ષણાત્

અહંત્વવટધાનાન્તઃસ્થિતદેહબૃહદ્દ્રુમઃ ।
સંસારશાખાનિવહં યત્ર તત્ર તનોત્યલમ્

શાખાશતેદ્ધદલપુષ્પફલદ્રુમોઽસ્તિ
બીજોદરે નનુ દૃશા પરિદૃશ્યતેઽસૌ ।
દેહોઽસ્ત્યહંત્વકણિકાન્તરશેષદૃશ્ય-
સંવિત્પરીત ઇતિ બુદ્ધિદૃશૈવ દૃષ્ટમ્

દેહાદહંત્વમનવાપ્તવતો વિચારૈ-
શ્ચિદ્વ્યોમમાત્રવપુષો વપુષોઽથ વોચ્ચૈઃ ।
નાહંત્વબીજજઠરાદસતોઽભ્યુદેતિ
સંસારવૃક્ષ ઇહ બોધમહાગ્નિદગ્ધાત્

ઇત્યાર્ષે શ્રીવાસિષ્ઠમહારામાયણે વાલ્મી૦ દે૦ મોક્ષો૦ નિર્વાણપ્રકરણે ઉ૦ અહંત્વાસત્તાયોગોપદેશો નામ સપ્તદશઃ સર્ગઃ