યોગવાસિષ્ઠ · અધ્યાય 5.69

એકોનસપ્તતિતમઃ સર્ગઃ

શ્રીવસિષ્ઠ ઉવાચ ।
સર્વદા સર્વસંસ્થેન સર્વેણ સહ તિષ્ઠતા ।
સર્વકર્મરતેનાપિ મનઃ કાર્યં વિજાનતા

ન સક્તમિહ ચેષ્ટાસુ ન ચિન્તાસુ ન વસ્તુષુ ।
નાકાશે નાપ્યધો નાગ્રે ન દિક્ષુ ન લતાસુ ચ

ન બહિર્વિપુલાભોગે ન ચૈવેન્દ્રિયવૃત્તિષુ ।
નાભ્યન્તરે ન ચ પ્રાણે ન મૂર્ધનિ ન તાલુનિ

ન ભ્રૂમધ્યે ન નાસાન્તે ન મુખે ન ચ તારકે ।
નાન્ધકારે ન ચાભાસે ન ચાસ્મિન્હૃદયામ્બરે

ન જાગ્રતિ ન ચ સ્વપ્ને ન સુષુપ્તે ન નિર્મલે ।
નાસિતે ન ચ વા પીતરક્તાદૌ શબલે ન ચ

ન ચલે ન સ્થિરે નાદૌ ન મધ્યે નેતરત્ર ચ ।
ન દૂરે નાન્તિકે નાગ્રે ન પદાર્થે ન ચાત્મનિ

ન શબ્દસ્પર્શરૂપેષુ ન મોહાનન્દવૃત્તિષુ ।
ન ગમાગમચેષ્ટાસુ ન કાલકલનાસુ ચ

કેવલં ચિતિ વિશ્રમ્ય કિંચિચ્ચેત્યાવલમ્બિનિ ।
સર્વત્ર નીરસમિવ તિષ્ઠત્વાત્મરસં મનઃ

તત્રસ્થો વિગતાસઙ્ગો જીવોઽજીવત્વમાગતઃ ।
વ્યવહારમિમં સર્વં મા કરોતુ કરોતુ વા

અકુર્વન્નપિ કુર્વાણો જીવઃ સ્વાત્મરતિઃ ક્રિયાઃ ।
ક્રિયાફલૈર્ન સંબન્ધમાયાતિ ખમિવામ્બુદૈઃ

અથવા તમપિ ત્યક્ત્વા ચેત્યાંશં શાન્તચિદ્ધનઃ ।
જીવસ્તિષ્ઠતુ સંશાન્તો જ્વલન્મણિરિવાત્મનિ

નિર્વાણમાત્મનિ ગતઃ સતતોદિતાત્મા
જીવોઽરુચિર્વ્યવહરન્નપિ રામભદ્ર ।
નો સઙ્ગમેતિ ગતસઙ્ગતયા ફલેન
કર્મોદ્ભવેન સહતીવ ચ દેહભારમ્

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મોક્ષોપાયેષૂપશમપ્રકરણે શાન્તિસમાયાતયોગોપદેશો નામૈકોનસપ્તતિતમઃ સર્ગઃ