યોગવાસિષ્ઠ · અધ્યાય 4.58

અષ્ટપઞ્ચાશઃ સર્ગઃ

શ્રીવસિષ્ઠ ઉવાચ ।
અત્રૈવ વસ્તુન્યુદિતા શ્રૃણુ રાઘવ પૂર્વજાઃ ।
કચેન ગાથા યા ગીતા બાર્હસ્પત્યેન પાવનાઃ

કસ્મિંશ્ચિન્મેરુગહનેઽતિષ્ઠન્સુરગુરોઃ સુતઃ ।
કદાચિદભ્યાસવશાદ્વિશ્રાન્તિં પ્રાપ ચાત્મનિ

સમ્યગ્જ્ઞાનામૃતાપૂર્ણા મતિર્નારમતાસ્ય સા ।
પઞ્ચભૂતમયેઽમાન્યે દૃશ્યેઽસ્મિન્પેલવાત્મનિ

સ તેન નિર્વિણ્ણ ઇવ સદાત્મત્વાદૃતે પદમ્ ।
અપશ્યન્સમુવાચેદમેકો ગદ્ગદયા ગિરા

કિં કરોમિ ક્વ ગચ્છામિ કિં ગૃહ્ણામિ ત્યજામિ કિમ્।
આત્મના પૂરિતં વિશ્વં મહાકલ્પામ્બુના યથા

દુઃખમાત્મા સુખં ચૈવ ખમાશાસુમહત્તયા ।
સર્વમાત્મમયં જ્ઞાતં નષ્ટકષ્ટોઽહમાત્મના

સબાહ્યાભ્યન્તરે દેહે અધશ્ચોર્ધ્વં ચ દિક્ષુ ચ ।
ઇત આત્મા તતશ્ચાત્મા નાસ્ત્યનાત્મમયં ક્વચિત્

સર્વત્રૈવ સ્થિતો હ્યાત્મા સર્વમાત્મમયં સ્થિતમ્ ।
સર્વમેવેદમાત્મૈવમાત્મન્યેવ ભવામ્યહમ્

યન્નામ નામ તત્કિંચિત્સર્વમેવાહમાન્તરઃ ।θ
આપૂરિતાપારનભાઃ સર્વત્ર સન્મયઃ સ્થિતઃ

પૂર્ણસ્તિષ્ઠામિ મોદાત્મા સુખમેકાર્ણવોપમઃ ।
ઇત્યેવં ભાવયંસ્તત્ર કનકાચલકુઞ્જકે

ઉચ્ચારયન્નોઙ્કારં ચ ઘણ્ટાસ્વનમિવ ક્રમાત્ ।
ઓંકારસ્ય કલામાત્રં પાશ્ચાત્યં વાલકોમલમ્ ।
નાન્તરસ્થો ન બાહ્યસ્થો ભાવયન્પરમે હૃદિ

વ્યપગતકલનાકલઙ્કશુદ્ધો
હૃદયનિરન્તરલીનવાતવૃત્તિઃ ।
ગતઘનશરદાશયોપમાનઃ
સ્થિત ઇતિ રામ કચઃ સ ગાયમાનઃ

ઇત્યાર્ષે શ્રીવાસિષ્ઠમહારામાયણે વાલ્મીકીયે મો૦ સ્થિતિપ્રકરણે કચગાથાનામાષ્ટપઞ્ચાશઃ સર્ગઃ