યશોધરાચરિત · શ્લોક 21-40

પ્રમોદમ્ આપાદયિતું સુરેશ્વરાંશ્
ચકાર ઘણ્ટાનિનદં ચ ભૂસુરાન્ ।
અજીજપદ્ દેવગિરા ચ સંસ્તવાન્
નનામ ભૂમાવ્ અસકૃત્ નિપત્ય સા

પુરે વને સંવસથે ઽપિ વલ્લભો
વસેદ્ ધિ કસ્મિન્ન્ ઇતિ દિવ્યાચક્ષુષા ।
વિલોક્ય ગેહં વિનિવર્તયન્તુ તં
દિવૌકસઃ પ્રાર્થયતૈવ સા પુનઃ

નિરીક્ષ્ય જિહ્માનિમિષેણ ચક્ષુષા
નિહત્ય ગાઢં ચરણં ભુવસ્ તલે ।
મુહુર્ મુહુર્ દંશિતકોમલાધરા
પ્રકર્ષમ્ ઉત્ક્ષિપ્ય વિકમ્પ્ય તર્જનીમ્

અરે-ત્વયાર્યસ્ય ગૃહાભિનિષ્ક્રમઃ
શ્રુતો ન દૃષ્ટઃ વદ કિં નિરાકુલમ્ ।
ઇતિ પ્રતીહારભટં રુષોચ્ચકૈ
રવેણ પપ્રચ્છ સબાષ્પલોચના

ભવાન્ સ આર્યે નૃપવંશશેખરો
મયા ન દૃષ્ટઃ પ્રતિહારમ્ આગતઃ ।
વરાઙ્ગનાભિઃ સહ કેલિકાનને
ગતે નિશીથે ઽરમતેતિ મે શ્રુતમ્

અવીતરાગો નનુ રાજનન્દનો
વવાઞ્છ તસ્માન્ નનુ નૂતનપ્રિયામ્ ।
મિથઃ સ કાં ચિત્ પરિણીય નાટિકાં
બહિર્ ગતો ઽદ્ધેતિ વિતર્કયામ્ય્ અહમ્

પુરા હિ મન્ધાત્વભિધો મહાયશાઃ
સ સાર્વભૌમો ઽપિ સુરાઙ્ગનાગણે ।
કૃતાનુરાગો પરિવર્જ્ય માનુષીં
શ્રિયં પ્રપેદે નુ દિવૌકસાં પુરમ્

મનોઽભિરામં સુરસુન્દરીગણં
વિહાય વિન્ધ્યાવનતાપસાશ્રમે ।
અગસ્તિપત્નીં પરિરભ્ય તાપસીં
લલાસ રન્તું નિશિ પાકશાસનઃ

પ્રતીતલઙ્કાવિજિતે ઽગ્રભૂપતિર્
દશાનનો દણ્ડકકાનનં ગતઃ ।
વિગૃહ્ય સીતાં જનકાત્મજામ્ અપિ
નિજપ્રિયાવદ્ વ્યદધાત્ તદાત્મસાત્

મહેશ્વરશ્ ચાપિ પુરા તપશ્ ચરન્ન્
ઉમામહિષ્યા સહ કલિકાનને ।
અપાસ્ય સાતત્યસમાધિભાવનં
વ્યરીરમચ્ ચાજનયત્ સુતૌ નનુ

શુચાકુલાં સાન્ત્વયિતું વધૂત્તમામ્
ઇતિ પ્રતીહાર ઉરઃસ્થલે ઽઞ્જલિમ્ ।
વિધાય વલ્ગુધ્વનિનાનુકમ્પયા
નતેન મૂર્ધ્ના વચસા વ્યજિજ્ઞપત્

અરે-ત્વમ્ એતર્હિ ભવન્તમ્ ઉત્તમં
ગૃહે બહિર્ વોપવને ઽપિ કુત્ર ચિત્ ।
અહર્મુખે કિં નિશિ વા દદર્શિથ
વ્યપૃચ્છદ્ ઇત્થં નિજસેવિકાં રુષા

નિધાય વામેતરજાનુમણ્ડલં
ક્ષિતૌ ભુજૌ ચાપિ લલાટમસ્તકે ।
નતાર્ધકાયં નિજગાદ સેવિકા
શ્રુતં ચ દૃષ્ટં ન ન વેદ્મિ કિં ચન

અતઃ-પરં હર્મ્યમ્ ઉપેયુષી સતી
પ્રમાર્જ્ય નિસ્યન્દજલં વિલોચને ।
અરે-કિમ્ આર્યો ઽત્ર સમાગતો ન વા
વ્યપૃચ્છદ્ અન્તઃપુરપાલપણ્ડકમ્

પ્રશસ્યરૂપેણ ગિરા ચ વલ્ગુના
શ્રિયા ઽપિ ધૃત્યા તવ કક્ષમ્ આગતાઃ ।
મહોત્તમે સર્વજનેન માનિતા
ભવન્તિ તસ્ય ત્રિતયાઃ પ્રિયાઙ્ગનાઃ

મનોઽભિરામા ભવતી ચ ભારતી
તથૈવ લક્ષ્મીર્ ઇતિ તાઃ પ્રિયાઙ્ગનાઃ ।
સદૈવ તાભી રમતે કુમારકઃ
કદા ચિદ્ અન્યત્ર મનો ઽસ્ય નો રજેત્

જુગુપ્સિતે સત્પુરુષૈર્ મનસ્વિભિઃ
સદોષકામે વિમુખો નુ તે પતિઃ ।
તતો ઽસ્ય શુદ્ધાન્તગતિઃ કદા ચન
શ્રુતા ન દૃષ્ટા ન દિવા વા નિશિ

તપોધનાનાં સમતામ્ ઉપેયિવાન્
રતિં ન કુર્યાત્ સ ભવત્રયે ક્વ ચિત્ ।
અમેધ્યગેહેન સમે ઽવરોધને
કથં વિધત્તે રતિમ્ એષ તે પતિઃ

અસાધ્યરોગાયતને સુખેતરે
બુભુક્ષયા નિત્યનિપીડિતોદરે ।
અતર્પણીયે વિવિધાન્નપાનકૈઃ
સ્પૃહાં ન દેહે પ્રકરોતિ પણ્ડિતઃ

વિકીર્ણઘર્મોદકવિપ્રુષિ ત્વચિ
વિચિત્રવર્ણં શમલેન સંસ્કૃતે ।
શરીર આલોક્ય જનો વિનશ્યતે
પતઙ્ગવદ્ દીપશિખોજ્જ્વલપ્રભામ્