યશોધરાચરિત · શ્લોક 41-55

તતો નૃપાન્તઃપુરપાલકોદિતે
કૃતાવધાના વચને યશોધરા ।
દિવૌકસાં નન્દનકાનનોપમં
જગામ રાજોપવનં ચલાત્મના

અથાભિરામોપવનસ્ય રક્ષકઃ
પુરઃ પ્રગમ્યોરસિ બદ્ધપાણિના ।
કિમર્થમ્ આર્યે ઽત્ર સમાગતિસ્ તવ
ભવામિ જિજ્ઞાસુર્ ઇતિ ન્યવેદયત્

સખે મમાર્યો રહસારુણોદયે
સમાગતો વાત્ર ન કિં સમાગતઃ ।
કિમ્ અત્ર દૃષ્ટઃ સ ન વા શ્રુતસ્ ત્વયા
વિચિન્ત્ય સમ્યગ્ વદ માં યથાતથમ્

ગતસ્પૃહઃ પઞ્ચસુ કામવસ્તુષુ
સ આર્યપુત્રો વિજિતેન્દ્રિયો ભવેત્ ।
તતો ઽભિરામોપવનં સમાગમો
ન દૃષ્ટ આર્યે ન હિ વા શ્રુતો મયા

વિધિત્સમાનો ઽભ્યુદયં જગત્ત્રયે
દિવૌકસાનામ્ અધિગમ્ય યાચનમ્ ।
દિવો ઽવતીર્ણો નનુ પુણ્યતેજસા
મનુષ્યજન્મન્ય્ અજનિષ્ટ સ પ્રભુઃ

મહામહે સત્ય્ અસિતર્ષિર્ ઈયિવાન્
દિવં કિમ્ ઇત્ય્ અસ્ય વિમૃશ્ય કારણમ્ ।
સ્વમિત્રશુદ્ધોદનભૂપતેઃ સુતો
ઽજનીતિ હર્ષાત્ તમ્ અવેક્ષિતું યયૌ

તતો ઽસિતર્ષિર્ નૃપસૌધમ્ આગતઃ
કુમારકં વીક્ષ્ય સપુણ્યસમ્પદમ્ ।
અતીન્દ્રિયજ્ઞાનમયેન ચક્ષુષા
પરીક્ષમાણો ઽસ્ય શરીરલક્ષણમ્

જગાદ વાક્યં શિશુર્ એષ પુણ્યવાન્
ભવેદ્ ધિ બુદ્ધો હતમારબન્ધનઃ ।
પ્રતારયેત્ સર્વનરામરાસુરાન્
અપારસંસારમહાર્ણવાદ્ ઇતિ

દ્વિજેષુ પઞ્ચસ્વ્ અથ દેહલક્ષણં
પરીક્ષ્ય કૌણ્ડણ્યબુધો ઽબ્રવીદ્ ઇતિ ।
વિનશ્ય તૃષ્ણાદિમલાન્ય્ અયં શિશુર્
અનુત્તરં બુદ્ધપદં ગમિષ્યતિ

તદા પ્રસૂતક્ષણ એવ લુમ્બિની-
વને સ સપ્તામ્બુજમૂર્ધ્ન્ય્ અભિવ્રજન્ ।
અભીતનાદં ન્યનદજ્ જગત્ત્રયે
ભવેયમ્ અગ્રસ્ ત્વ્ ઇતિ સિંહપોતવત્

ભ્રમદ્દ્વિરેફશ્રુતિરમ્યનિસ્વનઃ
સુગન્ધિનઃ પુષ્પપરાગરાશિના ।
તરંગિણીશીકરમિશ્રમારુતો
વવૌ સમન્તાદ્ વિપિને શનૈઃ તદા

મહાત્મનસ્ તસ્ય પરાર્ધ્યજન્મનિ
વસુંધરાયા નિધયઃ સમુદ્ગતાઃ ।
ધરાઙ્ગના તર્હ્ય્ અતિમાત્રમોદિતા
સવિસ્મયાં સિદ્ધિમ્ અદર્શયદ્ ભુવિ

તતઃ પરં લુમ્બિનિકાનનાદ્ ગૃહં
વિચિત્રજામ્બૂનદબિમ્બસંનિભમ્ ।
કુમારકં તૌ પિતરૌ સવત્સલૌ
સબન્ધુવર્ગં પરિવાર્ય નિન્યતુઃ

ગુરુપ્રદિષ્ટં વિધિવદ્ ગુરુપ્રિયઃ
સમસ્તવિદ્યાસમયં ચ દર્શનમ્ ।
ભવે ભવે સંચિતપુણ્યતેજસા
સમધ્યગીષ્ટાચિરમ્ એષ બુદ્ધિમા

શ્રુતેન ધૃત્યા નવયૌવનશ્રિયમ્
ઉપેયુષો ઽસ્યાર્યસુતસ્ય જન્મનઃ ।
સહ ત્વયા ષોડશમે હિ હાયને
વિવાહદીક્ષાં વિધિવચ્ ચકાર નુ