વૃત્તમાલાસ્તુતિ · શ્લોક 61-80

પ્રવિકિરતીવ વિયત્તરઙ્ગિણી તરલતરઙ્ગરુચો રુચાં ચયાન્
વિલસતિ શશ્વદ્ અસિર્ દશાન્તરે તવ યમુના જલવીચિમેચકઃ ॥

*મનોહારિહારાવલીરમ્યરૂપં ક્વ નાથેદૃશં તે સુરૂપાધિરાજ
ક્વ તચ્ ચાતિદુર્દાન્તસત્ત્વપ્રશાન્ત્યૈ સ્ફુરદ્ભીમભૂષા ભુજઙ્ગપ્રયાતમ્ * ॥

અવિરલમૌક્તિકપ્રકરભૂષા હરતિ ન કસ્ય ચિત્તમ્ ઇયમ્ ઈશ
સુરુચિરમલ્લિકાસમયસેવ્ય પ્રતિ નવમાલિની વ તવ મૂર્તિઃ ॥

તવ નાથ પરં યદિ કાન્તિસુધા જલધૌ શ્રમમ્ ઉજ્ઝતિ ઝાત્કૃતિનિ
શુભરૂપનિરૂપણલમ્પટકં પરિ તો ઽટકમ્ અઙ્ગ જગન્નયનમ્ ॥

વરદ વિરતિભાઞ્જિ વ્યક્તમ્ અઙ્ગાન્ય્ અતિભવ ભવિતા નો ઽવશ્યમ્ એવ
તવ વચનસુધાયાઃ પાનપાત્રં શ્રવણયુગ પુટો ઽયં પ્રીતિહેતુઃ ॥

વૃણે વરમ્ ઇમં ત્વદ્ એકમ્ અતુલ પ્રભાવ ભવતાન્ ન માદૃશજનઃ
ભવન્તમ્ અપિ યહ્ શ્રયઞ્ છમસુધા રસેષુ વિરતિર્ જડોદ્ધતગતિઃ ॥

ત્વત્પ્રસાદસમુદીર્ણશુભવશાદ્ અષ્ટભેદિ સુખમ્ એવ કૃતિજનઃ
લોચનોત્સવવિધાસુ તનુભૃતાં ચન્દ્ર વર્ત્મ સમુપૈતિ ભવભિદામ્ ॥

સુખદુઃખાતિશયાદિહેતુજાતૈર્ અવિલુપ્તસ્મૃતયો ભવન્તિ ભવ્યાઃ
તવ પાદાશ્રયલબ્ધબુદ્ધિસારાઃ સ કલા યામ્ અપિ વાદિરા જ ગત્યામ્ ॥

તવ ચરણપરિચરણરુચીનાં કિમ્ અપિ સુખમ્ ઉદયતિ કૃતિરૂપમ્
નિખિલમલપટલવિગમદીપ્રં પ્રથિતગુણ મહિતમતિ જગત્યામ્ ॥

કલધૌતકાન્તવપુર્ ઉત્તમલીલઃ પટુભારતીવરટયા વરિવસ્યઃ
ઇહ મઞ્જુઘોષ ઇતિ વઃ પ્રથિતો વ્યાજ્ જિનમાનસૈકનલિની કલહંસઃ ॥

વિચ્છેદસ્ ત્રિષુ યદિ દુઃસહેષ્વ્ અમીષુ ક્લેશેષુ સ્ફુટમ્ અણુશો ઽપિ દુષ્કરઃ સ્યાત્
પ્રાપ્યેત ક્વ નુ ખલુ નાથ મૂર્તિર્ ઈદૃક્ ત્રૈલોકીનયનમનઃ પ્રહર્ષિણી હ ॥

પયોનિધૌ વિરતિમ્ અપાં વિધાય ચ સ્ફુરન્મહાકિરણકલાપરત્નધૌ
ભવાદૃશાં વપુષિ ચ કાન્તિસંતતિઃ સમીક્ષ્યતે યદિ રુચિરે યમ્ ઈદૃશી ॥

મન્દ્રધ્વાનૈર્ યામૃતધારાસ્ ત્વયિ રમ્યા મુઞ્ચત્ય્ ઉચ્ચૈર્ વિસ્ફુરતિ પ્રીણિતભવ્યે
નાથાન્વેતિ વ્યક્તતયાત્યન્તમનોજ્ઞં વર્ષામ્ભોદં સૈવ યતિર્ મત્તમયૂરમ્ ॥

જયતીયમ્ ઉત્પલતરોર્ અનુત્તર ત્રિજગત્પ્રમોદજનને મધાવ્ ઇવ
ત્વયિ નેત્રકાન્ત કુસુમોદ્ગતા લતા મધુમત્તભૃઙ્ગરવ મઞ્જુભાષિણી ॥

સર્વાતિશાયિગુણનિર્ભરલબ્ધમોદૈર્ વિદ્વન્મધુવ્રતકુલૈર્ ઉપગીયમાનમ્
મન્યામહે જિનનયાભરણં તવૈવ વૃત્તં વસન્તતિલકં નવચૂતમ્ એવ ॥

સંમુખવલન્મુખમૃગાધિપતિપૃષ્ઠા રૂઢમ્ અતિગાઢદયમ્ અભ્યુદયકન્દમ્
સુન્દરિમબન્ધુરિતહેમહિમપાદં વાદિકુલ દૈવતમ્ અમન્દમ્ અભિવન્દે ॥

પ્રશમિતસકલપ્રપઞ્ચનિરાવૃતિ પ્રસરદમલધીસમાધિસુધાજુષઃ
દમયતિ ભવતો હતાહિતવિક્રમા મુનિયતિર્ અપરાજિતા ભુવનત્રયમ્ ॥

પ્રતિભયવપુષામ્ અકરુણચરિત પ્રશમનવિધયે ક્વ ચિદ્ અપિ કૃપયા
તવ ભુજપરિઘાવલિર્ અતિવિષમા વિલસતિ વિવિધ પ્રહરણકલિકા ॥

શ્રેયઃસંભોગં વિષયવિરતિમ્ અવ્યગ્રાં મારપ્રધ્વંસં ત્રિભુવનહિતસંપત્તિમ્
દુષ્પ્રાપાહાર્યં પદમ્ અભિલષતાં તચ્ ચ ત્વદ્ભક્તેર્ અન્યા વરદ ન દિગ્ અસંબાધા ॥

ભવતઃ કલાં કિમ્ અપિ સંયતૈર્ ઇન્દ્રિયૈઃ ક્વ ચિદ્ આદરસ્તિમિતધીર્ યદિ ધ્યાયતિ
અચિરાત્ સ્વયં વરયતીયમ્ એનં જનં વસુધા ધ્રુવં જલધિશક્વરીભૂષણા ॥