વૃત્તમાલાસ્તુતિ · શ્લોક 121-140

પ્રવિકચકનકપઙ્કેજસૌભાગ્યભા ગઙ્ગ દત્તેન ભાવાશ્રિતેભ્યસ્ તમઃસુ ત્રિભુવનશમવિધાનાય નિર્વાણનીવૃત્ તમાલાકૃતા વ્ આત્તભક્તે ભવારૌ
દશબલતનયવર્ગાગ્રિમેણ ત્વયા નાથ નિર્માથિદુઃખાપહેન સ્તુતેન પ્રચિત ઇતિ શુભરાશિર્ મહાન્ યસ્ તતઃ સ્તાજ્ જનૌઘે સમૃદ્ધિઃ સમગ્રે ઽપિ સૈવ ॥

અહમ્ અપિ તવ પાદપદ્માભિસંરાધનાધીનધીસંનિરુદ્ધાન્તરધ્વાન્તજાતઃ સમધિગતસમસ્તવસ્તૂત્કરવ્યાપિનૈસર્ગિકસ્વપ્નમાયામયાદ્વૈતતત્ત્વઃ
અકરુણકરુણાબલાવાર્યવીર્યોદયારબ્ધનાનાવિધવ્યાપૃતિવ્યસ્તમારસ્ ત્રિજગતિ પરમોપકારૈકકૃત્ય પ્રવૃત્તશ્ ચરેયં જનો યાવદ્ એકો ઽપ્ય્ અમુક્તઃ ॥

સ્ફારફુલ્લસ્થલામ્ભોજનિર્ભાસભૃટ્પાદપીઠાન્તવિશ્રાન્તકાન્તામરવ્યાલદૈત્યેન્દ્રચૂલોપલાર્ચિશ્ચયો દુઃસહોદ્દામદુઃખાનલગ્રસ્તપર્યસ્તશક્તિત્રિલોકીવિશોકીક્રિયાનિર્વિરામશ્રમાશ્ચર્યચર્યાનિધિઃ
શુદ્ધસંબુદ્ધવંશાવતંસપ્રકાશસ્ફુરત્કીર્તિકિર્ણાન્તરાલપ્રસારઃ કુમારો જયત્ય્ એષ વાગીશ્વરઃ સર્વદુર્વારમારપ્રવીરધ્વજિન્યુદ્ધવધ્વંસબદ્ધાભિરામા સમપ્રૌઢિનિર્વ્યૂઢગાઢ પ્રતાપોદયઃ ॥

પ્રૌઢવરવજ્રવનિતાઙ્ગપરિરમ્ભવિલસત્પુલકજાલકજગજ્જયતનુત્રં સાન્દ્રસવસાસ્રમધુપાનમદમુક્તવિકટાટ્ટહસિતત્રસદશેષસુરદૈત્યમ્
ગાઢવિનિગૂઢદયવિસ્મયમયાપ્રતિમરૌદ્રતનુમ્ અદ્વયમહાર્ણવનિમગ્નં શુદ્ધગુણધામ કરુણાબલમ્ ઉદારનવનાટ્યરસવલ્ લલિત વૃત્તમ્ અભિવન્દે ॥

ઇદમ્ અર્ધમ્ અબાલશશિપ્રભં બાલરવિપ્રભમ્ આદધદ્ અર્ધમ્
કરુણાવશવર્તિ ભવદ્વપુઃ કસ્ય મનો ન કરોત્ય્ ઉપચિત્રમ્ ॥

તત્ત્વસુધારસતૃપ્તિવિશેષાત્ સકલસમીહિતસિદ્ધિવશાદ્ વા
ત્વચ્ચરણાનુભુવા ભવિતવ્યં ભવમથનશ્રુત ન દ્રુતમ્ અધ્યા ॥

કિમ્ ઉશન્તિ બુધા અધિકં વિભો યદિ જનીય તદીયતનુર્ ભવેત્
તવ દૃષ્ટિસુધારસધારયા સ્ફુરિતહારરુચા હરિણપ્લુતા ॥

ઇયમ્ ઉરુકરુણારસા મુખશ્રીઃ સમધિગતા નિજધીશ્રિયો રસેન
સ્ફુરદધરદલાભિહારિહેમા મ્બુજકલિકેવ વિભાતિ પુષ્પિતાગ્રા ॥

મુખમ્ ઇદમ્ અપરં તવોત્પલ પ્રકરરુચામ્ ઇવ ભાતિ સંચયઃ
સમુદિતમ્ ઇવ કૈરવશ્રિયા હરતિ મનો ઽ પરવક્ત્રમ્ ઇવ ॥

ઇદમ્ અર્ધસમં સમીક્ષ્યતે તે બત વૃત્તં જયિનો જગત્ત્રયસ્ય
ક્વ ચિદ્ અર્થવિધૌ વિધૂતવિશ્વા શિશુલીલા લલિતાપિ યત્ તવેયમ્ ॥

પદમ્ એકમ્ અવેક્ષ્ય તે ક્ષણં પ્રસભાક્રાન્ત જગત્ત્રયીશિખમ્
કથમ્ અસ્તુ ન વિશ્વભારતી નિજદાસીવ તવ પ્રિયંવદા ॥

સ્વરસોપનતાં શમશય્યાં કિં નુ વિધૂય ધિયો ઽપ્ય્ અતિદુર્ગૈઃ
અતિચિત્રચરિત્રશતૈસ્ તે વેગવતી કરુણા યદિ ન સ્યાત્ ॥

સર્વાતિશયસ્ય ધામ ધામ્નઃ સર્વાઙ્ગીણસુલક્ષ્યલક્ષણશ્રીઃ
લોકસ્ય ગતાપિ હિ સ્મૃતિં તે ભદ્રં ભદ્રવિરાટ્ તનુસ્ તનોતિ ॥

પરિતઃ સ્ફુરદ્ભિર્ અભિરામૈર્ અંશુમયૈઃ પરાર્થપરમાર્થૈઃ
પવિપદ્મખડ્ગમણિચક્રૈઃ કેતુમતી વિભાતિ તવ મૂર્તિઃ ॥

ચૈત્તમાત્રભાવભાજિ ભાવ્યતે ક્વ પરા પરાર્થસંપદ્ ઈદૃશી દયાયામ્
સેયમ્ એતદાકૃતિચ્છલાદ્ અતો ઽવ યવધ્વનેર્ મતુપ્સ્ત્રિયા સમાભિધાના ॥

ઉદયદરુણકિરણનિકરપરિકર કનકમયવિમલહિમકરજયની
જયતિ નિખિલજગદભિરતિકૃતિપટુર્ અતિભવ તવ તનુર્ ઇયમ્ અતિરુચિરા ॥

ત્રિભુવનદુરધિગમચરણપરિચરણગુરુવિભવભગવદસિતસુગત પ્રતિકૃતિસચિવવિમલમણિનિચયખચિતસુપરિઘટનગુણવસતિઃ
જિનનયગદનરવલયલવસમનુકૃતિરસિકનિભસુરભિસુરસુમનઃ પરિમલમિલદલિકુલકણિતનિધિર્ અધિગમજલદ જયતિ તવ શિખા ॥

સમુદયદિશિ સમુપનતરુચિષુ વિવિધસમુદયકરણમ્ અભિદધતી પ્રશમસુખરસરસિકમતિષુ નિરુપમશમસુખપથકથનપૃથુનિરતિઃ
અપરિમિતસુકૃતફલમ્ અધિપ તવ જયતિ સકલજિનનયનયનગીર્ ઋજુમતિષુ નિયતમ્ ઋજુર્ અમૃતકુટ કુટિલમતિષુ નિરતિશય કુટિલપદા ॥

આખ્યાનિકે યં ભવતો ગુણાનામ્ ઇતિ સ્તુવંસ્ ત્વામ્ અભિમન્યતે યઃ
નૂણં સ ગણ્ડૂષજલોપયોગાન્ મયા નિપીતો ઽમ્બુધિર્ ઇત્ય્ અવેતિ ॥

અપિ ત્વ્ અશેષસ્મરવૈરિણામ્ અપ્ય્ આખ્યેયતાખ્યાતિમ્ અનાશ્રિતેષુ
ગુણેષુ તે નાથ વૃથાભિમાનસ્ય આખ્યાનિકા સૌ વિપરીતપૂર્વા ॥