વિવાહપટલ · શ્લોક 61-80
પાણિગ્રહમ્ એત્ય જયે જઘન્યકુલજાપિ ભર્તુર્ ઐશ્વર્યમ્॥
આવહતિ સદા કન્યા નિષેવ્યમાના સપત્નીભિઃ।
વિજયાં પ્રાપ્યોદ્વાહં પ્રાપ્નોતિ સુતાન્ યશો ઽર્થલાભં ચ॥
વંશસ્ય ચ પ્રતિષ્ઠાં પરતો મરણાચ્ ચ સુરલોકમ્।
વ્યાલે વ્યાલાકારા પાણિગ્રહમ્ એતિ કન્યકા દૈવાત્॥
દારિદ્ર્યામયયુક્તા નૈકસ્મિન્ પુંસિ સા રમતે।
પાતાલનામનિ ગતા પાણિગ્રહણે ચ પઞ્ચમાન્ માસાત્॥
સા પ્રાપ્ય દોષમ્ અતુલં પરઃ પ્રાણાન્ પરિત્યજતિ।
ક્ષયમ્ આસાદ્યોદ્વાહં કન્યા પક્ષદ્વયાત્ પતિં હત્વા॥
નીચેન તુ સહ ભર્ત્રા ક્ષપયતિ જારાગ્નિના ગોત્રમ્।
પાણિગ્રહસ્ તમસિ ચેલ્ લક્ષણગુણવિત્તતો ઽપિ સમ્પન્ના॥
સપ્તતિ રાત્રાત્ ક્ષપયતિ યદ્ય્ અપિ જાતા સુરેન્દ્રેણ।
યદિ ખલુ કૃતાન્તયોગે પરિણયમ્ આયતિ કન્યકા દૈવાત્॥
સા શ્વસુરબન્ધુવર્ગં ક્ષપયત્ય્ અચિરેણ કાલેન।
આત્મોપેક્ષકપોષકવધકા ઇતિ રાશયો ઽર્થતો ઽભિહિતઃ॥
એભ્યઃ શુભમ્ અશુભં વા નિર્દેશ્યા જન્મલગ્નાભ્યામ્।
આત્મેતિ જન્મલગ્નં પઞ્ચમ નવમં ચ કીર્તિતં તસ્માત્॥
દ્વિષટ્કદશમભવનમ્ ઉપેક્ષકાખ્યં વિનિર્દિષ્ટમ્॥
દુશ્ચિક્યં જામિત્રં ચૈકાદશકં ચ પોષકં જ્ઞેયમ્॥
દ્વાદશનિધનચતુર્થં વધકાખ્યં શાસ્ત્રનિર્દિષ્ટમ્।
હિત્વા શશાઙ્કં યદિ સપ્ત સૌમ્યૈઃ પઞ્ચાશુભૈઃ કિં કથિતા ન સપ્તા॥
દ્વિત્ર્યાદિયોગાન્ પરિહૃત્ય કસ્માન્ નોક્તં શતં ત્રિઘનં વિલગ્ને।
દેશાચારસ્ તાવદ્ આદૌ વિચિન્ત્યો દેશે દેશે યા સ્થિતિ સૈવ કાર્યા॥
લોકદ્વિષ્ટાં પણ્ડિતા વર્જયન્તિ દૈવજ્ઞો ઽપિ લોકમાર્ગેણ યાયાત્।
બૃહસ્પતૌ ગોચરશોભનસ્થે વિવાહમ્ ઇચ્છન્તિ ચ દક્ષિણાત્યાઃ।
રવૌ શુભસ્થે ચ વદન્તિ ગૌડા ન ગોચરો માલવકે પ્રમાણમ્॥
હરૌ પ્રસુપ્તે ન ચ દક્ષિણાયને ન ચૈત્રમાસે ન ચ પુષ્યસંજ્ઞિતે।
તિથૌ ચ રિક્તે શશિનિ ક્ષયઙ્ગતે રવીન્દુભૌમાર્કિદિનેષુ ચાશુભમ્॥
વ્યતિપાતહતં દિનત્રયં વ્યતિપાતેન સમં ચ વૈધૃતિમ્॥
તદ્ અપિ સ્ફુટપાતદર્શને દ્વિગુણં યદિ વા ન નિશ્ચિતમ્।
વ્યતિપાતવ્યાઘાતઃ ષષ્ઠે દશમે ચ વૈધૃતં ધિષ્ણ્યે॥
વિક્ષોભણગણ્ડાન્તાવ્ અતિધૃતિસંખ્યે ચ વ્યાઘાતઃ।
તદ્ ઇદં વ્યતિપાતં ચ કથયન્તિ ઉત્તરદિક્સ્થિતાજનાઃ॥
વ્યતિપાતવદ્ આકુલસ્થિતં બહુસિદ્ધાન્તવિશેષકારણે।
તથોત્તરાઃ સાકલસન્નિકૃષ્ટા માણ્ડવ્યમાતીયતુસાર્દ્ધકેષુ॥
ખશેષુ હૂણેષુ ન બાહ્લિકેષુ વા ન, કાણદેશેષુ ન ગોપભોજાઃ।
એકાદશોક્તાનિ શુભાનિ ભાનિ શેષાણ્ય્ અનિષ્ટાનિ વિવાહકાલે॥
તત્રાગ્નિ [ઉ. તત્રાપિ] તારા શશિવીર્યયુક્તા ત્રિંશન્ મુહૂર્તાશ્ ચ વિચિન્તનીયાઃ।
તુલાધરસ્ત્રીમિથુનાદ્ વિવાહ [ઉ. વિહાય] લગ્ને સ્થિતા પાપફલા ન ચાન્યે॥
ત્રિંશાંશકદ્વાદશભાગભેદૈર્ દ્રેષ્કાણહોરાપ્રમુખૈર્ વિચિન્ત્યઃ।
મૂળ પાઠ: Vivāhapaṭala · Edition: of Deviprasada Lamsala, Vivahapatalam, Rastriya Abhilekhalayata, 2035 with reference to Utpala's commentary [marked by U.] · Data entry Mizue Sugita · GRETIL (Göttingen) · CC BY-NC-SA 4.0