વિષ્ણુપુરાણ (સમીક્ષિત આવૃત્તિ) · અધ્યાય 5.5

વિમુક્તો વસુદેવો ઽપિ નન્દસ્ય શકટં ગતઃ
પ્રહૃષ્ટં દૃષ્ટવાન્ નન્દં પુત્રો જાતો મમેતિ વૈ ॥

વસુદેવો ઽપિ તં પ્રાહ દિષ્ટ્યા દિષ્ટ્યેતિ સાદરમ્
વાર્દ્ધકે ઽપિ સમુત્પન્નસ્ તનયો યત્ તવાધુના ॥

દત્તો હિ વાર્ષિકઃ સર્વો ભવદ્ભિર્ નૃપતેઃ કરઃ
યદર્થમ્ આગતાસ્ તસ્માન્ નાત્ર સ્થેયં મહાધનાઃ ॥

યદર્થમ્ આગતાઃ કાર્યં તન્ નિષ્પન્નં કિમ્ આસ્યતે
ભવદ્ભિર્ ગમ્યતાં નન્દ તચ્ છીઘ્રં નિજગોકુલમ્ ॥

મમાપિ બાલકસ્ તત્ર રોહિણીપ્રસવો હિ યઃ
સ રક્ષણીયો ભવતા યથાયં તનયો નિજઃ ॥

ઇત્ય્ ઉક્તાઃ પ્રયયુર્ ગોપા નન્દગોપપુરોગમાઃ
શકટારોપિતૈર્ ભાણ્ડૈઃ કરં દત્ત્વા મહાબલાઃ ॥

વસતાં ગોકુલે તેષાં પૂતના બાલઘાતિની
સુપ્તં કૃષ્ણમ્ ઉપાદાય રાત્રૌ તસ્મૈ દદૌ સ્તનમ્ ॥

યસ્મૈ યસ્મૈ સ્તનં રાત્રૌ પૂતના સંપ્રયચ્છતિ
તસ્ય તસ્ય ક્ષણેનાઙ્ગં બાલકસ્યોપહન્યતે ॥

કૃષ્ણસ્ તસ્યાઃ સ્તનં ગાઢં કરાભ્યામ્ અતિપીડિતમ્
ગૃહીત્વા પ્રાણસહિતં પપૌ કોપસમન્વિતઃ ॥

સા વિમુક્તમહારાવા વિચ્છિન્નસ્નાયુબન્ધના
પપાત પૂતના ભૂમૌ મ્રિયમાણાતિભીષણા ॥

તન્નાદશ્રુતિસંત્રાસાત્ પ્રબુદ્ધાસ્ તે વ્રજૌકસઃ
દદૃશુઃ પૂતનોત્સઙ્ગે કૃષ્ણં તાં ચ નિપાતિતામ્ ॥

આદાય કૃષ્ણં સંત્રસ્તા યશોદાપિ દ્વિજોત્તમ
ગોપુચ્છં ભ્રામ્ય હસ્તેન બાલદોષમ્ અપાકરોત્ ॥

ગોપુરીષમ્ ઉપાદાય નન્દગોપો ઽપિ મસ્તકે
કૃષ્ણસ્ય પ્રદદૌ રક્ષાં કુર્વંશ્ ચૈતદ્ ઉદીરયન્ ॥

રક્ષતુ ત્વામ્ અશેષાણાં ભૂતાનાં પ્રભવો હરિઃ
યસ્ય નાભિસમુદ્ભૂત પઙ્કજાદ્ અભવજ્ જગત્ ॥

યેન દંષ્ટ્રાગ્રવિધૃતા ધારયત્ય્ અવની જગત્
વરાહરૂપધૃગ્ દેવઃ સ ત્વાં રક્ષતુ કેશવઃ ॥

નખાઙ્કુરવિનિર્ભિન્ન વૈરિવક્ષઃસ્થલો વિભુઃ
નૃસિંહરૂપી સર્વત્ર સ ત્વાં રક્ષતુ કેશવઃ ॥

વામનો રક્ષતુ સદા ભવન્તં યઃ ક્ષણાદ્ અભૂત્
ત્રિવિક્રમક્રમાક્રાન્ત ત્રૈલોક્યઃ સ્ફુરદાયુધઃ ॥

શિરસ્ તે પાતુ ગોવિન્દઃ કણ્ઠં રક્ષતુ કેશવઃ
ગુહ્યં સજઠરં વિષ્ણુર્ જઙ્ઘે પાદૌ જનાર્દનઃ ॥

મુખં બાહૂ પ્રબાહૂ ચ મનઃ સર્વેન્દ્રિયાણિ ચ
રક્ષત્વ્ અવ્યાહતૈશ્વર્યસ્ તવ નારાયણો ઽવ્યયઃ ॥

શાર્ઙ્ગચક્રગદાપાણેઃ શઙ્ખનાદહતાઃ ક્ષયમ્
ગચ્છન્તુ પ્રેતકૂષ્માણ્ડ રાક્ષસા યે તવાહિતાઃ ॥

ત્વાં પાતુ દિક્ષુ વૈકુણ્ઠો વિદિક્ષુ મધુસૂદનઃ
હૃષીકેશો ઽમ્બરે ભૂમૌ રક્ષતુ ત્વાં મહીધરઃ ॥

એવં કૃતસ્વસ્ત્યયનો નન્દગોપેન બાલકઃ
શાયિતઃ શકટસ્યાધો બાલપર્યઙ્કિકાતલે ॥

તે ચ ગોપા મહદ્ દૃષ્ટ્વા પૂતનાયાઃ કલેવરમ્
મૃતાયાઃ પરમં ત્રાસં વિસ્મયં ચ તદા યયુઃ ॥