વિષ્ણુપુરાણ (સમીક્ષિત આવૃત્તિ) · અધ્યાય 5.4

કંસસ્ તતૌદ્વિગ્નમનાઃ પ્રાહ સર્વાન્ મહાસુરાન્
પ્રલમ્બકેશિપ્રમુખાન્ આહૂયાસુરપુંગવાન્ ॥

હે પ્રલમ્બ મહાબાહો કેશિન્ ધેનુક પૂતને
અરિષ્ટાદ્યૈસ્ તથા ચાન્યૈઃ શ્રૂયતાં વચનં મમ ॥

માં હન્તુમ્ અમરૈર્ યત્નઃ કૃતઃ કિલ દુરાત્મભિઃ
મદ્વીર્યતાપિતૈર્ વીરા ન ત્વ્ એતાન્ ગણયામ્ય્ અહમ્ ॥

કિમ્ ઇન્દ્રેણાલ્પવીર્યેણ કિં હરેણૈકચારિણા
હરિણા વાપિ કિં સાધ્યં છિદ્રેષ્વ્ અસુરઘાતિના ॥

કિમ્ આદિત્યૈઃ સવસુભિર્ અલ્પવીર્યૈઃ કિમ્ અગ્નિભિઃ
કિં વાન્યૈર્ અમરૈઃ સર્વૈર્ મદ્બાહુબલનિર્જિતૈઃ ॥

કિં ન દૃષ્ટો ઽમરપતિર્ મયા સંયુગમ્ એત્ય સઃ
પૃષ્ઠેનૈવ વહન્ બાણાન્ અપાગચ્છન્ ન વક્ષસા ॥

મદ્રાષ્ટ્રે વારિતા વૃષ્ટિર્ યદા શક્રેણ કિં તદા
મદ્બાણભિન્નૈર્ જલદૈર્ આપો મુક્તા યથેપ્સિતાઃ ॥

કિમ્ ઉર્વ્યામ્ અવનીપાલા મદ્બાહુબલભીરવઃ
ન સર્વે સન્નતિં યાતા જરાસંધમ્ ઋતે ગુરુમ્ ॥

અમરેષુ મમાવજ્ઞા જાયતે દૈત્યપુંગવાઃ
હાસ્યં મે જાયતે વીરાસ્ તેષુ યત્નપરેષ્વ્ અપિ ॥

તથાપિ ખલુ દુષ્ટાનાં તેષામ્ અભ્યધિકં મયા
અપકારાય દૈત્યેન્દ્રા યતનીયં દુરાત્મનામ્ ॥

તદ્ યે તપસ્વિનઃ કેચિત્ પૃથિવ્યાં યે ચ યજ્વિનઃ
કાર્યો દેવાપકારાય તેષાં સર્વાત્મના વધઃ ॥

ઉત્પન્નશ્ ચાપિ મૃત્યુર્ મે ભૂતપૂર્વશ્ ચ મે કિલ
ઇત્ય્ એતદ્ બાલિકા પ્રાહ દેવકીગર્ભસંભવા ॥

તસ્માદ્ બાલેષુ પરમો યત્નઃ કાર્યો મહીતલે
યત્રોદ્રિક્તં બલં બાલે સ હન્તવ્યઃ પ્રયત્નતઃ ॥

ઇત્ય્ આજ્ઞાપ્યાસુરાન્ કંસઃ પ્રવિશ્યાત્મગૃહં તતઃ
મુમોચ વસુદેવં ચ દેવકીં ચ નિરોધતઃ ॥

યુવયોર્ ઘાતિતા ગર્ભા વૃથૈવૈતે મયાધુના
કો ઽપ્ય્ અન્ય એવ નાશાય બાલો મમ સમુદ્ગતઃ ॥

તદ્ અલં પરિતાપેન નૂનં તદ્ ભાવિનો હિ તે
અર્ભકા યુવયોઃ કો વા નાયુષો ઽન્તે વિહન્યતે ॥

ઇત્ય્ આશ્વાસ્ય વિમુક્ત્વા ચ કંસસ્ તૌ પરિશઙ્કિતઃ
અન્તર્ગૃહં દ્વિજશ્રેષ્ઠ પ્રવિવેશ પુનઃ સ્વકમ્ ॥