વિષ્ણુપુરાણ (સમીક્ષિત આવૃત્તિ) · અધ્યાય 5.26

ભીષ્મકઃ કુણ્ડિને રાજા વિદર્ભવિષયે ઽભવત્
રુક્મી તસ્યાભવત્ પુત્રો રુક્મિણી ચ વરાઙ્ગના ॥

રુક્મિણીં ચકમે કૃષ્ણઃ સા ચ તં ચારુહાસિની
ન દદૌ યાચતે ચૈનાં રુક્મી દ્વેષેણ ચક્રિણે ॥

દદૌ ચ શિશુપાલાય જરાસંધપ્રચોદિતઃ
ભીષ્મકો રુક્મિણા સાર્ધં રુક્મિણીમ્ ઉરુવિક્રમઃ ॥

વિવાહાર્થં તતઃ સર્વે જરાસંધમુખા નૃપાઃ
ભીષ્મકસ્ય પુરીં જગ્મુઃ શિશુપાલપ્રિયૈષિણઃ ॥

કૃષ્ણો ઽપિ બલભદ્રાદ્યૈર્ યાદવૈર્ બહુભિર્ વૃતઃ
પ્રયયૌ કુણ્ડિનં દ્રષ્ટું વિવાહં ચેદિભૂભૃતઃ ॥

અન્તઃપ્રવિષ્ટા રાજાનઃ શત્રવઃ પૂર્વમ્ આગતાઃ ॥

ઇતિ મત્વા તથા કૃષ્ણો બહિર્ વા સમકલ્પયત્ ॥

શ્વોભાવિનિ વિવાહે તુ તાં કન્યાં હૃતવાન્ હરિઃ
વિપક્ષભારમ્ આસજ્ય રામાદ્યેષ્વ્ અથ બન્ધુષુ ॥

તતશ્ ચ પૌણ્ડ્રકઃ શ્રીમાન્ દન્તવક્રો વિદૂરથઃ
શિશુપાલજરાસંધ શાલ્વાદ્યાશ્ ચ મહીભૃતઃ ॥

કુપિતાસ્ તે હરિં હન્તું ચક્રુર્ ઉદ્યોગમ્ ઉત્તમમ્
નિર્જિતાશ્ ચ સમાગમ્ય રામાદ્યૈર્ યદુપુંગવૈઃ ॥

કુણ્ડિનં ન પ્રવેક્ષ્યામિ અહત્વા યુધિ કેશવમ્
કૃત્વા પ્રતિજ્ઞાં રુક્મી ચ હન્તું કૃષ્ણમ્ અભિદ્રુતઃ ॥

હત્વા બલં સનાગાશ્વં પત્તિસ્યન્દનસંકુલમ્
નિર્જિતઃ પાતિતશ્ ચોર્વ્યાં લીલયૈવ સ ચક્રિણા ॥

હન્તું કૃતમતિઃ કૃષ્ણો રુક્મિણં યુદ્ધદુર્મદમ્ ॥

પ્રણમ્ય યાચિતો બ્રહ્મ રુક્મિણ્યા ભગવાન્ હરિઃ ॥

એક એવ મમ ભ્રાતા ન હન્તવ્યસ્ ત્વયાધુના ॥

ક્રોધં નિયમ્ય દેવેશ ભ્રાતૃભિક્ષા પ્રદીયતામ્ ॥

ઇત્ય્ ઉક્તો ઽસૌ પરિષ્વક્તઃ કૃષ્ણેનાક્લિષ્ટકર્મણા ॥

રુક્મી ભોજકટં નામ પુરં કૃત્વાવસત્ તદા ॥

નિર્જિત્ય રુક્મિણં સમ્યગ્ ઉપયેમે સ રુક્મિણીમ્
રાક્ષસેન વિવાહેન સંપ્રાપ્તાં મધુસૂદનઃ ॥

તસ્યાં જજ્ઞે ઽથ પ્રદ્યુમ્નો મદનાંશઃ સ વીર્યવાન્
જહાર શમ્બરો યં વૈ યો જઘાન ચ શમ્બરમ્ ॥