વિષ્ણુપુરાણ (સમીક્ષિત આવૃત્તિ) · અધ્યાય 5.25

વને વિચરતસ્ તસ્ય સહ ગોપૈર્ મહાત્મનઃ
માનુષછદ્મરૂપસ્ય શેષસ્ય ધરણીભૃતઃ ॥

નિષ્પાદિતોરુકાર્યસ્ય કાર્યેણોર્વીવિચારિણઃ
ઉપભોગાર્થમ્ અત્યર્થં વરુણઃ પ્રાહ વારુણીમ્ ॥

અભીષ્ટા સર્વદા યસ્ય મદિરે ત્વં મહૌજસઃ
અનન્તસ્યોપભોગાય તસ્ય ગચ્છ મુદે શુભે ॥

ઇત્ય્ ઉક્તા વારુણી તેન સંનિધાનમ્ અથાકરોત્
વૃન્દાવનવનોત્પન્ન કદમ્બતરુકોટરે ॥

વિચરન્ બલદેવો ઽપિ મદિરાગન્ધમ્ ઉત્તમમ્
આઘ્રાય મદિરાતર્ષમ્ અવાપાથ પુરાતનમ્ ॥

તતઃ કદમ્બાત્ સહસા મદ્યધારાં સ લાઙ્ગલી
પતન્તીં વીક્ષ્ય મૈત્રેય પ્રયયૌ પરમાં મુદમ્ ॥

પપૌ ચ ગોપગોપીભિઃ સમવેતો મુદાન્વિતઃ
પ્રગીયમાનો લલિતં ગીતવાદ્યવિશારદૈઃ ॥

સ મત્તો ઽત્યન્તઘર્મામ્ભઃ કણિકામૌક્તિકોજ્જ્વલઃ
આગચ્છ યમુને સ્નાતુમ્ ઇચ્છામીત્ય્ આહ વિહ્વલઃ ॥

તસ્ય વાચં નદી સા તુ મત્તોક્તામ્ અવમન્ય વૈ
નાજગામ તતઃ ક્રુદ્ધો હલં જગ્રાહ લાઙ્ગલી ॥

ગૃહીત્વા તાં તટે તેન ચકર્ષ મદવિહ્વલઃ
પાપે નાયાસિ નાયાસિ ગમ્યતામ્ ઇચ્છયાન્યતઃ ॥

સાકૃષ્ટા સહસા તેન માર્ગં સંત્યજ્ય નિમ્નગા
યત્રાસ્તે બલભદ્રો ઽસૌ પ્લાવયામ્ આસ તદ્ વનમ્ ॥

શરીરિણી તથોપેત્ય ત્રાસવિહ્વલલોચના
પ્રસીદેત્ય્ અબ્રવીદ્ રામં મુઞ્ચ માં મુસલાયુધ ॥

સો ઽબ્રવીદ્ અવજાનાસિ મમ શૌર્યબલે નદિ
સો ઽહં ત્વાં હલપાતેન વિનેષ્યામિ સહસ્રધા ॥

ઇત્ય્ ઉક્તયાતિસંત્રાસાત્ તયા નદ્યા પ્રસાદિતઃ
ભૂભાગે પ્લાવિતે તસ્મિન્ મુમોચ યમુનાં બલઃ ॥

તતઃ સ્નાતસ્ય વૈ કાન્તિર્ આજગામ મહાત્મનઃ
અવતંસોત્પલં ચારુ ગૃહીત્વૈકં ચ કુણ્ડલમ્ ॥

તતો વ્યમુઞ્ચદ્ યમુનાં યાચિતો ભગવાન્ બલઃ ॥

વિજગાહ જલં સ્ત્રીભિઃ કરૌર(કરિણી)ભિર્ ઇવેભરાટ્ ॥

કામં વિહૃત્ય સલિલાદ્ ઉત્તીર્ણાયાસિતામ્બરે ॥

ભૂષણાનિ મહાર્ઘાણિ દદૌ કાન્તિશુભાં સ્રજમ્ ॥

વરુણપ્રહિતાં ચાસ્મૈ માલામ્ અમ્લાનપઙ્કજામ્
સમુદ્રાભે તથા વસ્ત્રે નીલે લક્ષ્મીર્ અયચ્છત ॥

કૃતાવતંસઃ સ તદા ચારુકુણ્ડલભૂષિતઃ
નીલામ્બરધરઃ સ્રગ્વી શુશુભે કાન્તિસંયુતઃ ॥

ઇત્થં વિભૂષિતો રેમે તત્ર રામસ્ તદા વ્રજે
માસદ્વયેન યાતશ્ ચ પુનઃ સ દ્વારકાં પુરીમ્ ॥

રેવતીં નામ તનયાં રૈવતસ્ય મહીપતેઃ
ઉપયેમે બલસ્ તસ્યાં જજ્ઞાતે નિશઠોલ્મુકૌ ॥

વસિત્વા વાસસી નીલે માલામ્ આમુચ્યકાઞ્ચનીમ્ ॥

રેજે સ્વલંકૃતિલિપ્તો માહેન્દ્ર ઇવ વારણઃ ॥

અદ્યાપિ દૃશ્યતે રાજન્ યમુનાકૃષ્ટવર્ત્મના ॥

બલસ્યાનન્તવીર્યસ્ય વીર્યં સૂચયતીવ હિ ॥

એવં સર્વા નિશા યાતા એકૈવ રમરો ((રેમિરે)) વ્રજે ॥

રામસ્યાક્ષિપ્તચિત્તસ્ય માધુર્યૈર્ વ્રજયોષિતામ્ ॥