વિષ્ણુપુરાણ (સમીક્ષિત આવૃત્તિ) · અધ્યાય 5.24

ઇત્થં સ્તુતસ્ તદા તેન મુચુકુન્દેન ધીમતા
પ્રાહેશઃ સર્વભૂતાનામ્ અનાદિર્ ભગવાન્ હરિઃ ॥

યથાભિવાઞ્છિતાન્ દિવ્યાન્ લોકાન્ ગચ્છ નરેશ્વર
અવ્યાહતપરૈશ્વર્યો મત્પ્રસાદોપબૃંહિતઃ ॥

ભુક્ત્વા દિવ્યાન્ મહાભોગાન્ ભવિષ્યસિ મહાકુલે
જાતિસ્મરો મત્પ્રસાદાત્ તતો મોક્ષમ્ અવાપ્સ્યસિ ॥

ઇત્ય્ ઉક્તઃ પ્રણિપત્યેશં જગતામ્ અચ્યુતં નૃપઃ
ગુહામુખાદ્ વિનિષ્ક્રાન્તઃ દદૃશે સો ઽલ્પકાન્ નરાન્ ॥

તતઃ કલિયુગં જ્ઞાત્વા પ્રાપ્તં તપ્તું નૃપસ્ તપઃ
નરનારાયણસ્થાનં પ્રયયૌ ગન્ધમાદનમ્ ॥

કૃષ્ણો ઽપિ ઘાતયિત્વારિમ્ ઉપાયેન હિ તદ્બલમ્
જગ્રાહ મથુરામ્ એત્ય હસ્ત્યશ્વસ્યન્દનોજ્જ્વલમ્ ॥

આનીય ચોગ્રસેનાય દ્વારવત્યાં ન્યવેદયત્
પરાભિભવનિઃશઙ્કં બભૂવ ચ યદોઃ કુલમ્ ॥

બલદેવો ઽપિ મૈત્રેય પ્રશાન્તાખિલવિગ્રહઃ
જ્ઞાતિદર્શનસોત્કણ્ઠઃ પ્રયયૌ નન્દગોકુલમ્ ॥

તતો ગોપાંશ્ ચ ગોપીશ્ ચ યથાપૂર્વમ્ અમિત્રજિત્
તથૈવાભ્યવદત્ પ્રેમ્ણા બહુમાનપુરઃસરમ્ ॥

કૈશ્ ચાપિ સંપરિષ્વક્તઃ કાંશ્ચિચ્ ચ પરિષસ્વજે
હાસ્યં ચક્રે સમં કૈશ્ચિદ્ ગોપૈર્ ગોપીજનૈસ્ તથા ॥

પ્રિયાણ્ય્ અનેકાન્ય્ અવદન્ ગોપાસ્ તત્ર હલાયુધમ્
ગોપ્યશ્ ચ પ્રેમકુપિતાઃ પ્રોચુઃ સેર્ષ્યમ્ અથાપરાઃ ॥

ગોપ્યઃ પપ્રચ્છુર્ અપરા નાગરીજનવલ્લભઃ
કચ્ચિદ્ આસ્તે સુખં કૃષ્ણશ્ ચલત્પ્રેમલવાત્મકઃ ॥

અસ્મચ્ચેષ્ટામ્ અપહસન્ ન કચ્ચિત્ પુરયોષિતામ્
સૌભાગ્યમાનમ્ અધિકં કરોતિ ક્ષણસૌહૃદઃ ॥

કચ્ચિત્ સ્મરતિ નઃ કૃષ્ણો ગીતાનુગમનં કલમ્
અપ્ય્ અસૌ માતરં દ્રષ્ટું સકૃદ્ અપ્ય્ આગમિષ્યતિ ॥

અથ વા કિં તદાલાપૈર્ અપરા ક્રિયતાં કથા
યસ્યાસ્માભિર્ વિના તેન વિનાસ્માકં ભવિષ્યતિ ॥

પિતા માતા તથા ભ્રાતા ભર્તા બન્ધુજનશ્ ચ કિમ્
ન ત્યક્તસ્ તત્કૃતે ઽસ્માભિર્ અકૃતજ્ઞધ્વજો હિ સઃ ॥

સંદેશૈઃ સામમધુરૈર્ નાસ્માન્ સ્મરતિ કુત્રચિત્ ॥

તથાપિ કચ્ચિદ્ આલાપમ્ ઇહાગમનસંશ્રયમ્
કરોતિ કૃષ્ણો વક્તવ્યં ભવતા રામ નાનૃતમ્ ॥

દામોદરઃ સ ગોવિન્દઃ પુરસ્ત્રીસક્તમાનસઃ
અપેતપ્રીતિર્ અસ્માસુ દુર્દર્શઃ પ્રતિભાતિ નઃ ॥

આમન્ત્રિતઃ સ કૃષ્ણેતિ પુનર્ દામોદરેતિ ચ
રુરુદુઃ સસ્વરં ગોપ્યો હરિણા હૃતચેતસઃ ॥

સંદેશૈઃ સામમધુરૈઃ પ્રેમગર્ભૈર્ અગર્વિતૈઃ
રામેણાશ્વાસિતા ગોપ્યઃ કૃષ્ણસ્યાતિમનોહરૈઃ ॥

ગોપૈશ્ ચ પૂર્વવદ્ રામઃ પરિહાસમનોરમાઃ
કથાશ્ ચકાર રેમે ચ સહ તૈર્ વ્રજભૂમિષુ ॥