વિષ્ણુપુરાણ (સમીક્ષિત આવૃત્તિ) · અધ્યાય 5.22

જરાસંધસુતે કંસ ઉપયેમે મહાબલઃ
અસ્તિં પ્રાપ્તિં ચ મૈત્રેય તયોર્ ભર્તૃહણં હરિમ્ ॥

મહાબલપરીવારો મગધાધિપતિર્ બલી
હન્તુમ્ અભ્યાયયૌ કોપાજ્ જરાસંધઃ સ યાદવમ્ ॥

ઉપેત્ય મથુરાં સો ઽથ રુરોધ મગધેશ્વરઃ
અક્ષૌહિણીભિઃ સૈન્યસ્ય ત્રયોવિંશતિભિર્ વૃતઃ ॥

નિષ્ક્રમ્યાલ્પપરીવારાવ્ ઉભૌ રામજનાર્દનૌ
યુયુધાતે સમં તસ્ય બલિનૌ બલિસૈનિકૈઃ ॥

તતો રામશ્ ચ કૃષ્ણશ્ ચ ચક્રાતે મતિમ્ ઉત્તમામ્
આયુધાનાં પુરાણાનામ્ આદાને મુનિસત્તમ ॥

અનન્તરં હરેઃ શાર્ઙ્ગં તૂણૌ ચાક્ષયસાયકૌ
આકાશાદ્ આગતૌ વિપ્ર તથા કૌમોદકી ગદા ॥

હલં ચ બલભદ્રસ્ય ગગનાદ્ આગતં જ્વલત્
મનસાભિમતં વિપ્ર સૌનન્દં મુસલં તથા ॥

તતો યુદ્ધે પરાજિત્ય સસૈન્યં મગધાધિપમ્
પુરીં વિવિશતુર્ વીરાવ્ ઉભૌ રામજનાર્દનૌ ॥

જિતે તસ્મિન્ સુદુર્વૃત્તે જરાસંધે મહામુને
જીવમાને ગતે કૃષ્ણસ્ તં નામન્યત નિર્જિતમ્ ॥

પુનર્ અપ્ય્ આજગામાથ જરાસંધો બલાન્વિતઃ
જિતશ્ ચ રામકૃષ્ણાભ્યામ્ અપક્રાન્તો દ્વિજોત્તમ ॥

દશ ચાષ્ટૌ ચ સંગ્રામાન્ એવમ્ અત્યન્તદુર્મદઃ
યદુભિર્ માગધો રાજા ચક્રે કૃષ્ણપુરોગમૈઃ ॥

સર્વેષ્વ્ એતેષુ યુદ્ધેષુ યાદવૈઃ સ પરાજિતઃ
અપક્રાન્તો જરાસંધઃ સ્વલ્પસૈન્યૈર્ બલાધિકઃ ॥

તદ્ બલં યાદવાનાં તૈર્ અજિતં યદ્ અનેકશઃ
તત્ તુ સંનિધિમાહાત્મ્યં વિષ્ણોર્ અંશસ્ય ચક્રિણઃ ॥

મનુષ્યધર્મશીલસ્ય લીલા સા જગતઃ પતેઃ
અસ્ત્રાણ્ય્ અનેકરૂપાણિ યદ્ અરાતિષુ મુઞ્ચતિ ॥

મનસૈવ જગત્સૃષ્ટિં સંહારં ચ કરોતિ યઃ
તસ્યારિપક્ષક્ષપણે કિયાન્ ઉદ્યમવિસ્તરઃ ॥

તથાપિ યે મનુષ્યાણાં ધર્માસ્ તદનુવર્તનમ્
કુર્વન્ બલવતા સંધિં હીનૈર્ યુદ્ધં કરોત્ય્ અસૌ ॥

સામ ચોપપ્રદાનં ચ તથા ભેદં પ્રદર્શયન્
કરોતિ દણ્ડપાતં ચ ક્વચિદ્ એવ પલાયનમ્ ॥

મનુષ્યદેહિનાં ચેષ્ટામ્ ઇત્ય્ એવમ્ અનુવર્તતઃ
લીલા જગત્પતેસ્ તસ્ય છન્દતઃ સંપ્રવર્તતે ॥