વિષ્ણુપુરાણ (સમીક્ષિત આવૃત્તિ) · અધ્યાય 5.2

યથોક્તં સા જગદ્ધાત્રી દેવદેવેન વૈ તદા
ષડ્ગર્ભગર્ભવિન્યાસં ચક્રે ચાન્યસ્ય કર્ષણમ્ ॥

સપ્તમે રોહિણીં પ્રાપ્તે ગતે ગર્ભે તતો હરિઃ
લોકત્રયોપકારાય દેવક્યાઃ પ્રવિવેશ વૈ ॥

યોગનિદ્રા યશોદાયાસ્ તસ્મિન્ન્ એવ તતો દિને
સંભૂતા જઠરે તદ્વદ્ યથોક્તં પરમેષ્ઠિના ॥

તતો ગ્રહગણઃ સમ્યક્ પ્રચચાર દિવિ દ્વિજ
વિષ્ણોર્ અંશે ભુવં યાતે ઋતવશ્ ચાભવન્ શુભાઃ ॥

ન સેહે દેવકીં દ્રષ્ટું કશ્ચિદ્ અપ્ય્ અતિતેજસા
જાજ્વલ્યમાનાં તાં દૃષ્ટ્વા મનાંસિ ક્ષોભમ્ આયયુઃ ॥

અદૃષ્ટાઃ પુરુષૈઃ સ્ત્રીભિર્ દેવકીં દેવતાગણાઃ
બિભ્રાણાં વપુષા વિષ્ણું તુષ્ટુવુસ્ તામ્ અહર્નિશમ્ ॥

પ્રકૃતિસ્ ત્વં પરા સૂક્ષ્મા બ્રહ્મગર્ભાભવઃ પુરા
તતો વાણી જગદ્ધાતુર્ વેદગર્ભાતિશોભને ॥

સૃજ્યસ્વરૂપગર્ભા ચ સૃષ્ટિભૂતા સનાતને
બીજભૂતા તુ સર્વસ્ય યજ્ઞગર્ભાભવસ્ ત્રયી ॥

ફલગર્ભા ત્વમ્ એવેજ્યા વહ્નિગર્ભા તથારણિઃ
અદિતિર્ દેવગર્ભા ત્વં દૈત્યગર્ભા તથા દિતિઃ ॥

જ્યોત્સ્ના વાસરગર્ભા ત્વં જ્ઞાનગર્ભાસિ સન્નતિઃ
નયગર્ભધરા નીતિર્ લજ્જા ત્વં પ્રશ્રયોદ્વહા ॥

કામગર્ભા તથેચ્છા ત્વં ત્વં તુષ્ટિસ્ તોષગર્ભિણી
મેધા ચ બોધગર્ભાસિ ધૈર્યગર્ભોદ્વહા ધૃતિઃ ॥

ગ્રહર્ક્ષતારકાગર્ભા દ્યૌર્ અસ્યાખિલહૈતુકી
એતા વિભૂતયો દેવિ તથાન્યાશ્ ચ સહસ્રશઃ ॥

તથાસંખ્યા જગદ્ધાત્રિ સામ્પ્રતં જઠરે તવ
સમુદ્રાદિનદીદ્વીપ વનપત્તનભૂષણા
ગ્રામખર્વટખેટાઢ્યા સમસ્તા પૃથિવી શુભે ॥

સમસ્તવહ્નયો ઽમ્ભાંસિ સકલાશ્ ચ સમીરણાઃ ॥

મહોરગાસ્ તથા યક્ષા રાક્ષસાઃ પ્રેતગુહ્યકાઃ ॥

ગ્રહર્ક્ષતારકાચિત્રં વિમાનશતસંકુલમ્ ॥

અવકાશમ્ અશેષસ્ય યદ્ દદાતિ નભશ્ ચ તત્ ॥

ભૂર્લોકો ઽથ ભુવર્લોકઃ સ્વર્લોકો ઽથ મહર્ જનઃ
તપશ્ ચ બ્રહ્મલોકશ્ ચ બ્રહ્માણ્ડમ્ અખિલં શુભે ॥

તદન્તર્ યે સ્થિતા દેવા દૈત્યગન્ધર્વચારણાઃ
મહોરગાસ્ તથા યક્ષા રાક્ષસાઃ પ્રેતગુહ્યકાઃ ॥

મનુષ્યાઃ પશવશ્ ચાન્યે યે ચ જીવા યશસ્વિનિ
તૈર્ અન્તઃસ્થૈર્ અનન્તો ઽસૌ સર્વેશઃ સર્વભાવનઃ ॥

રૂપકર્મસ્વરૂપાણિ ન પરિચ્છેદગોચરે
યસ્યાખિલપ્રમાણાનિ સ વિષ્ણુર્ ગર્ભગસ્ તવ ॥

ત્વં સ્વાહા ત્વં સ્વધા વિદ્યા સુધા ત્વં જ્યોતિરમ્બરે
ત્વં સર્વલોકરક્ષાર્થમ્ અવતીર્ણા મહીતલે ॥

પ્રસીદ દેવિ સર્વસ્ય જગતઃ શં શુભે કુરુ
પ્રીત્યા તં ધારયેશાનં ધૃતં યેનાખિલં જગત્ ॥