વિષ્ણુપુરાણ (સમીક્ષિત આવૃત્તિ) · અધ્યાય 5.14

પ્રદોષાર્ધે કદાચિત્ તુ રાસાસક્તે જનાર્દને
ત્રાસયન્ સમદો ગોષ્ઠમ્ અરિષ્ટઃ સમુપાગતઃ ॥

સતોયતોયદચ્છાયસ્ તીક્ષ્ણશૃઙ્ગો ઽર્કલોચનઃ
ખુરાગ્રપાતૈર્ અત્યર્થં દારયન્ વસુધાતલમ્ ॥

લેલિહાનઃ સનિષ્પેષં જિહ્વયૌષ્ઠૌ પુનઃ પુનઃ
સંરમ્ભાવિદ્ધલાઙ્ગૂલઃ કઠિનસ્કન્ધબન્ધનઃ ॥

ઉદગ્રકકુદાભોગઃ પ્રમાણાદ્ દુરતિક્રમઃ
વિણ્મૂત્રલિપ્તપૃષ્ઠાઙ્ગો ગવામ્ ઉદ્વેગકારકઃ ॥

પ્રલમ્બકણ્ઠો ઽતિમુખસ્ તરુઘાતાઙ્કિતાનનઃ
પાતયન્ સ ગવાં ગર્ભાન્ દૈત્યો વૃષભરૂપધૃક્ ॥

સૂદયંસ્ તાપસાન્ ઉગ્રો વનાન્ય્ અટતિ યઃ સદા ॥

તતસ્ તમ્ અતિઘોરાક્ષમ્ અવેક્ષ્યાતિભયાતુરાઃ
ગોપા ગોપસ્ત્રિયશ્ ચૈવ કૃષ્ણ કૃષ્ણેતિ ચુક્રુશુઃ ॥

સિંહનાદં તતશ્ ચક્રે તલશબ્દં ચ કેશવઃ
તચ્છબ્દશ્રવણાચ્ ચાસૌ દામોદરમુખં યયૌ ॥

અગ્રન્યસ્તવિષાણાગ્રઃ કૃષ્ણકુક્ષિકૃતેક્ષણઃ
અભ્યધાવત દુષ્ટાત્મા કૃષ્ણં વૃષભદાનવઃ ॥

આયાન્તં દૈત્યવૃષભં દૃષ્ટ્વા કૃષ્ણો મહાબલઃ
ન ચચાલ તતઃ સ્થાનાદ્ અવજ્ઞાસ્મિતલીલયા ॥

આસન્નં ચૈવ જગ્રાહ ગ્રાહવન્ મધુસૂદનઃ
જઘાન જાનુના કુક્ષૌ વિષાણગ્રહણાચલમ્ ॥

તસ્ય દર્પબલં ભઙ્ક્ત્વા ગૃહીતસ્ય વિષાણયોઃ
અપીડયદ્ અરિષ્ટસ્ય કણ્ઠં ક્લિન્નમ્ ઇવામ્બરમ્ ॥

ઉત્પાટ્ય શૃઙ્ગમ્ એકં તુ તેનૈવાતાડયત્ તતઃ
મમાર સહસા દૈત્યો મુખાચ્ છોણિતમ્ ઉદ્વમન્ ॥

તુષ્ટુવુર્ નિહતે તસ્મિન્ દૈત્યે ગોપા જનાર્દનમ્
જમ્ભે હતે સહસ્રાક્ષં પુરા દેવગણા યથા ॥