વિષ્ણુપુરાણ (સમીક્ષિત આવૃત્તિ) · અધ્યાય 5.12

ધૃતે ગોવર્ધને શૈલે પરિત્રાતે ચ ગોકુલે
રોચયામ્ આસ કૃષ્ણસ્ય દર્શનં પાકશાસનઃ ॥

સો ઽધિરુહ્ય મહાનાગમ્ ઐરાવતમ્ અમિત્રજિત્
ગોવર્ધનગિરૌ કૃષ્ણં દદર્શ ત્રિદશેશ્વરઃ ॥

ચારયન્તં મહાવીર્યં ગાશ્ ચ ગોપવપુર્ધરમ્
કૃત્સ્નસ્ય જગતો ગોપં વૃતં ગોપકુમારકૈઃ ॥

ગરુડં ચ દદર્શોચ્ચૈર્ અન્તર્ધાનગતં દ્વિજ
કૃતચ્છાયં હરેર્ મૂર્ધ્નિ પક્ષાભ્યાં પક્ષિપુંગવમ્ ॥

અવરુહ્ય સ નાગેન્દ્રાદ્ એકાન્તે મધુસૂદનમ્
શક્રઃ સસ્મિતમ્ આહેદં પ્રીતિવિસ્તારિતેક્ષણઃ ॥

કૃષ્ણ કૃષ્ણ શૃણુષ્વેદં યદર્થમ્ અહમ્ આગતઃ
ત્વત્સમીપં મહાભાગ નૈતચ્ ચિન્ત્યં ત્વયાન્યથા ॥

ભારાવતારણાર્થાય પૃથિવ્યાઃ પૃથિવીતલમ્
અવતીર્ણો ઽખિલાધાર ત્વમ્ એવ પરમેશ્વરઃ ॥

મહભઙ્ગવિરુદ્ધેન મયા ગોકુલનાશકાઃ
સમાદિષ્ટા મહામેઘાસ્ તૈશ્ ચૈતત્ કદનં કૃતમ્ ॥

ત્રાતાસ્ તાશ્ ચ ત્વયા ગાવઃ સમુત્પાટ્ય મહાગિરિમ્
તેનાહં તોષિતો વીર કર્મણાત્યદ્ભુતેન તે ॥

સાધિતં કૃષ્ણ દેવાનામ્ અહં મન્યે પ્રયોજનમ્
ત્વયાયમ્ અદ્રિપ્રવરઃ કરેણૈકેન યદ્ ધૃતઃ ॥

ગોભિશ્ ચ ચોદિતઃ કૃષ્ણ ત્વત્સકાશમ્ ઇહાગતઃ
ત્વયા ત્રાતાભિર્ અત્યર્થં યુષ્મત્સત્કારકારણાત્ ॥

સ ત્વાં કૃષ્ણાભિષેક્ષ્યામિ ગવાં વાક્યપ્રચોદિતઃ
ઉપેન્દ્રત્વે ગવામ્ ઇન્દ્રો ગોવિન્દસ્ ત્વં ભવિષ્યસિ ॥

અથોપવાહ્યાદ્ આદાય ઘણ્ટામ્ ઐરાવતાદ્ ગજાત્
અભિષેકં તયા ચક્રે પવિત્રજલપૂર્ણયા ॥

ક્રિયમાણે ઽભિષેકે તુ ગાવઃ કૃષ્ણસ્ય તત્ક્ષણાત્
પ્રસ્નવોદ્ભૂતદુગ્ધાર્દ્રાં સદ્યશ્ ચક્રુર્ વસુંધરામ્ ॥

અભિષિચ્ય ગવાં વાક્યાદ્ દેવેન્દ્રો વૈ જનાર્દનમ્
પ્રીત્યા સપ્રશ્રયં કૃષ્ણં પુનર્ આહ શચીપતિઃ ॥

ગવામ્ એતત્ કૃતં વાક્યં તથાન્યદ્ અપિ મે શૃણુ
યદ્ બ્રવીમિ મહાભાગ ભારાવતરણેચ્છયા ॥

મમાંશઃ પુરુષવ્યાઘ્ર પૃથાયાં પૃથિવીતલે
અવતીર્ણો ઽર્જુનો નામ સ રક્ષ્યો ભવતા સદા ॥

ભારાવતરણે સાહ્યં સ તે વીરઃ કરિષ્યતિ
સ રક્ષણીયો ભવતા યથાત્મા મધુસૂદન ॥

જાનામિ ભારતે વંશે જાતં પાર્થં તવાંશકમ્
તમ્ અહં પાલયિષ્યામિ યાવત્ સ્થાસ્યામિ ભૂતલે ॥

યાવન્ મહીતલે શક્ર સ્થાસ્યામ્ય્ અહમ્ અરિંદમ
ન તાવદ્ અર્જુનં કશ્ચિદ્ દેવેન્દ્ર યુધિ જેષ્યતિ ॥

કંસો નામ મહાબાહુર્ દૈત્યો ઽરિષ્ટસ્ તથાપરઃ
કેશી કુવલયાપીડો નરકાદ્યાસ્ તથાપરે ॥

હતેષ્વ્ એતેષુ દેવેન્દ્ર ભવિષ્યતિ મહાહવઃ
તત્ર વિદ્ધિ સહસ્રાક્ષ ભારાવતરણં કૃતમ્ ॥

સ ત્વં ગચ્છ ન સંતાપં પુત્રાર્થે કર્તુમ્ અર્હસિ
નાર્જુનસ્ય રિપુઃ કશ્ચિન્ મમાગ્રે પ્રભવિષ્યતિ ॥

અર્જુનાર્થે ત્વ્ અહં સર્વાન્ યુધિષ્ઠિરપુરોગમાન્
નિવૃત્તે ભારતે યુદ્ધે કુન્ત્યૈ દાસ્યામ્ય્ અવિક્ષતાન્ ॥

ઇત્ય્ ઉક્તઃ સંપરિષ્વજ્ય દેવરાજો જનાર્દનમ્
આરુહ્યૈરાવતં નાગં પુનર્ એવ દિવં યયૌ ॥

કૃષ્ણો ઽપિ સહિતો ગોભિર્ ગોપાલૈશ્ ચ પુનર્ વ્રજમ્
આજગામાથ ગોપીનાં દૃષ્ટિપૂતેન વર્ત્મના ॥