વિષ્ણુપુરાણ (સમીક્ષિત આવૃત્તિ) · અધ્યાય 3.16

હવિષ્યમત્સ્યમાંસૈસ્ તુ શશસ્ય શકુનસ્ય ચ
સૌકરચ્છાગલૈણેય રૌરવૈર્ ગવયેન ચ ॥

ઔરભ્રગવ્યૈશ્ ચ તથા માસવૃદ્ધ્યા પિતામહાઃ
પ્રયાન્તિ તૃપ્તિં માંસૈસ્ તુ નિત્યં વાર્ધ્રીણસામ્ ઇષૈઃ ॥

ખડ્ગમાંસમ્ અતીવાત્ર કાલશાકં તથા મધુ
શસ્તાનિ કર્મણ્ય્ અત્યન્ત તૃપ્તિદાનિ નરેશ્વર ॥

ગયામ્ ઉપેત્ય યઃ શ્રાદ્ધં કરોતિ પૃથિવીપતે
સફલં તસ્ય તજ્ જન્મ જાયતે પિતૃતુષ્ટિદમ્ ॥

પ્રસાતિકાઃ સનીવારાઃ શ્યામાકા દ્વિવિધાસ્ તથા
વન્યૌષધીપ્રધાનાસ્ તુ શ્રાદ્ધાર્હાઃ પુરુષર્ષભ ॥

યવાઃ પ્રિયંગવો મુદ્ગા ગોધૂમા વ્રીહયસ્ તિલાઃ
નિષ્પાવાઃ કોવિદારાશ્ ચ સર્ષપાશ્ ચાત્ર શોભનાઃ ॥

અકૃતાગ્રયણં યચ્ ચ ધાન્યજાતં નરેશ્વર
રાજમાષાન્ અણૂંશ્ ચૈવ મસૂરાંશ્ ચ વિવર્જયેત્ ॥

અલાબું ગૃઞ્જનં ચૈવ પલાણ્ડું પિણ્ડમૂલકમ્
ગન્ધારકં કરમ્ભાણિ લવણાન્ય્ ઔષરાણિ ચ ॥

આરક્તાશ્ ચૈવ નિર્યાસાઃ પ્રત્યક્ષલવણાનિ ચ
વર્જ્યાન્ય્ એતાનિ વૈ શ્રાદ્ધે યચ્ ચ વાચા ન શસ્યતે ॥

નક્તાહૃતમ્ અનુત્સૃષ્ટં તૃપ્યતે ન ચ યત્ર ગૌઃ
દુર્ગન્ધિ ફેનિલં ચામ્બુ શ્રાદ્ધયોગ્યં ન પાર્થિવ ॥

ક્ષીરમ્ એકશફાનાં યદ્ ઔષ્ટ્રમ્ આવિકમ્ એવ ચ
માર્ગં ચ માહિષં ચૈવ વર્જયેચ્ છ્રાદ્ધકર્મણિ ॥

ષણ્ડાપવિદ્ધચણ્ડાલ પાષણ્ડ્યુન્મત્તરોગિભિઃ
કૃકવાકુશ્વનગ્નૈશ્ ચ વાનરગ્રામસૂકરૈઃ ॥

ઉદક્યાસૂતિકાશૌચિ મૃતહારૈશ્ ચ વીક્ષિતે
શ્રાદ્ધે સુરા ન પિતરો ભુઞ્જતે પુરુષર્ષભ ॥

તસ્માત્ પરિશ્રિતે કુર્યાચ્ શ્રાદ્ધં શ્રદ્ધાસમન્વિતઃ
ઉર્વ્યાં ચ તિલવિક્ષેપાદ્ યાતુધાનાન્ નિવારયેત્ ॥

ન પૂતિ નૈવોપપન્નં કેશકીટાદિભિર્ નૃપ
ન ચૈવાભિષવૈર્ મિશ્રમ્ અન્નં પર્યુષિતં તથા ॥

શ્રદ્ધાસમન્વિતૈર્ દત્તં પિતૃભ્યો નામગોત્રતઃ
યદાહારાસ્ તુ તે જાતાસ્ તદાહારત્વમ્ એતિ તત્ ॥

શ્રૂયન્તે ચાપિ પિતૃભિર્ ગીતા ગાથા મહીપતે
ઇક્ષ્વાકોર્ મનુપુત્રસ્ય કલાપોપવને પુરા ॥

અપિ નસ્ તે ભવિષ્યન્તિ કુલે સન્માર્ગશીલિનઃ
ગયામ્ ઉપેત્ય યે પિણ્ડાન્ દાસ્યન્ત્ય્ અસ્માકમ્ આદરાત્ ॥

અપિ નઃ સ કુલે જાયાદ્ યો નો દદ્યાત્ ત્રયોદશીમ્
પાયસં મધુસર્પિભ્યાં વર્ષાસુ ચ મઘાસુ ચ ॥

ગૌરીં વાપ્ય્ ઉદ્વહેત્ કન્યાં નીલં વા વૃષમ્ ઉત્સૃજેત્
યજેત વાશ્વમેધેન વિધિવદ્ દક્ષિણાવતા ॥