વિષ્ણુધર્મોત્તરપુરાણમ્ · અધ્યાય 2.171.175

2.171
દિનગતશેષાલ્પકાલસ્યોત્તરગોલેર્ધરાત્રાદ્ધીનસ્ય દક્ષિણે યુક્તસ્ય જીવાસાહોરાત્રાવહતાત્રિજ્યાહૃતો ગોલ વિપર્યયેણ ત્રિજ્યાયુતોન્યચ્છેદઃ ।
છેદોવલમ્બકવ્યાહતઃ ત્રિજ્યાવિભાજિતઃ શંકુઃ।
શંકુવર્ગહીનસ્ય ક્રિયાવર્ગસ્ય પદં દૃશ્યદ્વાદશહતા શંકુહૃતા છાયા મધ્યાહ્નિકાર્કક્રાન્ત્યા સાક્ષસંયોગવિવરો દક્ષિણોત્તરગોલયોરનિષ્ટ તદ્રાશિત્રયાદપાસ્ય તજ્જ્યાભાગાપહારઃ દ્વાદશહતાયા અનષ્ટજીવાયા લબ્ધં માધ્યાહ્નિકી ચ્છાયા ત્રિદ્યાર્કઘાતમધ્યાહ્નછાયાભાગાપહારવિભક્તસ્તત્કર્ણઃ વિષુવકર્ણહતાં ત્રિદ્યાં સ્વેષ્ટકાયાકર્ણેન વિભજેત્ । લબ્ધમુત્તરદક્ષિણ ગોલયોઃ ક્ષિતિજ્યયા યુતોનવ્યાસાર્ધતાડિતં સ્વાહોરાત્રાર્ધેન વિભજેત્ ।
લબ્ધા ચાયં ગોલવિપર્યયાશ્ચરદલોનયુતં દિવસસ્ય ગતં શેષં વા ભવતિ ॥
ઇતિ શ્રીવિષ્ણુધર્મોત્તરે દ્વિતીયખણ્ડે માર્કણ્ડેયવજ્રસંવાદે જ્યોતિઃશાસ્ત્રે છાયાપ્રકરણં નામૈકસપ્તત્યુત્તરશતતમોઽધ્યાયઃ

2.172
ઇષ્ટકાલસ્ફુટાર્કરાશિભુક્તલિપ્તાસ્તદા ક્રાન્તિરાશ્યુદયપ્રાણાહતાગ્રહતાગ્રહલિપ્તાભિર્વિભજેત્। લબ્ધમર્કક્રાન્તિરાશેર્દિનભાગકાલઃ તદિષ્ટકાલપ્રાણેભ્યોણસ્યાદિત્યે ચાભુક્તલિપ્તા દેયાઃ કાલે ચાનન્તરરવ્યુદયાશ્રયાસ્યાઃ અર્ક ..........ચરાચ્યુદયો દેયઃ શેષાદશુદ્ધરાશ્યુદયૈર્ભાવાદ્યાઃ।
એવં રાશિગત કાલલગ્નોદયઃ ષડ્રાશિયુતાર્કા અર્કભુક્તકાલાદ્યાઃ કાલાઃ લગ્નાશ્ચ ભુક્તકલાભ્યસ્તદ્યોગે તદન્તરા વ્યુદયે યુતે લગ્રોદયઃ કાલઃ ॥
ઇતિશ્રીવિ૦ મા૦ વ૦ સં૦ દ્વિ૦ લગ્નપ્રકરણં નામ દ્વિસપ્તત્યુત્તરશતતમોઽધ્યાયઃ

2.173
ભૌમજીવમંદાઃ કેન્દ્રઃ શીઘ્રઃ બુધસિતૌ વક્રે મંદાવત્યથાશીઘ્રૌ મન્દ ગ્રહર્કાંતરગાઃ કાલદૃશ્યાદૃશ્યાંશેન યદા તદા પૂર્વાર્ધોદયાસ્તમયયોરાર્કોદયિકો ગ્રહઃ પશ્ચાર્ધેન તદાસ્તમયિકઃ તાત્કાલિકગ્રહસ્ફુટવિક્ષેપમદાજ્યાહતવ્યામાર્ધેન વિભજેત ।
લબ્ધગ્રહ ઔદયિકે ઋણમાસ્તમયિકવનૌત્તરવિક્ષેપપરમાપક્રમેણ વિભજેત્।
લબ્ધમયનવિક્ષેપેન્યે શોધ્યમન્યથાદેયમ્ ।
એવં ગ્રહોદયાસ્તલગ્નૌ ભવતઃ ।
તતો ગ્રહાન્તરાલ્લગ્નવત્કાલઃ કલાંશગ્રહાન્તરાંશાનાં ભુજાન્તરેણ ભાગમપહરેત્ ।
ગ્રહે વક્રિણિ ભુક્તિયોગેન લબ્ધો દિનાદિઃ કાલમુપાસ્તમયસ્ય એવ નક્ષત્રાણાં તેષાં દ્વાદશ દૃશ્યાદૃશ્યાંશઃ અગસ્ત્યધ્રુવકૃદિક્કર્મદ્વયકં કૃત્વા તદ્વટિકાદ્વયેન સ્વદેશરાશ્યુદયે વર્ધયેત્ ।
તદંશેકેગસ્ત્યોદયઃ વક્રોનેસ્તમયઃ પ્રતિદૈવસિક ઉદયો ગ્રહાન્તં લગ્નવશેનેતિ ॥
ઇતિ શ્રીવિ૦ ધ૦ દ્વિ૦ ખં૦- મા૦ સં૦ ઉદયાસ્તમયપ્રકરણં નામ સપ્તત્યુત્તરશતતમોઽધ્યાયઃ

2.174
સ્વોદયાસ્તવિલગ્નૌ ચન્દ્રાર્કયોઃ તતશ્ચન્દ્રોદયાસ્તકાલૌ સાધ્યૌ ઇષ્ટકાલિકચન્દ્રાર્કસ્વક્રાન્તિ ત્રિજ્યાગુણે વિલસ્વજ્યયા વિભજેત્ ।
લબ્ધેગ્રે ક્રાન્તિદિષ્ટેશેન તતોર્કચન્દ્રશંકુકાર્યૌ પૃથક્ચ્છંકુહતાક્ષજ્યાવલમ્બકેન વિભજેત્ ।
લબ્ધે શઙ્કુતલે તૌ ચોત્તરે સ્વરાત્રૌ દિવસયામ્યે દ્વાદશશંકુતલયોર્દિશૈકો યોગો દિગ્ભેદવિયોગઃ પૃથગ્બાહુઃ તયોર્દિગૈકો વિયોગોન્યથા યોગઃસ્ફુટબાહુઃ સ્વદૃગર્ણ્યવર્જભુજાવર્ગવિશ્લેષપદયોગઃ કપાલભેદે સામ્યે વિયોગઃ પ્રથમાંશજાં દિગૈવાતિશ્લેષો દિગ્ભેદો યુતિર્દ્વિતીયઃ પ્રથમદ્વિતીયવર્ગયોગપદં કોટિઃ કોટિ વાહુવર્ગયોગમૂલકર્ણઃ અર્કોનાશ્ચન્દ્રાર્કેર્દ્ધં તસ્માજ્જ્યાકેન્દ્રલિપ્તાશ્ચન્દ્રમાસલિપ્તાઃ તસ્માજ્જ્યાકેન્દ્રલિપ્તાશ્ચન્દ્રમાનઘ્નાઃ નવત્યાહૃતાસ્મિન્ કેન્દ્ર પ્રયમચતુર્થપદસ્થે દ્વિતીયસ્થે કૃષ્ણમ્ ઇન્દુમાનચતુર્ભાગકૃતાસ્મિતેર્કમાનભુજકકર્ણકોટિસૂત્રાણ્યઙ્ગુલતાં યાન્તિ પૂર્વાપરાશાભિમુખાર્કેન્દ્રાણ્યાદ્ય પદગે મિતશૃઙ્ગં પરિલિખેત્ ।
એવં દ્વિતીયતૃતીયગે કૃષ્ણં બિન્દુમર્કં પરિકલ્પ્ય તતોર્કાદ્યથા શશી તથા ભુજા દેયા તદગ્રાત્સ્વાભિમુખ્યેન કોટિઃ તતઃ તદંતલગ્નેન પૂર્વાન્તં પુનઃપુનઃ સત્કુલમ્ ।
યાવદવિશેષં લબ્ધોનં સ્યાત્ ઇતિ લમ્બનં સંસ્કૃતે તિથ્યન્તે ગ્રહણમધ્યશ્ચન્દ્રશ્ચન્દ્રવત્કલ્પિતાદ્દ્વિત્રિ ભાત્સ્વક્રાન્તિઃ અક્ષે સૌમ્યા શોધ્યા યામ્યા દેયા તજ્જ્યામધ્યમચન્દ્રાર્કભુક્ત્યંતરહતા શરેર્કહતયા ત્રિજ્યયા વિભજેત્ ।
લબ્ધભવનતિઃ સ્વક્રાન્તિતોક્ષેધિકે સૌમ્યાન્યથા યામ્યા તાત્કાલિકચન્દ્રવિક્ષેપાવનન્યાદિગૈક્યે યોગો દિગ્ભેદો વિયોગઃ સ્ફુટવિક્ષેપઃ તેન સ્થિતે મન્દભદલોનયુતૈર્ગ્રહૈઃ સ્પર્થનિમીલોન્મીલનમોક્ષકાલિકૈલમ્બનમાનિ કાર્યાણિ મધ્યલમ્બનસ્યેષ્ટલંબનસ્ય ધનર્ણેકોન્તરે ભેદયોગઃ ફલમ્ ।
તેન મધ્યસ્થિત્યરવિમન્દાવેવ યુતે સ્વકાલિકે સ્ફુટે ભવતઃ પઞ્ચદશં ઘટિકાકાલિકં લંબને ફલેન હીને વિમંદાર્ધે કાર્યે શેષં પીરલેખાઢ્યે ચદ્રગ્રહણવદ્ભવતિ ॥
ધન્યં યશસ્યમાયુષ્યં સ્વર્ગલોકપ્રદં તથા ॥
ઇદં ગ્રહાણાં ગણિતં સર્વકામપ્રદં શિવમ્ ॥
ગતિમેકસ્ય વિજ્ઞાય ગ્રહસ્ય સુસમાહિતઃ ॥
તસ્ય લોકમવાપ્નોતિ નાત્ર કાર્યા વિચારણા ॥
સર્વગ્રહગતિં જ્ઞાત્વા બ્રહ્મલોકં પ્રપદ્યતે ॥
ધર્માર્થી પ્રાપ્નુયાદ્ધર્મમર્થાર્થી ચાર્થમાપ્નુયાત્ ॥
કામાનવાપ્નુયાત્કામી મોક્ષાર્થી પરમં પદમ્ ॥
સમ્યગ્ગ્રહગતિં જ્ઞાત્વા પાત્રતાં યાતિ વૈ દ્વિજઃ॥
ન ચેદ્ વૃત્તિં તથા કુર્યાત્તથા વૃત્તિં વિવર્જયેત્॥
પાત્રાણામપિ તત્પાત્રં ગ્રહાણાં વેત્તિ યો ગતિમ્॥
વેદાસ્તુ યજ્ઞાર્થમભિપ્રવૃત્તાઃ કલાનુપૂર્વ્યા વિહિતાશ્ચ યજ્ઞાઃ ॥
તસ્માદિદં કાલવિધાનશાસ્ત્રં યો જ્યોતિષં વેદ સ વેદ સર્વમ્ ॥
ઇનિ શ્રીવિ૦ ધ૦ દ્વિ. ખ૦ મા૦ સં૦ પૈતામહસિદ્ધાન્તો નામ ચતુઃસપ્તત્યુત્તરશતતમોઽધ્યાયઃ

॥ સમાપ્તં પૈતામહસિદ્ધાન્તમ્ ।
2.175
શ્રીપરશુરામ ઉવાચ ॥
ભગવન્સર્વધર્મજ્ઞ સર્વશાસ્ત્રવિશારદ ॥
જિગીષૂણાં સમાચક્ષ્વ યાત્રાકાલં મહીક્ષિતામ્

પુષ્કર ઉવાચ ॥
સર્વેષામેવ વર્ણાનાં યાત્રાકાલં નિબોધ મે ॥
અધિકૃત્ય મહીનાથં વિજિગીષોર્ગુણાન્વિતમ્

પૂર્વે કપાલે પૌરોઽર્કે યાયી ભવતિ ચાપરે ॥
યાયિગ્રહૌ શુક્રકુજૌ શેષાઃ પૌરાઃ પ્રકીર્તિતાઃ

પૌરગ્રહૈર્બલોપેતૈર્ન યાત્રાં સમ્પ્રયોજયેત્ ॥
યાયિગ્રહબલે રાજા નિત્યં યાત્રાં પ્રયોજયેત્

(અસ્તં ગતે નીચગતે વિવશે રિપુરાશિગે ॥
પ્રતિલોમં ચ વિદ્ધ્વસ્તે શુક્રે યાત્રાં વિવર્જયેત્

પ્રતિલોમે બુધે યાત્રા દિક્પતૌ ચ તથા ગ્રહે ॥
વિષ્ટો વૃષ્ટ્યાં વાતિ વાતે વાત્યાયાઞ્ચ વિવર્જયેત

વૈધૃતે ચ વ્યતીપાતે નાગે ચ શકુનૌ તથા ॥
ચતુષ્પદે ચ કિંસ્તુઘ્ને તથા યાત્રાં વિવર્જયેત્ ॥

વિપત્કરે નૈધને ચ પ્રત્યરૌ ભે ચ જન્મનિ ॥
ગણે વિવર્જયેદ્યાત્રાં રિક્તાયાં ચ તિથાવપિ

ઉદીચી ચ તથા પ્રાચી તયોરૈક્યં પ્રકીર્તિતમ્ ॥
પશ્ચિમા દક્ષિણા યા દિક્તયોરૈક્યં તથૈવ ચ

વાય્વગ્નિદિક્સમુદ્ભૂતં પરિધિન્તુ ન લંઘયેત્ ॥
રામ સંવત્સરાદ્યેષુ સર્વેષ્વેવ મહીપતિઃ

સંવત્સરમદિક્પ્રાચી પરિપૂર્વસ્ય દક્ષિણા ॥
તત્પૂર્વસ્યાપરા જ્ઞેયા ચાનુપૂર્વસ્ય દક્ષિણા

અદ્વારસ્તુ વિનિર્દિષ્ટસ્તથા વત્સરસંજ્ઞિતઃ ॥
ઉત્તરાયણગે સૂર્યે પ્રાચીં યાયાદ્દિશં નૃપઃ

ચન્દ્રે ચ બ્રાહ્મણશ્રેષ્ઠ પશ્ચિમાં દક્ષિણસ્થિતે ॥
તયોરયનભેદેન યાયાત્સૂર્યાયનં દિવા

રાત્રૌ ચાન્દ્રાયણં યાયાદ્યા દિગુક્તા મયા તવ ॥
વસન્ત ઉત્તરદ્વારે ગ્રીષ્મઃ પ્રાગ્દ્વારિકસ્તથા

શરચ્ચ પશ્ચિમદ્વારઃ શિશિરશ્ચોત્તરામુખઃ ॥
હેમન્તઃ સર્વતોદ્વારઃ પ્રાવૃડદ્વારિકા સ્મૃતા

નક્ષત્રવદ્દેવતાભિર્યા યસ્ય તુ દિગુચ્યતે ॥
માસાર્ધેઽસ્ય મહાભાગ તથૈવ પરિકીર્તિતા

આદિત્યચન્દ્રસૌરાર્કદિવસાસ્તુ ન શોભનાઃ ॥
ત એવ ચાનુકૂલસ્ય દિવસો ન પ્રશસ્યતે

પ્રાગ્દ્વારો ભાસ્કરો જ્ઞેયો દક્ષિણેન તથા કુજઃ ॥
પશ્ચિમેન શનૈશ્ચારી ઉદગ્દ્વારસ્તુ ચન્દ્રમાઃ

સર્વદ્વારાઃ સ્મૃતા રામ જીવશુક્રેન્દુનન્દનાઃ ॥
તેષાં હિ દિવસાઃ શસ્તા વિશેષેણ ગમિષ્યતામ્

સમાગમે જિતો યસ્તુ જીવો મિત્રગૃહે સ્થિતઃ॥
સ્ફુરણો રશ્મિહીનશ્ચ ન પ્રશંસન્તિ તદ્દિનમ્

ઉચ્ચસ્થો મિત્રગૃહગઃ સ્વક્ષેત્રસ્થશ્ચ યો ગ્રહઃ ॥
વિજયી રશ્મિવાંસ્થૂલો દિનં તસ્ય પ્રશસ્યતે

કૃત્તિકાદ્યાનિ પૂર્વેણ મઘાદ્યાનિ ચ યામ્યતઃ॥
મૈત્રાદ્યાઃ પશ્ચિમેનાથ વાસવાદ્યાનિ ચાપ્યુદક્

સર્વદ્વારાણિ તત્રાપિ દિવાદ્યાનિ વિનિર્દિશેત્ ॥
ભવન્તિ સ્તમ્ભસંજ્ઞાનિ તાનિ દિઙ્મધ્યગાનિ ચ

સ્તમ્ભર્ક્ષાદ્યાનિ પૂર્વાણિ તાનિ પ્રાવેશિકાનિ તુ ॥
નિર્ગમર્ક્ષાણિ જાનીયાત્સ્તમ્ભર્ક્ષાદુત્તરાણિ તુ

પ્રવેશભેષુ દુષ્ટેષુ યાયિનાં વિજયં વદેત્ ॥
સ્તમ્ભભેષુ તુ દુષ્ટેષુ દુર્ગાણાં ગ્રહણે તદા

નિર્ગમર્ક્ષેષુ દુષ્ટેષુ નાગરાણાં જયં વદેત્ ॥
ઋક્ષે પાપગ્રહાક્રાન્તે તથા ચાસ્તમિતે દ્વિજ

દગ્ધે ચ ધૂમિતે વાપિ રજસોપહતેઽથ વા ॥
કેતુના ધૂમિતે વાપિ પરિવિષ્ટેઽથવા પુનઃ ઽ।

ઉત્પાતદર્શનં ચ સ્યાદ્યેન ચર્ક્ષેણ ભાર્ગવ ॥
સંક્રાન્તિર્વા ગ્રહસ્ય સ્યાદ્યેન ચાસ્તોદયૌ તથા

ભિન્નશ્ચન્દ્રમસા યશ્ચ ગ્રહેણાન્યેન વા પુનઃ ॥
યન્નક્ષત્રગતૌ ગ્રસ્તૌ સ્યાતાં વા શશિભાસ્કરૌ

ન તેન નૃપતિર્યાયાન્નક્ષત્રેણ કદાચન ॥
અષ્ટવર્ગાનુકૂલસ્થ ચન્દ્રે યાત્રાં પ્રયોજયેત્

પૂર્વદ્વારસ્થિતાનન્દા ભદ્રા દક્ષિણતઃ સ્થિતા ॥
જયા ચ પશ્ચિમદ્વારા રિક્તા ચોદક્પ્રકીર્તિતા

પૂર્ણા તુ સર્વતો દ્વારા તિથિરુક્તા મહાભુજ ॥
નક્ષત્રદેવતાતુલ્યા મુહૂર્તાનાં તુ દિગ્ભવેત્

ત્રિદિગ્દ્વારાભિજિજ્જ્ઞેયા દક્ષિણેન વિગર્હિતા ॥
પ્રાગ્દ્વારાઃ કથિતા રામ મેષસિંહધનુર્ધરાઃ

તથા ચ પશ્ચિમદ્વારાઃ કન્યામકરગોવૃષાઃ ॥
તુલામકરકુમ્ભાશ્ચ જ્ઞેયાઃ પશ્ચિમદિઙ્મુખાઃ

કીટવૃશ્ચિકમીનાશ્ચ તથા ચોદક્પ્રકીર્તિતાઃ ॥
લગ્નેન દિઙ્મુખં યત્નાજ્જ્ઞેયં પ્રાઙ્મુખમંશકમ્

સૌરાઃ સર્વે પ્રશસ્યન્તે કાલરોધં વિવર્જયેત્ ઽ।
વિશાખાદ્યં ભત્રિતયં દીને સૂર્યે વિવર્જયેત્

આષાઢાત્રિતયં ચન્દ્રે તથા બ્રાહ્મણસંજ્ઞકમ્ ॥
ધનિષ્ઠાદ્યત્રયં ભૌમે પૌષ્ણાદ્યત્રિતયં બુધે।

રોહિણ્યાદ્યં તથા જીવે પુષ્યાદ્યં ચ તથા સિતે ॥
અર્યમ્ણાદ્ય તથા સૌરે પ્રયત્નેન મહાભુજ

મૂલં ચ શ્રવણં ચૈવ આહિર્બુધ્ન્યં તથૈવ ચ ॥
આગ્નેયમથ ચાદિત્યં ભાગ્યં વાયવ્યમેવ વા

આદિત્યાદિદિનેષ્વેતે સિદ્ધિયોગાઃ પ્રકીર્તિતાઃ ॥
સિદ્ધિયોગાન્વિશેષેણ તિથિષ્વપિ નિબોધ મે

ગ્રહક્રમેણ ધર્મજ્ઞ સર્વકર્મસુ સિદ્ધિદાન્ ॥
દ્વિતીયા ચ તૃતીયા ચ પ્રતિપચ્ચાષ્ટમી તથા

સપ્તમી ચ ચતુર્થી ચ પઞ્ચમી ચ તથા તિથિઃ ॥
અન્યાશ્ચ સિદ્ધયોગેષુ તિથયસ્ત્વં શૃણુ ક્રમાત્

એકાદશી ચ દશમી નવમી પઞ્ચદશ્યપિ ॥
ચતુર્દશી દ્વાદશી ચ તથા રામ ત્રયોદશી

છાયાપ્રમાણં વક્ષ્યામિ સિદ્ધિયોગેષ્વતઃ ક્રમાત્ ॥
તત્ર કાલે કૃતં કર્મ સકૃત્સંપશ્યતે ધ્રુવમ્

આદિત્યે વિંશતિર્જ્ઞેયાશ્ચન્દ્રે ષોડશ કીર્તિતાઃ ॥
ભૌમે પઞ્ચદશૈવોક્તાશ્ચતુર્દશ તથા બુધે

ત્રયોદશ તથા જીવે શુક્રે દ્વાદશ કીર્તિતાઃ ॥
ઉદિતેનોત્તરાં ગચ્છેત્પ્રાચીં મધ્યસ્થિતે રવૌ

દક્ષિણામપરાહ્ણે તુ અર્ધરાત્રે તુ પશ્ચિમામ્ ॥
જન્મરાશ્યુદયે યાત્રા ન પ્રશસ્તા મહાભુજ

તાભ્યામુપચયર્ક્ષે તુ યાત્રા શસ્તા તથા ભવેત્ ॥
શેષેષુ વર્જયેદ્યાત્રાં ભૂતિકામો નરાધિપઃ

યાત્રા શુભફલા જ્ઞેયા સૌમ્યગ્રહનવાંશકે ॥
પાપગ્રહાંશકે યાત્રાં પ્રયત્નેન વિવર્જયેત્

જન્મભે નૈધને ચૈવ તથાધાને વિપત્કરે ॥
પ્રત્યરૌ ભગણે યાત્રાં પ્રયત્નેન વિવર્જયેત્

ક્ષેમે સંપત્કરે મૈત્રે સાધકે ચાતિમૈત્રકે ॥
કર્મભે ચ તથા યાત્રા પ્રશસ્તા મનુજોત્તમ

દિવ્યાન્તરિક્ષક્ષિતિજે દૃષ્ટે રામ મહાદ્ભુતે ॥
સપ્તાહં વર્જેયેદ્યાત્રાં પ્રયત્નેન મહાભુજ

લગ્ને તુ વિબલે યાત્રાં શૂન્યે કેન્દ્રે ચ વર્જયેત્ ॥
જન્મપે લગ્નપે રામ બલહીને વિશેષતઃ

દિક્પતાવનુકૂલે તુ શુભા યાત્રા પ્રકીર્તિતા ॥
સમ્મુખે શક્રચાપે તુ યાત્રાં યત્નેન વર્જયેત્

ન ચ ગચ્છેત્તથા રામ દ્વારાભિહતમસ્તકઃ ॥
દૃષ્ટ્વા દ્રવ્યમમઙ્ગલ્યં ખિન્નચેતાસ્તથૈવ ચ ॥
તુષ્ટે મનસિ ગન્તવ્યં પ્રયત્નેન મહીભુજા

ત્રિકોણ કેન્દ્રોપગતાસ્તુ સૌમ્યાઃ પાપાસ્તથા ચોપચયર્ક્ષસંસ્થાઃ ॥
ભવન્તિ લગ્નસ્ય તુ યસ્ય તેન યાત્રા પ્રયુક્તા તુ શુભાવહા સ્યાત્

ઇતિ શ્રીવિષ્ણુ૦ દ્વિ૦ મા૦ સં૦ રામં પ્રતિ પુષ્કરોપાખ્યાને જ્યોતિઃશાસ્ત્રમતે યાત્રાધિકારો નામ પઞ્ચસપ્તત્યુત્તરશતતમોઽધ્યાયઃ