વીણાશિખતન્ત્ર · શ્લોક 321-340

યોગિનીભિઃ સદા ભ્રષ્ટાઃ કથ્યન્તે ધર્મલોપકાઃ
ઇતિ તથ્યં મહાદેવિ સુરાસુરનમસ્કૃતમ્ ॥

સારમ્ એતદ્ ધિ તન્ત્રસ્ય તસ્ય તત્સ્થં મહાનયે
આજ્ઞા ભગવતશ્ ચૈવ શિવસ્ય પરમાત્મનઃ ॥

શ્રુતં મયા મહાદેવ વીણાસદ્ભાવમ્ ઉત્તમમ્
તન્ત્રં વીણાશિખં નામ દુર્લભં ત્રિદશેષ્વ્ અપિ ॥

વર્ગાન્તનિર્ગુણાખ્યસ્ય અસ્યાપિ પરમં ચ યત્
એકાક્ષરં પરં ગુહ્યં ભુક્તિમુક્તિપ્રદાયકમ્ ॥

ગોપિતં તુ ત્વયા દેવ સારભૂતં મહેશ્વર
તપસા દુર્ધરાલ્લબ્ધં યચ્ ચ જ્ઞાનં શિવોદ્ભવમ્ ॥

પ્રસાદં કુરુ દેવેશ યત્ર સિદ્ધિર્ ધ્રુવં સ્થિતા
પ્રાપ્તે કલિયુગે ઘોરે સંકતે બહુપાતકે ॥

સર્વસ્રોતઃપ્રપન્નાનામ્ આશુ સિદ્ધિર્ યથા નૃણામ્
પ્રસાદં કુરુ દેવેશ કઃ પરમ્પારતે મમ ॥

અલ્પપ્રજ્ઞાઃ કુમતયો બહુવ્યાકુલચેતસા
તન્ત્રં નૈવાધિગચ્છન્તિ ન ચૈવ બહુધા શ્રુતમ્ ॥

ઇતિ દેવ ત્વયા પૂર્વં કથિતં ગુરુણાત્મના
અસ્માકમ્ અપિ સંક્ષેપાત્ કથયસ્વ મહેશ્વર ॥

અહો સ્વભાવપ્રકૃતે કિમ્પ્રશ્નાસિ પુનઃ ઽપુનઃ
યન્ મયા કથિતં પૂર્વં તદ્ ગૃહાણ સુભાષિતમ્ ॥

ન ભૂયઃ પરિપૃચ્છામિ પ્રશ્નમ્ એકા ગરીયસી
વારમ્ એકં કુરુ વ્યક્તં પ્રસાદં સૂક્ષ્મગોચરમ્ ॥

શૃણુ દેવિ પ્રયત્નેન સૂક્ષ્માત્ સૂક્ષ્મતરં મહત્
પ્રયોગં સર્વતન્ત્રાણામ્ ઉત્તરં સર્વસિદ્ધયે ॥

યેન સંસ્મૃતમાત્રેણ સિદ્ધિર્ હસ્તતલે સ્થિતા
નાયાસો ન વ્રતશ્ ચૈવ ન તપશ્ ચ મહેશ્વરિ ॥

નાગ્નિકર્મ ન ચૈવાર્ચા સ્મરણાત્ સિદ્ધિદઃ સ્મૃતઃ
શૃણુષ્વૈકાક્ષરં દેવિ સદ્ભાવપરસંહિતમ્ ॥

શરીરં તત્ત્વરાજાનં જાતવેદસિ સંસ્થિતમ્
શિખાયાં સંસ્થિતો દેવો બિન્દુદેવી જયા સ્મૃતા ॥

યશ્ચાત્રોર્ધ્વં ભવેદ્ દેવિ સૌકરઃ પરિકીર્તિતઃ
તન્તુદેવં વિજાનીયાન્ મકારં બિન્દુદેવતામ્ ॥

એવં તુ પઞ્ચધા દેવિ તત્ત્વરાજં તુ કીર્તિતમ્
ચતુર્વિંશતિકોષ્થે તુ યો મન્ત્રનાયકઃ સ્મૃતઃ ॥

તત્ત્વરાજ ઇતિ ખ્યાત ઊનવિંશત્ય્ અધઃ સ્મૃતઃ
વિંશકેન સ્વરેણૈવ બિન્દુમૂર્ધ્ના તુ પીડિતમ્ ॥

એષ એકાક્ષરઃ પ્રોક્તસ્ ત્વત્પ્રિયાર્થં વરાનને
સુષિરં તત્ત્વરાજાનં જાતવેદસિ સંસ્થિતમ્ ॥

વિષ્ણોર્ ઉપરિ દીપ્તેન જપેલ્ લક્ષત્રયં બુધઃ
આકર્ષયેદ્ દ્રુમાણ્ય્ એષ મૃગપક્ષિસરીસૃપાન્ ॥