વીણાશિખતન્ત્ર · શ્લોક 301-320

દેહન્યાસં પુનર્ વક્ષ્યે અભેદ્યં પરમેશ્વરિ
વિન્યસ્ય કરણાન્ સાક્ષાન્ મહાભૂતેષુ પઞ્ચસુ ॥

દેહે તત્ત્વત્રયં ન્યસ્ય પ્રાણાયામપુરઃસરઃ
શરીરે વિન્યસેદ્ દેવિ પૂર્વમ્ ઉક્તક્રમેણ તુ ॥

માયયાચ્છાદયિત્વા તુ અઙ્કુશેન નિરોધયેત્
યોનિં બદ્ધ્વા તતઃ પશ્ચાત્ સાધકઃ સુસમાહિતઃ ॥

સ્વદેહે નમસા મન્ત્રી કલ્પોક્તેન તુ કર્મણા
કુર્યાત્ સર્વાણિ કાર્યાણિ તતઃ સિદ્ધિર્ ન સંશયઃ ॥

નયોત્તરાદિતન્ત્રેષુ કલ્પોક્તં કર્મ કારયેત્
અથવાદશલક્ષાણિ જપેદ્ યસ્ તુ વિધાનતઃ ॥

તતઃ સભ્રાતૃકા દેવ્યઃ સાધકસ્યાગ્રતઃ સ્થિતાઃ
વરમ્ ઇષ્તં પ્રયચ્છન્તિ ત્રયાતીતં પદં હિ યત્ ॥

બીજપઞ્ચકમ્ એતદ્ ધિ ન દેયં યસ્ય કસ્યચિત્
વર્ગાન્તનિર્ગુણાક્રાન્તં સમ્યગ્ વૈ બીજપઞ્ચકમ્ ॥

એવમ્ એવ પુરા કૃત્વા જ્ઞાત્વૈવં હિ વિધાનતઃ
બીજાનિ બીજયેત્ પ્રાજ્ઞઃ તતઃ કર્મ સમારભેત્ ॥

એવં વિધાનવિદ્ યસ્ તુ હીનો વા સર્વલક્ષણૈઃ
અપિ પાતકસંયુક્તઃ સ સિદ્ધિફલભાગ્ ભવેત્ ॥

વર્ગાન્તનિર્ગુણાખ્યસ્ય અસ્યાપિ પરમં સ્મૃતમ્
હૃદયં દેવદેવીનામ્ એકાક્ષરમ્ અતઃ પરમ્ ॥

યત્ર સભ્રાતૃકા દેવ્યઃ કૂટદેહા વ્યવસ્થિતાઃ
નાતઃ પરતરો મન્ત્રસ્ ત્રિષુ લોકેષુ વિદ્યતે ॥

ગોપિતવ્યં પ્રયત્નેન તન્ત્રસારં સુદુર્લભમ્
મમાપિ ગોપિતં દેવિ સર્વજ્ઞેનાપિ સર્વદા ॥

નિશ્ચયં મમ બદ્ધ્વાન્ત ? યચ્ ચ દેવેન ભાષિતમ્
ત્વયાપિ ચૈવમ્ એવં હિ રક્ષણીયં પ્રયત્નતઃ ॥

ચિન્તારત્નમ્ ઇદં ગુહ્યં વ્રતસાધનવર્જિતમ્
અનુસ્મરણામાત્રેણ સમ્યગ્જ્ઞાય ક્રમેણ તુ ॥

વર્ણયાગક્રમેણૈવ પૂર્વોક્તેન યથાક્રમમ્
સિધ્યતે નાત્ર સંદેહઃ સર્વકામસ્ તુ મન્ત્રિણામ્ ॥

શાન્તિકં પૌષ્તિકં ચૈવ વિદ્વેષોચ્ચાટનં તથા
વશ્યાકર્ષસ્ તથા નાશં સર્વં સિધ્યતિ સાધકે ॥

શુક્રેણ સર્વતોભદ્રે મહાસમ્મોહને તથા
નિર્મથ્ય કથિતો દેવિ દધ્નો ઘૃતમ્ ઇવોદ્ધૃતમ્ ॥

પરીક્ષ્ય ગુરુણા શિષ્યં ગુરુદેવાગ્નિપૂજકમ્
તસ્ય દેયમ્ ઇદં તન્ત્રં ન ચ નાસ્તિકનિન્દકે ॥

ન દીક્ષિતા ન સિધ્યન્તિ સ્થિતાઃ કલ્પશતૈર્ અપિ
સ્વયંગૃહીતમન્ત્રાશ્ ચ નાસ્તિકા વેદનિન્દકાઃ ॥

સમયેભ્યઃ પરિભ્રષ્તાસ્ તથા તન્ત્રવિદૂષકાઃ
ગુરૂણાં વિહેઠનપરાસ્ તન્ત્રસારવિલોપકાઃ ॥