વીણાશિખતન્ત્ર · શ્લોક 21-40

આચમ્ય શિષ્યમ્ આહૂય પઞ્ચતત્ત્વપરિષ્કૃતમ્
સાવિત્ર્યા પ્રોક્ષયેદ્ ભૂયસ્ તત્ત્વજપ્તં યથોદિતમ્ ॥

પ્રમાર્જયેત્કુશાગ્રેણ તસ્યાઙ્ગાનિ સમાલભેત્
આલભ્યૈવ તુ સાવિત્ર્યા ક્ષાલયેત્ સકલં ક્રમાત્ ॥

યાગભૂમૌ સ્વશિષ્યાંસ્ તુ સ્વપેચ્ ચ કુશસંસ્તરે
રક્ષાં સદા શતૈર્ બીજૈઃ કૃત્વા ધ્યાત્વા ચ તાઃ ક્રમાત્ ॥

તતઃ પ્રભાતે વિમલે મુખં પ્રક્ષાલ્ય સાધકઃ
ઇષ્ટાનિષ્ટાં ગુરૌ ચેષ્ટાં પ્રણિપત્ય નિવેદયેત્ ॥

ઇષ્ટાનિષ્ટાન્ વિદિત્વા તુ દેશિકઃ સાધકસ્ય તુ
આદૌ દેશે સમે ભૂમૌ વિવિક્તે શલ્યવર્જિતે ॥

મણ્ડલં સંલિખેત્ પ્રાજ્ઞો યથાવદ્ વિધિપૂર્વકમ્
ચતુર્હસ્તં ચતુર્દ્વારમ્ અથવા ચૈકહસ્તકમ્ ॥

મણ્ડલમ્ સંલિખેદ્ દિવ્યમ્ શાલિચૂર્ણેન સૂજ્જ્વલમ્
તત્ર મધ્યે લિખેત્ પદ્મં ચતુઃપત્ત્રં સકર્ણિકમ્ ॥

શ્વેતાસૃ ક્પીતકૃ ષ્ણાનિ કમલસ્ય દલાનિ તુ
પ્રાગ્ આરભ્ય યથાન્યાયં સૌમ્યેશાન્તાનિ લેખયેત્ ॥

કર્ણિકાં ચ તથા મધ્યે શબલાં દેશિકોત્તમઃ
ચતુર્મૂર્તિં ચતુર્વર્ણં સ્વેન બિજેન તુમ્બુરુમ્ ॥

ચતુર્વર્ણમ્ ઈશ્વરં ધ્યાયેન્ નિવિષ્ટમ્ કર્ણિકોદરે
તતઃ સિતાં સ્વબીજેન જયાં પ્રાગ્દલે વિન્યસેત્ ॥

બન્ધૂકકુસુમપ્રખ્યાં વિજયાં દક્ષિણે દલે
સ્વચ્છચામીકરપ્રખ્યામ્ અજિતાં પશ્ચિમે દલે ॥

ભિન્નાઞ્જનચયપ્રખ્યામ્ ઉત્તરે ચાપરાજિતામ્
વિન્યસ્ય પૂજાં કુર્વીત સ્વૈઃ સ્વૈર્ બીજૈર્ યથાક્રમમ્ ॥

પુષ્પધૂપૈશ્ ચ બલિભિર્ યથાકાલાન્તરૈઃ શુભૈઃ
સદ્વિતાનપતાકાઢ્યં સ્રગ્માલાલંકૃતં પુરમ્ ॥

પ્રદીપ્તદીપકૈર્ દિક્ષુ સમન્તાદ્ અવભાસિતમ્
નાનાભક્ષ્યાન્નપાનૈશ્ ચ સ્વાદુભિર્ વ્યઞ્જનૈસ્ તથા ॥

ફલૈર્ નાનાવિધૈશ્ ચૈવ પરિતઃ પર્યવસ્થિતૈઃ
કલશૈર્ વારિપૂર્ણૈશ્ ચ દશદિક્ષુ વ્યવસ્થિતૈઃ ॥

ચૂતપલ્લવસંવીતૈઃ સ્રગ્માલાલંકૃતૈઃ શુભૈઃ
એવં યષ્ટ્વા યથાન્યાયં શિષ્યાન્ આપ્રોક્ષ્ય વારિણા ॥

સાવિત્ર્યા મુખમ્ આસાદ્ય વાસસા સકલીકૃતાન્
સ્વૈઃ સ્વૈર્ બીજૈર્ ન્યસેત્ પુષ્પાન્ શિષ્યાણાં કરયોર્ દ્વયોઃ ॥

જયાત્ પ્રવેશયેન્ માયાં મણ્ડલં દેશિકોત્તમઃ
પ્રવેશ્ય તત્ર શિષ્યં તુ દ્વિત્રિચતુઃપઞ્ચ એવ વા ॥

તતો ઽગ્નિકાર્યં કુર્વીત મણ્ડલાત્ પશ્ચિમે બહિઃ
ઉલ્લિખ્યોદ્ધૃત્ય સાવિત્ર્યા કુશાન્ સંસ્તીર્ય સર્વતઃ ॥

અસ્ત્રબીજેન ચાભ્યુક્ષ્ય ગન્ધતોયેન દેશિકઃ
વહ્નિમ્ આદાય તેનૈવ સાવિત્ર્યા પૂજયેત્ તતઃ ॥