વીણાશિખતન્ત્ર · શ્લોક 161-180

અઙ્કુશેન હતો મૂર્ધ્નિ માયાપાશેન વેષ્ટિતમ્
રાજાનં રાજપત્નીં વા સપ્તાહાદ્ વશમ્ આનયેત્ ॥

ગૃહીત્વા તુ મહામાંસં દધિમધ્વાજ્યસંયુતમ્
આહુત્યષ્ટસહસ્રેણ સદ્યોત્કર્ષણમ્ ઉત્તમમ્ ॥

આત્મનઃ સાધ્યબીજં ચ પઞ્ચદેવ્યા ચતુષ્ટયમ્
નાડીમધ્યગતં ધ્યાત્વા એકીકૃત્ય વિચક્ષણઃ ॥

નાડીમાર્ગાનુસારેણ પ્રવેશ્ય સાધ્યવિગ્રહમ્
અનેનૈવ પ્રયોગેણ ત્રૈલોક્યં વશમ્ આનયેત્ ॥

અત ઉચ્ચાટનં કુર્યાચ્ છત્રૂણાં બલદર્પિતામ્
શુષ્કાણિ નિમ્બપત્ત્રાણિ ધ્વજાગ્રાણિ તથૈવ ચ ॥

નૃવાલં ચિતિભસ્મં ચ કાકપક્ષાગ્રપિચ્છકમ્
કટુતૈલવિષં રક્તં તેનાલોડ્ય તુ હોમયેત્ ॥

ચણ્ડાલાગ્નિં સમાહૃત્ય ચિતિકાષ્ઠં સમિન્ધયેત્
ઉચ્ચાટયેત્ ત્રિરાત્રેણ ત્યક્તબન્ધુસુહૃજ્જનાન્ ॥

વામહસ્તતલે ચન્દ્રં ધ્યાત્વા સમ્પૂર્ણમણ્ડલમ્
બીજપઞ્ચકસંયુક્તં યસ્ય તં દર્શયેત્ કરમ્ ॥

દર્શનાદ્ વશમ્ આયાન્તિ યે ઽપિ હન્તું સમુદ્યતાઃ
યં યં સ્પૃશતિ હસ્તેન દાસત્વમ્ ઉપગચ્છતિ ॥

દક્ષિણે ઽપ્ય્ એવ વૈ હસ્તે વિન્યસેદ્ રવિમણ્ડલમ્
યં સ્પૃશેદ્ દર્શયેદ્ યં તુ વિદ્વિષ્ટાઃ સુહૃદાન્ય્ અપિ ॥

નિમ્બસ્થવાયસં ગૃહ્ય શ્વપાકેનાવતારિતમ્
બીજૈર્ એતૈર્ વિપર્યસ્તૈસ્ તૈલાભ્યક્તં ચિતાહુતમ્ ॥

તદ્ ભસ્મ વિષરક્તાક્તં કૃષ્ણાન્તે રક્તવાસસઃ
પરિજપ્ય સહસ્રં તુ વિલોમૈર્ બીજપઞ્ચકૈઃ ॥

યં સ્પૃશેદ્ ભસ્મના તેન કાકવદ્ ભ્રમતે મહીમ્
વિદ્વિષ્ટઃ સર્વલોકાનાં યદિ શક્રસમો ભવેત્ ॥

યથાત્મનિ તથા સાધ્યે બીજષોડશકં ન્યસેત્
જવાપુષ્પસમપ્રખ્યૌ દ્વાવ્ એતૌ પરિચિન્તયેત્ ॥

જાતીહિઙ્ગુલકપક્ષૌ લાક્ષારસસમપ્રભૌ
પદ્મસમ્પુટમધ્યસ્થૌ ઉભૌ તૌ સાધ્યસાધકૌ ॥

અઙ્કુશં સાધ્યગુહ્યે તુ દણ્ડં ચાત્મનિ ગુહ્યતઃ
કુસુમ્ભરક્તસંકાશૌ માયાતન્ત્વભિવેષ્ટિતૌ ॥

પઞ્ચરાત્રં ત્રિરાત્રં વા નિઃશબ્દો ધ્યાનપારગઃ
વશમ્ આનયતે ક્ષિપ્રં નૃપતિં માનગર્વિતમ્ ॥

દ્વિજયોષિન્ મૃતા યા તુ તસ્યા ગૃહ્યં તુ કર્પટમ્
કૃષ્ણચતુર્દશ્યાં ગૃહીત્વા ચિત્યઙ્ગારૈસ્ તદુદ્ભવૈઃ ॥

બીજૈર્ વિદર્ભિતં નામ યસ્ય યસ્ય ચ વેશ્મનિ
નિખન્યતે સ વૈ ક્ષિપ્રં પ્રયાતિ યમસાદનમ્ ॥

તતો વિદ્યાવ્રતશ્લાઘી કીર્ત્યાદિભિર્ અલંકૃતઃ
સાધ્યતે ઽનેન પ્રયોગેણ મ્રિયતે ચાવિકલ્પતઃ ॥