વીણાશિખતન્ત્ર · શ્લોક 141-160

નાભિદેશે સ્થિતો ગ્રન્થિસ્ તત્ર પદ્મં વ્યવસ્થિતમ્
કર્ણિકા પદ્મમધ્યસ્ય તત્ર સાધ્યં વ્યવસ્થિતમ્ ॥

કર્ણિકાસુષિરાન્તે તુ યા કલા ચોર્ધ્વગામિની
તસ્યા મધ્યે સ્થિતો દેવઃ સ તુ દીપશિખોપમઃ ॥

શુદ્ધસ્ફટિકસંકાશં વિસ્ફુલિઙ્ગાર્કસંનિભમ્
વારિમારુતસંકીર્ણં વાલાગ્રશતભાગકમ્ ॥

વાયુવાહનમ્ આરૂઢં શબ્દાતીતમ્ અનામયમ્
સમ્પ્રત્યયં તુ ગમ્યો ઽસૌ વહતે દેહમધ્યતઃ ॥

ઇડામધ્યગતો વાપિ પિઙ્ગલાન્તર્ગતો ઽપિ વા
સુષુમ્નાન્તર્ગતશ્ ચૈવ વિષુવં સમુદાહૃતમ્ ॥

ઇડા તુ વામજા પ્રોક્તા દક્ષિણે પિઙ્ગલા સ્મૃતા
અનયોર્ મધ્યે સુષુમ્ના તુ સૃષ્ટિસંહારકારિકા ॥

ઇડા શાન્તિકપુષ્ટ્યર્થે મૃત્યૂચ્ચાટન પિઙ્ગલા
સુષુમ્ના મોક્ષદા ચૈવ જીવમાર્ગાનુસારિણી ॥

પિઙ્ગલાન્તર્ગતં ધ્યાત્વા રક્તવર્ણં વિચિન્તયેત્
મારણોચ્ચાટનાદીનિ તતઃ કર્માણિ કારયેત્ ॥

અમૃતાન્તર્ગતં જ્ઞાત્વા ધ્યાયેત્ તુહિનસંનિભમ્
શાન્તિપુષ્ટિવશાકર્ષં તદા કર્માણિ કારયેત્ ॥

વ્રતયોગાદિસંસિદ્ધિં મૂલમન્ત્રેષુ કારયેત્
તદ્ અત્ર જપમાત્રેણ મન્ત્રી સાધયતે ક્ષણાત્ ॥

અપ્રસૂતા મૃતા યોષિત્ પ્રાપ્તયૌવનમ્ એવ ચ
તસ્યાઃ પાંશુલિકાં ગૃહ્ય વામભાગે વિચક્ષણઃ ॥

લિખેન્ નામાક્ષરં તત્ર દેવીનામ્ કૂટસંસ્થિતમ્
વામાઙ્ગોજ્જ્વલરક્તેન સાધકઃ સંયતવ્રતઃ ॥

સ્ત્રિયં ચૈવ લિખેત્ તત્ર ગવાં રોચનયા પુનઃ
અનુલોમૈર્ વિહન્યસ્ તુ વામપાદેન ચાક્રમેત્ ॥

તત્ક્ષણાદ્ આનયેચ્ છીઘ્રં યા સ્ત્રી દ્વાદશયોજનાત્
પુરુષસ્ય તથા પ્રોક્તં દક્ષિણાઙ્ગે તુ કારયેત્ ॥

અથાભિચારકં કુર્યાત્ સમિધાનાં તથાસ્થિભિઃ
રાજિકાવિષરક્તાક્તં શ્મશાને હોમમ્ આરભેત્ ॥

નગ્નો મુક્તશિખો ભૂત્વા કપાલત્રયસંસ્થિતઃ
સમિધાષ્ટશતં હોમં રાત્રૌ કુર્યાદ્ વિચક્ષણઃ ॥

હોમાન્તે તુ તતઃ શક્રં કૃષ્ણવર્ણમ્ વિચિન્તયેત્
ત્રિશૂલેન વિનિર્ભિન્નં દણ્ડેન તાડિતં શિરઃ ॥

સાધકો ઘોરરૂપેણ ક્રુદ્ધઃ સંરક્તલોચનઃ
સપ્તાહાન્ નાશયેદ્ ઇન્દ્રં કિં પુનર્ માનુષાદિકમ્ ॥

ત્યક્તેન તુ કુસુમ્ભેન શતેનાષ્ટોત્તરેણ તુ
ત્રિસન્ધ્યં ધારયેદ્ રાત્રૌ અગ્નિકાર્યં તુ કારયેત્ ॥

સાધ્યં તુ સાધકશ્ ચૈવ રક્તવર્ણં વિચિન્તયેત્
હોમાન્તે તુ ધ્યાયેત્ સાધ્યં વિહ્વલં ચ સમ્મૂર્છિતમ્ ॥