વીણાશિખતન્ત્ર · શ્લોક 181-200

ગવાં રોચનયા ચૈવ યસ્ય નામ વિદર્ભિતમ્
બીજૈર્ એતૈઃ સમાયુક્તૈર્ આલિખ્ય પ્રક્ષિપેદ્ બુધઃ ॥

પાત્રં મધ્વાજ્યસમ્પૂર્ણં શતમ્ આવર્તયેદ્ દ્રુતમ્
મુમુક્ષોર્ અપિ તસ્યાસ્ત્રં શાન્તિપુષ્ટિશ્ ચ જાયતે ॥

શતજપ્તો જલેનાપિ તતો વા મુચ્યતે સદા
વ્યાધિઘાતસમિદ્ભિસ્ તુ વ્યાધિનાત્યન્તપીડિતઃ ॥

અષ્ટોત્તરશતેનૈવ આહુતીનાં ન સંશયઃ
ક્ષીરાક્તેન તુ દેવેશિ રોગી રોગાદ્ વિમુચ્યતે ॥

જુહોતિ યસ્ તુ સતતં દ્રવ્યં તસ્ય ગૃહે તુ યત્
કુર્વન્તો ઽપિ વ્યયં નિત્યમ્ અક્ષયત્વં ચ ગચ્છતિ ॥

નિત્યં કાલજપેનાપિ સર્વેષાં જાયતે પ્રિયઃ
તેજસ્વી બલસમ્પન્નો નાપ્ય્ અસૌ પીડ્યતે ભયૈઃ ॥

શ્રીકામઃ શ્રીફલં જુહ્યાત્ પદ્મં ચાજ્યમધુપ્લુતમ્
લક્ષૈકેન મહાવિત્તો મન્ત્રી લક્ષદ્વયેન તુ ॥

લક્ષત્રયેણ પૃથ્વીશો નિર્જિતારિર્ ભવેદ્ ધ્રુવમ્
સર્વકામસ્ તિલં જુહ્યાત્ પ્રાપ્નુયાત્ તુ ન સંશયઃ ॥

લક્ષેણૈકેન દેવેશિ સાધકઃ સ જિતેન્દ્રિયઃ
ત્યક્તેન નરમાંસેન છાગસ્ય પિશિતેન વા ॥

લક્ષમાત્રહુતેનાશુ યદ્ ઇષ્ટં તદ્ અવાપ્નુયાત્
કૃષ્ણાગોપયસા સાર્ધં નૃમાંસં તણ્ડુલાન્વિતમ્ ॥

પાયસં શવવક્ત્રે તુ જુહુયાત્ તાવતન્દ્રિતઃ
યાવદ્ ઉત્તિષ્થતે પ્રેતઃ કિં કરોમીતિ સો ઽબ્રવીત્ ॥

માર્ગિતવ્યં યદ્ ઇષ્તં તુ લભનીયં યશસ્વિનિ
ગુડિકાઞ્જનપાદુકં ખન્યં વા રાજ્યમ્ એવ ચ ॥

વિધાનં શક્રનાશં ચ પાદલેપરસાયનમ્
એતેષાં પ્રાર્થિતં ચૈકં દત્ત્વાગચ્છતિ નાન્યથા ॥

ઉદ્ધતા યા મૃતા યોષિત્ તસ્યા ગૃહ્યાઙ્ગુલીયકમ્
અભિમન્ત્ર્ય ઇમૈર્ બીજૈર્ અનુલોમૈઃ શતેન તુ ॥

અષ્તાધિકેન મન્ત્રજ્ઞઃ સાધ્યનામ વિદર્ભયેત્
યસ્યા દદાતિ તદ્વદ્ આસ્તે સ્ત્રિયાયાઃ સાધકોત્તમઃ ॥

આકર્ષ્યતિ તાં ક્ષિપ્રં યદિ સ્યાદ્ ઉર્વશીસમા
યોજનાનાં શતસ્યાપિ દૂરેણાપિ સમર્પિતમ્ ॥

પુરુષસ્ય ભવેદ્ દેવિ ઉદ્ધતસ્ય યશસ્વિનિ
કાકમાંસં ગૃહીત્વા તુ નિમ્બતૈલસમાયુતમ્ ॥

શ્મશાનાગ્નિં સમાધાય શિગ્રુકાષ્ઠેન સાધયેત્
જુહુયાત્ સપ્તરાત્રં તુ યસ્ય નામ્ના તુ સાધકઃ ॥

વિદ્વિષ્તો દૃશ્યતે લોકે એષ વિદ્વેષણં પરમ્
અતો ઽન્યત્ સમ્પ્રવક્ષ્યામિ રહસ્યમ્ ઇદમ્ અદ્ભુતમ્ ॥

યદ્ વિદિત્વા મહેશાનિ સિદ્ધિમ્ આપ્નોતિ પુષ્કલામ્
સ્વકાલે સમ્પ્રયોગેણ સિદ્ધિસ્ તન્ત્રેષુ કીર્તિતા ॥