વીણાશિખતન્ત્ર · શ્લોક 101-120

દિવ્યામ્બરાતપત્રેણ હારકેયૂરભૂષિતામ્
દેવદેવીં જયાં ધ્યાયેદ્ દીપ્યમાનાં સ્વતેજસા ॥

દેવસ્યાભિમુખો મન્ત્રી સસ્મિતોત્ફુલ્લલોચનામ્
દાડિમીકુસુમપ્રખ્યાં સુરગોપકસપ્રભામ્ ॥

ચાપોદ્યતકરાં ઘોરાં મત્સ્યમાંસસુરાપ્રિયામ્
ઉલૂકે સંસ્થિતાં દેવીં હારકેયૂરભૂષિતામ્ ॥

રક્તામ્બરાતપત્રેણ વિજયાં સિદ્ધિદાં સ્મરેત્
ધાતુચામીકરપ્રખ્યાં પીતમાલ્યામ્બરપ્રિયામ્ ॥

ઘણ્ટાખટ્વાઙ્ગધરીં દેવીમ્ અશ્વારૂઢાં મહાબલામ્
સૂર્યાયુતપ્રતીકાશીં સર્વાભરણભૂષિતામ્ ॥

જયન્તીં ધ્યાયતિ ક્ષિપ્રં સિદ્ધિમ્ આપ્નોતિ પુષ્કલામ્
ભિન્નાઞ્જનસમપ્રખ્યાં શર્વરીતિમિરપ્રભામ્ ॥

કૃષ્ણકૌશેયસંવીતાં મુક્તિકામણિભૂષિતામ્
દિવ્યં વિમાનમ્ આરૂઢાં ગદાખેટકધારિણીમ્ ॥

મહારાવાદિનિર્ઘોષૈશ્ ચિન્તયેદ્ અપરાજિતામ્
ગાયત્રીં વા જપન્તીં ચ સ્ફાટિકમણિભૂષિતામ્ ॥

ઋગ્યજુસ્સામાથર્વાખ્યં ગાયન્તીં વા તથૈવ ચ
સાવિત્રીં દિવ્યરૂપાં તૂપનિષદ્ગાયને રતામ્ ॥

દેવીનામ્ અગ્રસંસ્થં કૃતભૃકુટિમુખં ચિન્તયેદ્ અઙ્કુશાખ્યં સમ્પૃષ્ઠે ચાસ્ત્રરાજં પ્રકટિતસુમહાસૃક્વણીલેલિહાનમ્
સંક્રુદ્ધં ભીષયન્તં નરરુધિરવસાદિગ્ધદાન્તાકલાલં ....... ....... ....... ॥

એવં ધ્યાત્વા વિશાલાક્ષિ તતઃ પૂજા પ્રવર્તતે
ભક્ષ્યભોજ્યવિધાનૈશ્ ચ ગન્ધપુષ્પાદિભિઃ ક્રમાત્ ॥

પૂજયેત્ કૂટમધ્યસ્થં તત્ર મધ્યે વિધાનતઃ
ભૂર્ એવાયં પાદપદ્મૈર્ હૃદિ વામકરે ઽથવા ॥

મનસા પૂજયેન્ નિત્યં સિદ્ધિકામઃ સમાહિતઃ
મહાશઙ્ખમયં કુર્યાદ્ અથવા કચ્છપસ્ય તુ ॥

સૌવર્ણં રજતં તામ્રં કુલં ભવતિ સિદ્ધિદમ્
ગન્ધમણ્ડલકે વાપિ અથવા ભસ્મમણ્ડલે ॥

સિદ્ધાર્થમણ્ડલે વાપિ અથવા હૃદિ મણ્ડલે
કુસુમ્ભમણ્ડલે વાપિ પુષ્પમણ્ડલકે ઽપિ વા ॥

નાગકેશરજોભિર્ વા લિખિત્વા મણ્ડલં શુભમ્
મુક્તિદા સિદ્ધિદા હ્ય્ એવં ભવન્તીત્ય્ અવિચારણાત્ ॥

સમ્પૂજ્ય ચ યથાન્યાયં ગન્ધપુષ્પાદિ યોજયેત્
દર્શયેદ્ યોનિમુદ્રાં તુ કાલે કર્માણિ કારયેત્ ॥

સમુત્પન્નેષુ કાર્યેષુ પ્રાણદ્રવિણહારિષુ
પૂજિતાઃ સાધકં દેવ્યઃ પરિરક્ષન્તિ પુત્રવત્ ॥

અત્રાપિ યાગમ્ એવોક્તં વિશેષઃ કો ઽપરઃ પ્રભો
યથા તુ અભ્યાસમાત્રેણ સિદ્ધિર્ ભવતિ કામદા ॥

કેવલં સ્મરણાદ્ એવ તથા ત્વં વક્તુમ્ અર્હસિ
પ્રણયસ્વ પ્રસાદશ્ ચ યદિ ચાસ્તિ મહેશ્વર ॥